Ta julio 2022, la yichʼ ilel te ta swolol Balumilal kʼax toyem te skʼuxul kʼajkʼale.

•   «Schebalix buelta ta u ini, te j-aʼtel patanetik ta China la yalbey te ants winiketik te ta jteb ma 70 mukʼul lumetik ya xtoyxan yip te kʼajkʼale» (25 yuʼun julio 2022, servicio de noticias de la CNN).

•   «Ta skaj te kʼax kʼux kʼajkʼal ta Europa, ya xlaj ta kʼajkʼel bayal kʼinaletik» (17 yuʼun julio 2022, The Guardian).

•   «Ta domingo, bayal lumetik ta Estados Unidos la yil swokolik ta skaj te kʼax kʼux kʼajkʼal, jich bitʼil te machʼatik kuxinemik ta slokʼib kʼajkʼal yuʼun te mar, ta sur sok te machʼatik kuxinemik ta smalib kʼajkʼal» (24 yuʼun julio 2022, The New York Times).

 ¿Yabal skʼan ya yal-abi te maʼyuk machʼa ya xjuʼ ya xkuxin ta Balumilal ta pajel chaʼbej? ¿Bin ya yal te Biblia ta swenta-abi?

 Yaloj. Te Biblia ya yal te jichnix ya xkʼot ta pasel-a. Te Jesús la yal te ya «xchiknaj bintik xiʼbantik sba» (Lucas 21:11). Bayal ants winiketik ya x-och xiwelik yuʼun te yak ta toyel skʼuxul te kʼajkʼale sok ya xiʼik te jaʼnix te ants winik ya slajinik te Balumilale.

 Maʼuk, melel te Dios la spas te Balumilal yuʼun tey ya xkuxinik-a te ants winiketike (Salmo 115:16; Eclesiastés 1:4). Te Dios maba ya yakʼ te ya slajinik te Balumilal te ants winiketike, melel yaloj te jaʼ ya xbajt slajin «te machʼatik yakik ta sjinel te balumilale» (Apocalipsis 11:18).

 Kilbeytikxan skʼoplal cheb te bin yaloj te Dios te ya xbajt spas ta stojol te Balumilale:

•   «Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (Isaías 35:1). Te Dios ya xbajt schajpan te Balumilale maba ya yakʼ te ya xkʼatpʼuj ta jochol takin kʼinal.

•   «Haʼat yac acanantay te lumqʼuinal soc yac awaʼbe yaʼlel» (Salmo 65:9). Te Dios ya xbajt skʼatpʼuntes ta Nichimal Kʼinal te Balumilale.

 Swenta ya anaʼbeyxan skʼoplal te yuʼun-nix yaloj-a te Biblia te ya xjelon te kʼinal, kʼopona te artículo «¿Bin ya yal te Biblia yuʼun te yak ta jelonel te kʼinale sok te bin-a ya xkʼot ta pasel ta pajel chaʼbej?».

 Swenta ya anaʼbeyxan skʼoplal te jamal ya yal te Biblia te ya xlekub te Balumilal, kʼopona te artículo «¿Quién salvará el planeta?».