Te 19 yuʼun Mayo 2022, ta jun tsoblej yuʼun te Consejo de Seguridad de la ONU te banti la stsob sbaik 75 ta tul ants winiketik te yichʼoj mukʼ yaʼtelik, la yichʼ alel «te aynanix-a te wiʼnale, pero batsʼejxan te wiʼnal ta swolol Balumilal te kʼalal jajch te COVID-19, te bitʼil yak ta jelonel te kʼinal soknix te guerra ta Ucrania, jaʼnix jich ya yakʼ ta ilel te ya xjuʼ ya xtal tulan wiʼnal ta swolol Balumilal». Ta patil, te revista The Economist la yal te ya xjuʼ ya xtal tulan wiʼnal ta swolol Balumilal ta skaj te guerra. Te Biblia la yal te ya x-ayin tulan wiʼnal ta jkʼajkʼaleltik, pero jaʼnix jich ya yakʼbotik smukʼul koʼtantik yuʼun ya xjuʼ kuʼuntik sitintayel.

•    Te Jesús jich la yal: «Ya xhahch scontrahin sbahic nacionetic, soc ya scontrahin sbahic te jujuchahp banti scuentahinejic; ya xtal wiʼnal» (Mateo 24:7).

•    Ta Apocalipsis ya yalbey skʼoplal chantul te machʼatik kajajtik tal ta caballo. Jun te machʼa kajal tey-a jaʼ ya yalbey skʼoplal te guerra, ta patil ya xtal yan jaʼ ya yalbey skʼoplal te wiʼnal. Te albilkʼop ini jaʼ ya yalbey skʼoplal te maba ya xbajt ayinuk bayal weʼelil sok te kʼax toyol stojol ya yichʼ chonel. «La jquil ay jcoht ihcʼal cawu. Te machʼa cajal tey a ay ta scʼab spʼisojbil yalal. La jcaʼiy ay machʼa cʼopoj [...] te hich la yal: Jun denario stojol te jun litro trigo, soc jun denario stojol te oxeb litro cebada» (Apocalipsis 6:5, 6).

 Te albilkʼopetik yuʼun te wiʼnal yak ta koel ta pasel ta ora ini, jaʼ jun tiempo te ya sbiilintes te Biblia «slajibal cʼahcʼal» ( 2Timoteo 3:1). Teme ya akʼan ya anaʼbeyxan skʼoplal ta swenta te «slajibal cʼahcʼal» sok ta swenta te machʼatik kajajtik ta caballo, ilawil te video Ta 1914 jelon te balumilal sok kʼopona te artículo «¿Qué representan los jinetes del Apocalipsis?».

•    Te Biblia ya skoltayotik yuʼun ya xjuʼ kuʼuntik sitintayel biluk wokolil, jich bitʼil te yak ta toyel stojol te weʼelil sok te maʼyukix bayale. Ya xjuʼ ya awil ta yantik temaetik «Te bin ya xjuʼ ya apas teme maʼyuk bayal atakʼin».

•    Te Biblia jaʼnix jich ya yakʼbotik smukʼul koʼtantik, melel ya yal te ya xbajt lekubuk te jkuxlejaltike. Ya yalbotik te ya xkʼot yorail liʼ ta Balumilal te ya x-ayin «bayel trigo ta lumqʼuinal [o weʼelil]» sok maʼyuk machʼa ya xkʼaxix ta wiʼnal (Salmo 72:16). Teme ya akʼan ya anaʼbeyxan skʼoplal ta swenta ini te bin tʼujbil yakotik ta smaliyel sok te bin yuʼun ya xjuʼ ya smukʼulin awoʼtan te jich ya xkʼot ta pasele, kʼopona te artículo «Ya jmaliytik jun lekil kuxlejalil ta pajel chaʼbej».