Yak ta tupʼel te jaʼ | ¿Bin ya yal te Biblia?

TSUMA TA

Jpisiltik ya xtuun kuʼuntik lekil jaʼ yuʼun ya xkuxinotik. Pero te bitʼil ay bayal ants winiketik te ya xtuun yuʼunik te jaʼ, ay bin la yal ta swenta-abi te Secretario General yuʼun te ONU António Guterres, jich ya yal: «Yakotik ta kʼaxel ta tulan wokolil ta swenta te jaʼ ta swolol balumilal». Bayal millón ta tul ants winiketik ta swolol balumilal wokol ya yaʼiyik stael lekil jaʼ.

Strdel/AFP via Getty Images

¿Aybal bin-ora maʼyukix jwokoltik yuʼun ya jtatik lekil jaʼ? ¿Bin ya yal te Biblia?

Te bin ya yal Biblia ta swenta te jaʼ

Te Biblia ya yal te ya sta yorail te maʼyukix jwokoltik yuʼun jaʼ, ya yal te ya x-ayin bayal lekil jaʼ.

«Ya xtʼohm loqʼuel haʼ ta jochol taquin qʼuinal, snojel haʼ ta taquin lum. Te taquin lum ya sutpʼij ta yawil haʼ, te qʼuinal te mayuc yaʼlel ya sutpʼij ta sloqʼuib-haʼetic» (Isaías 35:6, 7).

¿Bin yuʼun ya jchʼuuntik te bin ya yal te Bibliae? Jaʼ te kʼalal ya kiltik te bitʼil chajpanbil te balumilal.

Te bin ya yal te Biblia ta swenta te Balumilal sok ta swenta te jaʼe

Kʼalal te Dios la spas te Balumilal «Ma tojoluc la spas, ha la spas scuenta yuʼun ay machʼatic ya xnahinic tey a» (Isaías 45:18).

Te Dios la spas te Balumilal yuʼun ya x-ayin kuxlejalil-a, kʼax lek la schajpan ay lekil jaʼ sok bayal jaʼ.

«[Te Dios] Ha ya stsob mohel ta tʼuhlutʼuhl te haʼe, ya scʼahtajtes ta haʼal te sahbe; te tocaletic ya smalic cohel te yaʼlel, xchajet ya xco ta stojol te ants-winiquetique» ( Job 36:27, 28).

Te texto ini, jaʼ ya yakʼ ta naʼel te bin-utʼil la schajpan Dios te jaʼe. Te jaʼ te ay ta balumilal sok ta mar ya xmo bael te sabe sok ya xkʼatpʼuj ta tokal sok ya yakʼ tal te jaʼale, ta swenta-abi spisil ora ay lekil jaʼ yuʼun ya xtuun yuʼun te ants winiketik sok te chambalametik (Eclesiastés 1:7; Amós 5:8).

«Ya jticombeyex tal haʼal ta yorahil, soc te awal-tsʼunubil soc te teʼetic ya me yacʼticlan sit» (Levítico 26:4).

Te texto ini jaʼ skʼoplal te israeletik te aʼtejik ta skʼinalik ta namey sok jamal la yichʼik albeyel te ya x-akʼbotik jaʼal yuʼun jich ya x-ayin yawal stsʼunubik. Melel te Dios snaʼoj te ya skʼan ay jaʼal yuʼun ya xchʼi te yawal stsʼunubik.

Te Dios la skʼotes ta pasel te bin la yal, jaʼnix jich ya skʼotes ta pasel ta pajel chaʼbej spisil te bin yaloje (Isaías 30:23) Te bitʼil mato xkʼot ta pasel, yak ta batsʼejel te wokolil ta balumilal ta swenta te jaʼe, melel te kʼalal ma xyakʼ te jaʼale, ya batsʼejxan te wokolil, jaʼ yuʼun ¿bin yal te Biblia ta swenta-abi?

¿Bin-utʼil ya xbajt yichʼ chajpanel te wokolil ta swenta te jaʼe?

Te Biblia ya yal te jaʼnax te Dios ay ta swenta schajpanel te wokoliletik ay ta balumilal sok tey ochem skʼoplal te wokolil ta swenta te jaʼe. Te Wentainel yuʼun Dios ay ta chʼulchan sok ya xbajt swentain te balumilal (Daniel 2:44; Mateo 6:9, 10; Apocalipsis 11:15). Jaʼ ya xbajt spas te bin ma juʼem yuʼun te ajwaliletike: jaʼ te ya slajin te wokoliletik ay kuʼuntik ta swenta te jaʼe.

