Ta balumilal yak ta batsʼejel te skʼuxul te kʼajkʼale sok maʼyuk bin-ora jich kʼoem ta pasel-a sok bayalxan te bintik kʼoem ta pasel te maʼyuk jich kilojtik. Ilawil te bintik kʼoemik ta pasel:

•   «Ayix tal 174 jaʼbil te yakik ta yilel te jayeb ya xmo te skʼuxul te kʼajkʼale, pero ta u yuʼun junio kʼaxtoxan toy te skʼuxule te maʼyuk bin-ora jich kʼoem ta pasel» (Oficina Nacional de Administración Oceánica y Atmosférica, Departamento de Comercio de Estados Unidos, 13 yuʼun julio 2023).

•   «Ta Italia, España, Francia, Alemania sok Polonia yak ta toyel te skʼuxul te kʼajkʼale sok ya yalik te ya xtoyxan te skʼuxul te ya xkʼot ta 48 ºC. Ta islas de Sicilia sok ta Cerdeña, jaʼ te banti kʼax toyemxan te skʼuxul te kʼajkʼale te maʼyuk jich kʼoem ta pasel ta Europa» (Agencia Espacial Europea, 13 yuʼun julio 2023).

•   «Te skʼuxul te kʼajkʼale, jaʼniwan ya yakʼ te bayal buelta sok tulanxan ya yakʼ te jaʼale» (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, 17 yuʼun julio 2023).

 ¿Yabal amel awoʼtan ta swenta te ya yal te noticiaetik te yak ta batsʼejelxan te skʼuxul te kʼajkʼale sok te tulanikxan te jaʼale? Ilawil te bin ya yal te Biblia ta swenta te bin yak ta kʼaxele.

 Yaloj. Te bitʼil kʼax kʼux te kʼajkʼale sok te bayalxan bin yak ta kʼoel ta pasel ta balumilal, jaʼ te bin ya yal te Biblia te ya xkʼot ta pasel ta jkʼajkʼaleltik. Te Jesús la yal te ya «xchiknaj bintik xiʼbantik sba sok mukʼul señailetik» (Lucas 21:11; Serafín de Ausejo, 1975). Bayal ants winiketik ya xiʼik te yak ta batsʼejelxan te skʼuxul te kʼajkʼale sok ya xiʼik te ya yichʼ lajinel te balumilal yuʼun te ants winiketik.

 Ay. Te Dios la spas te Balumilal yuʼun ya xkuxinotik spisil-ora tey-a, sok maba ya yakʼ te ya slajin te ants winiketik (Salmo 115:16; Eclesiastés 1:4). Te Dios la yal ta jamal te ya xbajt slajin«te machʼatik yakik ta sjinel te balumilale» (Apocalipsis 11:18).

 Te Biblia ya yal te maba ya yakʼ te Dios te ya yichʼ jinel te balumilal sok jichnix ya xbajt spas.

•   «[Te Dios] la scʼatpʼun ta cʼunil icʼ te tulan iqʼue,hich lahmaj yip te mar» (Salmo 107:29). Te Dios ay yuʼel yuʼun ya xjuʼ ya skombey yip te bintik ya xkʼot ta pasel ta balumilal. Ya xjuʼ ya xchajpan te bintik yichʼojix jinel ta balumilal te ya yakʼ xwoklaj te ants winiketik.

•   «Haʼat yac acanantay te lumqʼuinal soc yac awaʼbe yaʼlel; bayel bintic yac awacʼtilambe» (Salmo 65:9). Te Dios ya yakʼ te ya xkʼatpʼuj ta nichimal kʼinal te Balumilal.

 Teme ya akʼan ya anaʼxan skʼoplal te bin jamal yaloj te Biblia teme ya yichʼ chajpanel te bintik yichʼojix jinel ta balumilal, ilawil te artículo «¿Quién salvará el planeta?».