Ilawil te bin achʼtonax la yalik te jwolwanejetik yuʼun te religionetik ta swenta te guerra ta Ucrania.

•   «Te jwolwanej Kirill, yuʼun te Iglesia ortodoxa rusa, maʼyuk bin yaloj ta swenta te yak ta utsʼinwanej te Rusiae […]. Ta swenta te campaña te spasojik te Iglesia-abi ta skontrainel te Ucrania, te Putin jaʼ stuuntesoj ta skoltayel sba ta kʼop ta swenta te guerrae» (EUobserver, 7 yuʼun marzo ta 2022).

•   «Te jwolwanej Kirill […] la yal ta swenta te guerra te yak ta kʼaxel ta Ucrania jichlaj kʼoem te yak ta lajel te mulile. Kʼax tulan te bin la yal melel yak skoltayel sba ta kʼop ta swenta te bitʼil te slumal yak ta yochintayel te Ucraniae» (AP News, 8 yuʼun marzo ta 2022).

•   «Te Epifanio I yuʼun Kiev, te jaʼ te jwolwanej yuʼun te Iglesia ortodoxa ucraniana, la yakʼbey bendición te ants winiketik yuʼun te Ucrania te lunes ini sok la stijbey yoʼtan ta yakʼbeyel guerra te j-utsʼinwanej rusoetik. Jaʼnix jich la yal te maba muliluk te ya yichʼ milel te soldado rusoetik» (The Jerusalem Post, 16 yuʼun marzo ta 2022).

•   «Lek ya kiltik spisil te jtsojb soldadoetik yuʼun Ucrania sok spisil te machʼatik ya skoltayotik. Ya jkʼantik bendición sok ya jkʼopontik Dios ta stojol te machʼatik ya spasik tulan ta skanantayel te Ucrania ta stojol te machʼatik ya x-utsʼinotik yuʼune» (Jich yaloj te Consejo de Iglesias y Organizaciones Religiosas de Ucrania, a 24 yuʼun febrero ta 2022).

 ¿Bin xchiat yuʼun? ¿Lekbal ya awil te bin ya spasik te Iglesiaetik te ya yalik te ya stʼunik te Cristo te ya stijbey yoʼtan te jchʼuunjeletik yuʼun te ya xbajtik ta guerrae? ¿Bin ya yal te Biblia ta swenta-abi?

Te bin spasoj tal te religión te kʼalal ay guerra

 Ta nameyix tal bayal Iglesiaetik te ya yalik te ya skʼan ya staik te lamal kʼinal, yakʼojik ta ilel te ya skoltaybeyik skʼoplal te guerraetik, te lek ya yilik sok te aynix jaʼ sjachojik. Ta bayalix tal jaʼbil te testigoetik yuʼun Jehová yakʼojik ta naʼel ta jamal te bin ma lek spasojik te religionetike. Ilawil te bin yichʼoj albeyel skʼoplal ta cheʼoxeb junetik kuʼuntik:

•   Te artículo «Las cruzadas: ‹trágica ilusión›» la scholbey skʼoplal te bin-utʼil te Iglesia católica romana kʼax chopol melel la smil bayal ta tul ants winiketik ta sbiil te Dios sok te Cristo.

•   Te artículo «La Iglesia Católica y África» ya yakʼ ta ilel te bitʼil te religión maba juʼ yuʼun skomel te kʼalal la stsak sbaik ta kʼop te tsʼumbaliletik sok te kʼalal la yichʼ milel jteb ma spisil ants winiketik ta jpam lum.

•   Te articuloetik «¿Tiene la culpa la religión?», «El papel de la religión en las guerras» sok «La religión toma partido» ya yal te nameynanix tal-a ay jwolwanej catolicoetik, ortodoxoetik sok protestanteetik te schʼikoj sbaik ta yakʼel guerra ta cheb grupoetik te skontrainoj sbaike.

Te Iglesiaetik te schʼuunojik Cristo, ¿snujpʼbal te ya skoltaybeyik skʼoplal te guerraetik?

 Te bin la yakʼ ta nopel te Jesús: «Cʼux me xawaʼiy ta awoʼtanic apat-axuhc hich te bin utʼil cʼux yac awaʼiy aba» (Mateo 22:39). «Cʼux me xawaʼiy ta awoʼtanic te acontra» (Mateo 5:44-47).

 Te bin la yakʼ ta nopel te Jesús: «Te banti ay te cuentahinel cuʼun, ma haʼuc liʼ ta bahlumilali. Te liʼuc ay ta bahlumilal te cuentahinel cuʼune, te aʼbatetic cuʼun ya spasic guerra scuenta yuʼun ma ba ya xʼochon ta cʼabal» (Juan 18:36). «Spisil te machʼatic ya stsaquic espada, ta espada ya xlajic» (Mateo 26:47-52).

 Nopa awaʼiy ini: Te bitʼil te jnopojeletik maba la stuuntesik aʼtejibaletik yuʼun milaw ta skoltayel te Jesús, ¿aybal yan swentail te banti ya xjuʼ ya stuuntesike? Swenta ya anopxan ta swenta te sbabial jchʼuunjeletik te jun yoʼtan la stʼunik te ejemplo yuʼun te Jesús sok te bin la yakʼ ta nopele, kʼopona te artículo «El cristianismo y la guerra: ¿son compatibles?».

¿Bin ya xkʼot ta stojol te religionetik te ya skoltaybeyik skʼoplal te guerra?

 Te Biblia ya yal te pʼajbilik yuʼun Dios te religionetik te ya yalik te ya schʼuunik te nojpteseletik yuʼun te Jesús, pero ma jichuk ya yakʼik ta ilel ta yorail (Mateo 7:21-23; Tito 1:16).

•   Te libro yuʼun Apocalipsis, ya yakʼ ta naʼel bitʼil te Dios ya yakʼbey smulin te religionetik spisil te machʼatik «lajemic ta milel ta bahlumilal» (Apocalipsis 18:21, 24). Teme ya akʼan ya anaʼ bin yuʼun, ilawil te artículo «¿Qué es Babilonia la Grande?».

•   Te Jesús la yal te ya yichʼik lajinel yuʼun Dios spisil te religionetik te pʼajbilik yuʼun ta skaj te spisil te bintik chopol spasojike, jich bitʼil jtekʼ teʼ te ma lek sit ya yakʼ te «ya yichʼ tsʼetel soc ya yichʼ otsesel ta cʼahcʼ» (Mateo 7:15-20). Teme ya akʼan ya anaʼ te bin-utʼil ya xkʼot ta pasel, kʼopona te artículo «¡Se acerca el fin de la religión falsa!».

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images