¿Aybal bin-ora te pajalnax ay stakʼinik te ants winiketike?
Ta swolol balumilal bayal ants winiketik ya xlokʼik ta calle ta spasel marcha, melel ya yilik te ma stojiluk te bin yak ta kʼoel ta pasel ta swenta jun aʼtelil o takʼin. Kʼaxtoxan-a te tal te chamel COVID-19 la stoybeyxan swokol te ants winiketik, kʼaxtoxan-a te ma xjuʼ ya xlokʼ ta snaik, te maʼyuk lek te stakʼinik sok te maʼyuk banti ya staik lek poxtayel jich chikan ta ilel te ma pajaluk te machʼa jkʼulej sok te pobreetike.
¿Aybal bin-ora ya xlaj skʼoplal te wokolil yuʼun te maʼyuk lek te takʼine? Ay. Te Biblia ya yal te bin ya xbajt spas te Dios yuʼun ya schajpan spisil te wokolile.
Te Dios ya xbajt schajpan te wokolil yuʼun te takʼin
Te wokolil: Te ants winiketik maʼyuk juʼem yuʼun yakʼbeyel spisil te bin ya xtuun yuʼun te ants winiketike.
Te xchajpajib: Te Dios ya xbajt slajin te ajwaliletik yuʼun te balumilal sok jaʼ ya yakʼ te Wentainel yuʼune. Te jaʼ ya swentain te Balumilal kʼalalto ta chʼulchan (Daniel 2:44; Mateo 6:10).
Te bin lek ya xlokʼ-a: Te bitʼil jaʼ jun gobierno ta swolol balumilal, te Wentainel yuʼun te Diose leknax ya xbajt schajpan te ants winiketik. Jaʼ yuʼun maʼyuk machʼa xbajt kʼaxukix swokol ta skaj te takʼin (Salmo 9:7-9, 18). Ya xbajt smulanik te yaʼtelik sok tseʼelnax yoʼtanik ta sfamiliaik. Te Biblia jich ya yal: «Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit. Ma ba ya spasic nahetic te yan machʼatic ya xnahinic tey a, soc ma ba ya yaʼiy tsʼumbajel te yan machʼa ya sweʼ» (Isaías 65:21, 22).
Te wokolil: Te ants winiketik ma xjuʼ yuʼunik skomel te bin ya x-akʼbotik swokolik sok te bin ya xmakotik ta stael te bin ya xtuun yuʼunike.
Te xchajpajib: Te Dios ya xbajt stuuntes te Wentainel yuʼun sok ya xbajt slajin te bin ya x-akʼbot xiwel te ants winiketik sok te bin ma lek ya yaʼiy sbaik yuʼun.
Te bin lek ya xlokʼ-a: Te Dios ya xbajt slajinbey skʼoplal te bin ya x-akʼbot swokol te ants winiketik sok te sfamiliaik. Jich bitʼil te guerraetik, te chameletik sok ya xbajt ayinukix bayal weʼelil-a (Salmo 46:9; 72:16; Isaías 33:24). Te Dios jich ya yal: «Te pueblo cuʼun ya xnahin ta banti lamal qʼuinal, ta nahetic te jun-oʼtanil tey a soc ta lugaretic yuʼun cux-oʼtanil» (Isaías 32:18).
Te wokolil: Te ants winiketik te ya stoy sbaik sok ay sbikʼtal yoʼtanik ya yutsʼin te yantike.
Te xchajpajib: Te machʼatik ya xkuxinik ta swenta te Wentainel yuʼun te Dios, ya xbajt snopik te jaʼ nail ya skʼan ya yichʼik ta wenta te yantik (Mateo 22:37-39).
Te bin lek ya xlokʼ-a: Te kʼalal ya xjajch ta aʼtel ta Balumilal te Wentainel yuʼun te Dios, spisilik ya xbajt skʼayinbeyik te skʼuxul yoʼtan te Dios, melel ma jaʼuknax ya yichʼ sba ta mukʼ stukel (1 Corintios 13:4, 5). Te Biblia jich ya yal: «Ma ba ya xʼutsʼinwan soc ma ba ya xlajinwan ta spisil te chʼul wits cuʼun, como hich te bin utʼil nojel ta haʼ te mar, hich ya xnaʼbot sba te Jehová a ta spahmal qʼuinal» (Isaías 11:9).
Te Biblia ya yal te ayotikix ta kuxinel ta slajibal kʼajkʼal sok te nopolix te Dios ya xbajt slajin te wokolil ta swenta te takʼin (Salmo 12:5). b Pero te bitʼil mato kʼoem ta pasel, ya xjuʼ ya skoltayotik te bin ya yal te Biblia yuʼun ya jsitintaytik te wokolil ta swenta takʼin. Jaʼ yuʼun ya xjuʼ ya awil te articuloetik ini «Cómo vivir con menos» sok «Una opinión realista del dinero».
a Te Biblia ya yal te Jehová sbiil te Diose (Salmo 83:18).
b Teme ya akʼan ya smukʼulin awoʼtan te bin ya yal te Biblia, ilawil te artículo «Smelelil te bin ya yal te Biblia».
Yaniwan amulan-euk sk'oponel ini
TE J-ILKʼINAL TA TOYOL
¿Bin ya xbajt spas te Wentainel yuʼun te Diose?
Te Jesús snaʼoj te jaʼnax te Wentainel yuʼun Dios ya schajpan te kʼopetik te ay ta Balumilal. ¿Bin spasojix te Wentainel yuʼun Dios yuʼun ya kakʼ smukʼul koʼtantik ta stojol?
