Bayal machʼatik ma schʼuunik te ay bin-ora ya xlaj skʼoplal te pʼajaw ta skaj te yanyantik stsʼumbalik te ants winiketike.

•   «Ta swolol Balumilal te pʼajaw ta skaj te yanyantik jtsʼumbaltik ya yakʼbey swokol te organizacionetik, te bitʼil kuxinem te ants winiketik sok te bin yilel ya x-ilotike. Sok ta skaj te pʼajaw ya yakʼ te maba stojiluk te bin ya yichʼ pasbeyel te yantike» (António Guterres, secretario general yuʼun te Naciones Unidas).

 ¿Yabal xlaj skʼoplal te pʼajaw ta skaj te yanyantik jtsʼumbaltike? ¿Bin ya yal te Biblia?

 Te Biblia ya yal bin yilel ya yil Dios te ants winiketik te yanyantik stsʼumbalike.

•   «Ta swentanax jtul winik [te Dios] la yakʼ chiknajuk spisil ta chajp nacionetik yuʼun ya xnainik ta swolol te balumilal» (Hechos 17:26).

•   «Maʼyuk machʼa tsabilnax yuʼun te Diose, melel lek ya yil te machʼatik ya xiʼot yuʼun sok te ya spasik te bin leke, chikan te bin nación talemike» (Hechos 10:34, 35).

 Te Biblia ya yal te spisil te ants winiketik jun-nax familia ayotik sok te lek ya yil Dios spisil te ants winiketik manchukme yanyantik stsʼumbalik-a.

 Te Wentainel yuʼun Dios jaʼ ya xbajt slajinbey skʼoplal te pʼajaw ta skaj te yanyantik jtsʼumbaltik, sok ya xbajt snojptes te ants winiketik yuʼun lekuk ya yilik te yantike. Te ants winiketik ya xbajt slokʼes ta yoʼtanik te pʼajaw ta stojol te machʼatik yanyantik stsʼumbalike.

•   «Te machʼatic nahinemic ta bahlumilal ya snopic te bin stojil ta pasele» (Isaías 26:9).

•   «Te bin ya yacʼ te bin stojil ta pasele, ha te lamal qʼuinal, soc te bin ya xlocʼ yuʼun te yaʼtel te bin stojil ta pasel, ha te cʼux-oʼtanil soc te jun yoʼtan spisil ora» (Isaías 32:17).

 Ta kʼajkʼal ini bayal millón ta tul ants winiketik yakik ta snopel ta Biblia bin-utʼil ya yichʼik ta mukʼ sok te lekuk ya yilik te yantik.

•   Teme ya akʼan ya anaʼbeyxan skʼoplale, kʼopona te revista ¡Wikʼame asit! te sbiilinoj «¿Aybal spoxil te pʼajawe?».

•   Swenta ya snaʼik bin-utʼil ya xjuʼ yalbeyik skʼoplal te meʼil tatiletik sok te yal snichʼnabik te tema ini, kʼopona te artículo «¿Cómo hablar con sus hijos sobre el racismo?».