Ta swolol Balumilal, bayal ants winiketik te ya yalik te ya schʼuunik te Cristo ya schʼik sbaik ta política. Ay machʼatik ya skoltayik jun candidato sok ya skoltaybeyik skʼoplal partidoetik yuʼun política swenta mukʼxan skʼoplal ya xkʼot-a te sreligionik sok te bin ya spasike. Jaʼnix jich, te politicoetik swenta ya staik koltayel ta stojol te religione jaʼ ya stuuntesik te bin ya spasik sok te bin yilel te skuxlejalike. Sok ay jwolwanejetik yuʼun religión te ya x-ochik ta candidato yuʼun jun partido político. Jaʼnix jich ay bayal nacionetik te jun-naxlaj religión ay yuʼunik jaʼlaj te religión «cristiana».

 Pero ¿bin ya anop te jaʼate? ¿Yabal skʼan ya schʼik sbaik ta política te jchʼuunjeletik yuʼun Jesús? ¿Bin la spas te Jesús?. Jich la yal: «La jcaʼbeyex awilic scuenta yuʼun ha nix hich yac apasic te bin la jpasbeyexe» (Juan 13:15). Kiltik bin yilel la yil Jesús te politicae.

 Maʼuk. Te Jesús maʼyuk bin-ora la schʼik sba ta política.

 Te Jesús maba la sle mukʼ yaʼtel ta política. Kʼalal te Satanás la sjapbey te Jesús «spisil ta chahp nacionetic ayic ta bahlumilal», te Jesús la spʼaj swentainel te ajwaliletik ta balumilal (Mateo 4:8-10). a Ta junxan buelta, te ants winiketik la yilik te ya xjuʼ ya x-och ta ajwalil te Jesús sok la stenik yuʼun ya schʼik sba ta política. Pero «la snaʼ te Jesús te cʼan taluc ta otsesel ta ajwalil, hich stuquel xanix suht mohel ta wits» (Juan 6:15). Te Jesús maba la spas te bin ya skʼanik-a te ants winiketik. Maʼyuk bin-ora la schʼik sba ta política.

 Te Jesús ma la schʼik sba ta schajpanel kʼopetik ta swenta política. Jich bitʼil te judioetik ta skʼajkʼalel te Jesús, ma lek ya yaʼiyik ta ya stoj spatanik ta stojol te ajwalil yuʼun Roma. Pero kʼalal la skʼanbeyik koltayel te Jesús yuʼun ya schajpan te kʼope, te Jesús maba la schʼik sba ta schajpanel. Jaʼnax la yal: «Aʼbeyahic César te bintic yuʼun César, soc aʼbeyahic Dios te bintic yuʼun Dios» (Marcos 12:13-17). Te Jesús maba la schʼik sba ta schajpanel te kʼope, pero jamal la yal te ya skʼan ya stojik te patanil te ya yichʼik kʼanbeyel yuʼun te ajwalil ta Roma. Pero aynax te banti ya skʼan ya schʼuunbeyik skʼop te j-aʼtel patanetike. Jich bitʼil ma xjuʼ ya yichʼik ta mukʼ jtul ajwalil, melel jaʼnax ya skʼan ichʼel ta mukʼ te Diose (Mateo 4:10; 22:37, 38).

 Te Jesús la yalbey skʼoplal te Wentainel yuʼun Dios, jun ajwalil ta chʼulchan (Lucas 4:43). Te Jesús maba la schʼik sba ta política, melel snaʼoj-a te ajwaliletik ta balumilal ma xjuʼ yuʼunik spasel te bin snopoj Dios ta stojol te Balumilale, jaʼnax ya xjuʼ yuʼun spasel te Wentainel yuʼun Dios (Mateo 6:10). Jaʼnix jich snaʼoj-a te Dios maba ya xbajt stuuntes te ajwaliletik ta balumilal melel jaʼ ya sjelolin jilel te Wentainel yuʼune (Daniel 2:44).

 Maʼuk. Te jnopojeletik yuʼun te Jesús la schʼuunik te mantalil te ma junuk ya yakʼ sbaik ta stojol te balumilal (Juan 15:19). La stʼunik te ejemplo yuʼun Jesús sok maba la schʼik sbaik ta política (Juan 17:16; 18:36). Te bin la spasike, jaʼ te bajt ta yoʼtanik spasel te aʼtelil akʼbotik yuʼun te Jesuse: scholel sok yakʼel ta nopel te lek yachʼil kʼop yuʼun te Wentainel yuʼun Dios (Mateo 28:18-20; Hechos 10:42).

 Te bin mukʼxan skʼoplal ta yoʼtanik te sbabial jchʼuunjeletike jaʼ te schʼuunbeyel skʼop te Diose, pero jaʼnix jich snaʼojik-a te ya skʼan ya yichʼik ta mukʼ te j-aʼtel patanetike (Hechos 5:29; 1 Pedro 2:13, 17). Jaʼ yuʼun ya schʼuunik spasel te leyetik sok ya stojik te spatanike (Romanos 13:1, 7). Melelnix-a te maba ya schʼik sbaik ta politicae, pero ya staik koltayel yuʼun te ajwaliletik sok te kanantayel ya yakʼike (Hechos 25:10, 11; Filipenses 1:7).

 Te Biblia jamal ya yal te Jesús sok te jnopojeletik yuʼun maba la schʼik sbaik ta política. Te testigoetik yuʼun Jehová ta swolol Balumilal, jaʼ jnopojeletik yuʼun Cristo, jaʼ yuʼun ma schʼik sbaik ta política. Jich bitʼil la spasik te jchʼuunjeletik ta sbabial siglo, jaʼ ya xbajt ta yoʼtanik spasel te mantalil la yakʼ jilel te Jesús: cholel «te lec yachʼil cʼop yuʼun te cuentahinel yuʼun Dios» (Mateo 24:14).