Te Naciones Unidas jich ya schol:

•   Ta 7 kʼalal ta 23 yuʼun octubre 2023, ta skaj te guerra jajchem ta Gaza sok Israel, lajemikix 6,400 ta tul ants winiketik sok 15,200 ta tul staojik ejchen. Jaʼnix jich bayal ta jtul yijkitayojik snaik.

•   Ta 24 yuʼun septiembre 2023, ta skaj te guerra jajchem ta Rusia sok Ucrania, lajemikix 9,701 ta tul ants winiketik, jaʼnix jich 17,748 ta tul ants winiketik staojik ejchen ta Ucrania.

 ¿Aybal bin ya yal te Biblia te ya x-akʼbot smukʼul yoʼtanik te machʼatik ya xkʼax swokolik ta skaj te guerra?

 Te Biblia ya yal te ya slajin Dios te guerraetik te ayik ta swolol Balumilal (Salmo 46:9). Swenta jich ya xkʼot ta pasel ya xbajt sjelolin te ajwaliletik ay ta balumilal sok jaʼ ya yakʼ xwentainwan te Wentainel ay ta chʼulchan: te Wentainel yuʼun Dios (Daniel 2:44). Te Wentainel yuʼun Dios ya xbajt yakʼ te leknax ya yaʼiy sbaik te ants winiketik.

 Ilawil te bin ya xbajt spas te Jesucristo, te Ajwalil yuʼun te Wentainel yuʼun te Dios:

•   «Ya me scoltay te pobre te ya xʼawon soc te machʼa ay swocol te mayuc machʼa ya xcoltayot yuʼune. Ya me snaʼbe yoʼbolil sbahic te pobre soc te machʼa mayuc bin ay yuʼun; soc ya me scoltaybe scuxlejalic te pobrehetique. Ya me scoltaylan ta wocol soc ta utsʼinel» (Salmo 72:12-14).

 Te Dios ya xbajt stuuntes te Wentainel yuʼun swenta ya slajin ta jkʼaxel te wokolil sok te mel-oʼtan ya yakʼ te guerraetik sok te utsʼinel.

•   «Sok yame xkustiklanbot yaʼlel sitik yuʼun te Diose, maʼyukix lajel, maʼyukix mel-oʼtan, okʼel sok te bin kʼux. Te bintik ay ta nailal chʼayix bael spisil» (Apocalipsis 21:4).

 Te Wentainel yuʼun Dios nopol ya xbajt sjelontes ta jkʼaxel te Balumilal ¿Bin-utʼil ya jnaʼtik? Melel te Biblia jamal ya yal te ya x-ayin «guerraetik ta bayuk» ta ora ini (Mateo 24:6). Spisil te bin yakʼ ta kʼoel ta pasel ta ora ini ya yakʼ kiltik te yakotikix ta kuxinel ta «slajibal kʼajkʼal» yuʼun te ajwaliletik ta balumilal (2 Timoteo 3:1).