¡WIKʼILUK JSITIK SPISIL-ORA!
Te cientificoetik la snailtesik te reloj yuʼun te Skʼajkʼalel ichʼel ta kʼop | ¿Bin ya yal te Biblia?
Ta 24 yuʼun enero 2023, te cientificoetik la snailtesik te reloj yuʼun te Skʼajkʼalel ichʼel ta kʼop, a te reloj-abi nopol ya staix te olil ajkʼabal, te jaʼ ya skʼan ya yal te ya yichʼ lajinel te Balumilal.
«Te martes kʼaxe, la yichʼ nailtesel te reloj yuʼun te Skʼajkʼalel ichʼel ta kʼop, te jaʼ señail te tulan wokoliletik ya sitintay te ants winiketik, nopol ya staix te olil ajkʼabal ta skaj te guerra ta Ucrania, te bombaetik sok te oranax ya xjelon skʼixinal o sikil te kʼinale» (Servicio internacional de noticias de la agencia AFP).
«Te cientificoetik la yalik te la snailtesik te reloj yuʼun te Skʼajkʼalel ichʼel ta kʼop, jaʼxanix 90 segundo ma sta te olil ajkʼabal. Kʼax nopolix ya yichʼ lajinel te Balumilal» (ABC News).
«Jtsob cientificoetik la yalik te maʼyuk jich kʼoem ta pasel-a te tulan wokolil ya sitintay te ants winik ta ora ini» (The Guardian).
¿Yabal yichʼ lajinel te ants winiketik sok te Balumilale? ¿Yabal skʼan ya jxiʼtik te bin ya xkʼot ta pasel ta pajel chaʼbeje? ¿Bin ya yal te Biblia?
Te bin ya jmaliytik ta pajel chaʼbej
Te Biblia ya yal te «stalel ya xhil te qʼuinale» sok te ay ants winiketik te «sbahtel qʼuinal ya xnahinic tey a» (Eclesiastés 1:4; Salmo 37:29). Jich yuʼun, te ants winiketik ma xjuʼ ya slajinik te Balumilal yuʼun maʼyuk machʼa ya xjuʼ ya xkuxinix tey-a.
Pero te Biblia ya yal te ya yichʼ lajinel te bintik ay ta Balumilal, melel ya yal «yak ta kʼaxel bael te balumilal» (1 Juan 2:17).
Teme ya akʼan ya anaʼ bin ya skʼan ya yal te Biblia kʼalal ya yal te ya yichʼ lajinel te Balumilal, kʼopona te artículo «¿Nopolbal ya yichʼ lajinel te Balumilal? ¿Bin ya skʼan ya yal te apocalipsis?».
Yuʼun ya anaʼ bin ya yal te Biblia ta swenta te bin-ora ya xtal te slajibal kʼajkʼal, kʼopona te artículo «¿Cuándo será el fin del mundo?».
Mame bayal ya jmel koʼtantik
¿Bin-utʼil ya skoltayotik te Biblia yuʼun ma kʼax bayal ya jmel koʼtantik yuʼun te bin yak ta kʼaxel ta Balumilale?
Te Biblia ya yakʼbotik lekil consejoetik (2 Timoteo 3:16, 17). Teme ya akʼan ya anaʼ bin-utʼil ya xjuʼ ya skoltayat te Biblia yuʼun ma kʼax ya amel awoʼtan yuʼun te wokoliletike, kʼopona te artículo «Qué puedo hacer para no preocuparme tanto».
Te Biblia ya yakʼ smukʼul koʼtantik yuʼun ay bin lek ya xjuʼ ya jmaliytik ta pajel chaʼbej (Romanos 15:4). Ya yalbotik ta jamal te bin ya jmaliytik ta ora ini sok ta pajel chaʼbej, jaʼ-abi ya skoltayotik ta sitintayel te wokoliletik te ya sitintay te balumilal ta kʼajkʼal ini.
Swenta ya anaʼxan ta lek te bin ya yal te Biblia, kʼana te ay machʼa ya snojptesat ta Biblia.
a «Te reloj yuʼun te Skʼajkʼalel ichʼel ta kʼop, señailnax, ya yakʼ ta naʼel te nopol ya kichʼtik lajinel ta swenta te bintik ya xmilawan te spasoj te ants winiketike. Ya sjultes ta koʼtantik te wokoliletik ya skʼan chajpanel yuʼun yato xjuʼ xkuxinotik ta Balumilal» (Bulletin of the Atomic Scientists [Boletín de Científicos Atómicos]).