¡WIKʼILUK JSITIK SPISIL-ORA!

Maba ya yakʼikix smukʼul yoʼtanik ta política | ¿Bin ya yal te Biblia?

TSUMA TA

Ta 2024, ta swolol Balumilal ya yichʼ tsael te machʼatik ya x-ochik ta ajwalil, kʼaxtoxan jich ya xbajt spasik te jaʼbil ini. Manchukme jich ya spasik, ay bayal ants winiketik maba ya yakʼikix smukʼul yoʼtanik ta stojol te politicoetik.

Kʼalal la yichʼ jojkʼoybeyel te ants winiketik ta Estados Unidos, bayal machʼatik la yalik: «Jteb ma spisil te politicoetik ya sleik te yutsil slekilik», ma jaʼuk te ya skoltay te ants winiketik (centro de investigación Pew Research Center, 19 yuʼun septiembre 2023). a

Jaʼnix bayal jchʼieletik maba ya yakʼikix smukʼul yoʼtanik ta stojol te política.

«Ay bayal jchʼieletik te ya skʼan schajpanik te tulan kʼopetik ya staike, pero la yalik te ma xkoltayotik yuʼun te politicoetik» (The New York Times, 29 yuʼun enero 2024).
«Kʼalal la yichʼ jojkʼoybeyel te jchʼieletik, la yalik te jaʼ ya yakʼxan smukʼul yoʼtanik te bin ya yilik ta YouTube, ma jaʼuk ta stojol te politicoetik» (The Korea Times, 22 yuʼun enero 2024).

Jich yuʼun, ¿Yabal slekubtes jkuxlejaltik te politicoetik? ¿Machʼa ya xjuʼ ya smukʼulin koʼtantik?

Tsajtaya te machʼa ya smukʼulin awoʼtan

Jaʼ lek te ya jtsajtaytik ta lek te machʼa ya smukʼulin koʼtantik. Te Biblia ya yal: «Te machʼa ma snaʼ qʼuinal spisil ya schʼuhun, yan te machʼa pʼij yoʼtan ya stsahtay te banti ya xbehene» (Proverbios 14:15).

Teme ya akʼan ya anaʼ bantinix-a te smelelile, kʼopona te artículo «Cómo protegerse de la información falsa».

Manchukme ay politicoetik te ya skʼan ya spasik te bin lek, maba ya xjuʼ yuʼunik spasel spisil. Jaʼ yuʼun te Biblia, jich ya yal:

«Ma me xawacʼ smucʼulin awoʼtanic te winiquetic ay scʼoblalic,te snichʼnab winic, yuʼun ma xcoltaywan» (Salmo 146:3).

Jtul ajwalil te ya xjuʼ ya smukʼulin awoʼtan

Te Biblia ya yalbey skʼoplal te jaʼ la yichʼ tsael yuʼun Dios jtul ajwalil te leknax sok te ya xjuʼ ya smukʼulin koʼtantik te jaʼ: Te Jesucristo (Lucas 1:32, 33). Te Jesús, jaʼ te Ajwalil yuʼun te Wentainel yuʼun Dios, te ajwalil ini ay ta chʼulchan (Mateo 6:10).

Ilawil te bin yuʼun ya xjuʼ ya smukʼulin awoʼtan te Jesús sok te bintik ya xbajt spas yuʼun ya slajin te wokoliletik te ya jsitintaytik ta ora ini. Kʼopona te articuloetik «¿Machʼa-a te Ajwalil yuʼun te Wentainel yuʼun te Diose?» sok «¿Bin ya xbajt spas te Wentainel yuʼun te Diose?».

a Pew Research Center, «Americansʼ Dismal Views of the Nationʼs Politics» (La visión sombría de los estadounidenses sobre la política del país), septiembre 2023.