Ta jujun jaʼbil, ya xkʼax bayal ta jmil tulan nijkel. Jteb ma spisiluk ma chikanuk ta aʼiyel, pero ay yantik te mero tulan ya xkʼax te bayal ya yakʼ wokolil, bayal ants winiketik ya xlaj yuʼun sok bayal bin ya sjin jilel. Ay baeltik, te tulan nijkel ini, ya xkʼax ta yolil te mar te ya yakʼ bulanuk te jaʼe, naʼbil sba jich bitʼil: tsunami. Kʼalal jich ya xkʼot ta pasel ini, ya slajin spisil te bin ay ta stiʼil te mar sok ay bayal ants winiketik ya xlaj yuʼun. ¿Aybal yaloj te Biblia ta swenta te tulan nijkele?

Ta artículo ini yame xbajt kiltik:

•  ¿Aybal yaloj albilkʼop te Biblia ta swenta te tulan nijkeletike?

•  ¿Yabal skʼotes ta pasel jun albilkʼop ta Biblia te tulan nijkeletik te yak ta kʼaxel ta jkʼajkʼaletik?

•  ¿Bin yuʼun te ya skʼan ya xkʼot ta koʼtantik te albilkʼopetik ini?

•  Te bin ma smeleliluk ya yalik ta swenta te albilkʼopetik ta Biblia sok te tulan nijkeletik

 Te Jesuse la yalbey skʼoplal te tulan nijkeletik ta jun albilkʼop te ya jtatik ta Biblia. Ya xjuʼ jtatik ta oxeb libroetik ini:

 «Ya xhah scontrahin sbahic nacionetic, soc ya scontrahin sbaic te jujunchahp banti scuentahinejic; ya xtal wiʼnal soc nihquel ta bayuc» (Mateo 24:7).

 «Talel cʼaxel me ya xhahch scontrahin sbahic te nacionetic, soc ya me scontrahin sbahic te jujuchahp banti scuentahinejic; ya xtal nihquel ta bayuc soc wiʼnal» (Marcos 13:8).

 «Ya xtal tulan nihquel, soc ya xtal wiʼnal soc tulan chamel ta bayuc» (Lucas 21:11).

 Jaʼ yuʼun te Jesús la yal te ya xtal «tulan nijkel ta bayuk» sok la yal te ya xjajch guerraetik, wiʼnal, sok tulan chameletik. Spisil te bin la kalbeytik skʼoplal, ya yakʼ ta ilel te ayotik ta «slajibal cʼahcʼal» (Mateo 24:3; 2 Timoteo 3:1). Teme ya kajtaytik te fechaetik te ya yalbey skʼoplal te Bibliae, yame kiltik te jajch ta 1914 te slajibal kʼajkʼale sok matoba tsʼakajem te tiempo ini.

 Yak. Melel te albilkʼopetik la yal te Jesús, jich bitʼil ta swenta te tulan nijkeletik, yak ta kʼoel ta pasel ta jkʼajkʼaleltik. Jaʼto tal ta 1914, ayniwan 1,950 tulan nijkeletik kʼaxem, te slajinoj kʼaxem ta cheb millón ta tul ants winiketik. a Yame kiltik cheʼoxebuk ejemploetik ta swenta te tulan nijkeletik kʼaxeme.

 Océano Índico (2004). Kʼax tulan nijkel te 9.1 yip, la sjach jun tsunami te la yakʼbey swokol bayal nacionetik sok la slajinbey skuxlejal 225 mil ta tul ants winiketik.

 China (2008). Kʼax tulan nijkel te ay 7.9 yip, la slajin bayal lumetik, ayniwan lajik 90 mil ta tul ants winiketik, ay niwan 375 mil ta tul la sta swokolik, sok ay bayal millón ta tul te jin jilel te snaike.

 Haití (2010). Kʼax tulan nijkel te 7.0 yip sok maba jun-nax buelta kʼax, kʼaxem ta 300 mil ta tul ants winiketik lajik yuʼun sok kʼaxem ta jun millón te machʼatik jin te snaike.

 Japón (2011). Kʼax tulan nijkel te 9.0 yip sok cheʼoxeb tsunami te la smil jilel jteb ma 18,500 ta tul ants winiketik sok bayal jmil ta tul la yijkitay jilel te snaike. Jaʼnix jich bayal bin la sjin jilel ta central nuclear yuʼun Fukushima, jich jajch jun accidente nuclear. Lajuneb jaʼbil ta patil, 40 mil ta tul ants winiketik te nopol kuxulik tey-ae maba juʼ sujtik ta snaik ta swenta te kʼax toyol yip te radiación.

 Te bin ya yal te Biblia ta swenta te tulan nijkeletik ya yakʼ jnaʼtik te ay bin nopol ya xkʼotix ta pasel. Te Jesús jich la yal: «Te cʼalal yac awilic te yaquix ta cʼohel ta pasel ini, ya me anaʼic te nopol ya xtalix te cuentahinel yuʼun Dios» (Lucas 21:31).

 Te Biblia ya yal te Wentainel yuʼun te Dios jaʼ jun gobierno te ay ta chʼulchan, te ajwalil yuʼun jaʼ te Jesucristo. Te Jesús la yalbey te jnopojeletik yuʼun te kʼalal ya skʼoponik Dios yakuk skʼanik te Wentainel ini (Mateo 6:10).

 Kʼalal te Wentainel yuʼun te Dios ya swentain te Balumilale, yame slajinbey skʼoplal te bintik ya xjinawan, jich bitʼil te tulan nijkeletik (Isaías 32:18). Maba jaʼnax-abi, te wokolil te la yakʼ ta jbakʼetaltik sok ta jpensartik te tulan nijkeletik te yak ta kʼaxel ta ora ini, yame slajinbey skʼoplal (Isaías 65:17; Apocalipsis 21:3,4). Teme ya akʼan anaʼbeyxan skʼoplal, kʼopona te artículo «¿Que cosas lograra el Reino de Dios?».