Te wokolil: Te bitʼil yak ta jelonel te kʼixnajel te balumilal ya yakʼ te ay bin ya xjelon te bitʼil ya yakʼ te jaʼale, jich bitʼil te ay lugaretik te ma xyakʼ jaʼal sok ayxan lugaretik te ay snojel jaʼ o ay baeltik te ya xmo yaʼlel te mar.

Te bitʼil ya yichʼ chajpanel: Te Wentainel yuʼun te Dios ya xbajt schajpan yan buelta te bitʼil ay ta sjajchibal, jich ya xchaʼlekub te balumilale: «¡Ilawil! Yakon ta spasel ta yachʼil spisil te bintik aye» (Apocalipsis 21:5). Ya xbajt ayinuk bayal jaʼ ta takin kʼinal sok ay machʼatik ya xkuxinik te banti maʼyuk machʼa ya xjuʼ xkuxin ta ora ini (Isaías 41:17-20). Te Wentainel yuʼun te Dios ya xbajt skombey yip te bintik ya xkʼax ta balumilal.

Kʼalal te Jesús xtaluk ta balumilal la skombey yip te tulan yikʼal jaʼale. Jich la yakʼ ta ilel te ay yuʼel akʼbil yuʼun te Diose (Marcos 4:39, 41). Te kʼalal ya swentain balumilal te Wentainel yuʼun te Dios, maʼyukix wokolil ta swenta te jaʼale. Te ants winiketik sok slamalil yoʼtanik ya xkuxinik sok maba ya smel yoʼtanik ta swenta te wokoliletik yuʼun te jaʼale.

Te wokolil: Ta skaj te sbikʼtal yoʼtan te ants winiketik sok te maʼyuk bin ya yichʼik ta wenta, bayal bin ya yichʼ chʼojel ta jaʼ, jaʼ yuʼun maʼyukix lekil jaʼ.

Te bitʼil ya yichʼ chajpanel: Te Dios ya slekubtes te lum kʼinal, te jaʼetik, te mukʼul jaʼetik. Ya xbajt schajpan te Balumilal sok ya yichʼ kʼatpʼunel ta Nichimal Kʼinal. Te Biblia ay bin tʼujbil ya yalbey skʼoplal: «Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (Isaías 35:1).

¿Bin ya xkʼot ta stojolik te machʼatik ya sjinik te Balumilal sok te ya yakʼbey swokol te ants winiketike? Te Dios ya tal te ya slajin te «machʼatic ya sjinic te bahlumilale» (Apocalipsis 11:18; Proverbios 2:21, 22).

Te wokolil: Te ants winiketik maba yakik ta skanantayel te jaʼe, oranax yakik ta stupʼel.

Te bitʼil ya yichʼ chajpanel: Ta swenta te Wentainel yuʼun te Diose, ya xkʼot ta pasel te skʼanojel yoʼtan, ma jaʼuk te skʼanojel yoʼtan te ants winiketik (Mateo 6:9, 10). Te Wentainel yuʼun te Dios ya spʼijubtes ta lek te ants winiketik. Ta Isaías 11:9 jich ya yal: «hich ya xnaʼbot sba te Jehová ta spahmal qʼuinal». a Ta swenta te pʼijubtesel ya yichʼik sok te skʼuxul yoʼtanik ta stojol te Dios sok ta stojol spisil te bintik spasoje, te ants winiketik ya xbajt skanantayik te Balumilal sok te bintik pastiklanbil tey-a.

Yuʼun ya anaʼxan te bin ya spas te Wentainel yuʼun te Dios, kʼopona te artículo «¿Bin ya xbajt spas te Wentainel yuʼun te Diose?»
¿Yabal akʼan ya anaʼ bin yilel te Balumilal kʼalal ya xkʼatpʼuj ta Nichimal Kʼinal? Kʼopona te bin ya yal te Biblia ta capítulo 35 yuʼun Isaías.
Teme ya akʼan ya anaʼxan ta swenta te skʼanojel yoʼtan te Dios ta swenta te Balumilal, Ilawil te video: ¿Bin yuʼun la spas Balumilal te Diose?