Ta Domingo 20 yuʼun Noviembre 2022 la yichʼ pasel jun conferencia ta Naciones Unidas ta swenta te bitʼil yak ta jelonel te kʼinale (COP27). Te machʼatik ay yaʼtelik la stsob stakʼinik yuʼun ya skoltayik-a te machʼatik ya xkʼax swokolik ta skaj te ya xkʼax te bintik ya sjin jilele. Manchukme kʼax mukʼ skʼoplal te bin la spasike bayal machʼatik ya yalik te ma xkoltaywane.

•   «Tseʼel koʼtan yuʼun te la jtsob jtakʼintik ta skoltayel te machʼatik ya xkʼaxik ta wokole, pero maba tikʼuknax-a te jich ya skʼan pasele, melel kʼax jinemix te Balumilale» (António Guterres, secretario general yuʼun te Naciones Unidas; 19 yuʼun noviembre 2022).

•   «Te Balumilal ya xjuʼ ya xjelon ta jkʼaxel te ya xbajt yutsʼin jilel te ants winiketik» (Mary Robinson, ex presidenta yuʼun Irlanda sok ex alta comisionada yuʼun te ONU yuʼun te Derechos Humanos; 20 yuʼun noviembre 2022).

 Te jchʼieletik jaʼ bayalxan ya smel yoʼtanik yuʼun te bin ya xkʼot ta pasel ta Balumilal. ¿Yabal xjuʼ te jun-nax ya x-aʼtejik te nacionetik sok te ya slajinbeyik skʼoplal te bintik ya yakʼ te ya xjelon te kʼinale? ¿Bin ya yal te Biblia?

 Manchukme ay machʼatik ya spasik tulan o sok spisil yoʼtan ya x-aʼtejik ta sjelontesel te bintik ya yakʼ xjelon te kʼinale, mananix kʼan juʼuk yuʼunik-a. Kilbeytik chaʼchajp skʼoplal:

•   «Te bin tsʼotol ma xhuʼ ta tojobtesel» (Eclesiastés 1:15).

   Te bin ya skʼan ya yal: Te ajwaliletik ma xjuʼ yuʼunik ya skʼotesik ta pasel spisil te bin ya yalike, melel te ants winiketik ma yichʼojik pasel yuʼun ya swentain sba ta stukelik (Jeremías 10:23). Manchukme ya syom sba spisil te nacionetik, mananix kʼan juʼuk yuʼunik slajinel-a te wokoliletike.

•   «Te ants winiketik jaʼnax kʼux ya yaʼiy sbaik ta stukelik; ya xbikʼtaj yoʼtanik yuʼun takʼin [...], maʼyuk acuerdo ta yoʼtanik» (2 Timoteo 3:2, 3).

   Te bin ya skʼan ya yal: Te Biblia la yal te ay sbikʼtal yoʼtan te ants winiketik sok te ma junuknax ya x-aʼtejik ta spisilik. Jaʼ te bin yakotik ta yilel ta ora ini.

 Te bin ya xkʼot ta pasel ta stojol te Balumilal ta pajel chaʼbej, ma jaʼuk te bin ya yalik te ajwaliletik yuʼun te balumilal, melel te Dios stsaojix jtul ajwalil te ya xbajt slekubtes te Balumilale, jaʼ te Jesucristo. Te Biblia jich ya yalbey skʼoplal:

•   «Ha ya xcʼoht ta stojol te cuentahinwanej. Hich ya xʼaʼbot sbihil: Cʼax lequil Jʼacʼ-oʼtanil, Dios te ay yuʼel, Tatil sbahtel qʼuinal, Snichʼan ajwalil yuʼun lamal qʼuinal» (Isaías 9:6).

 Te Jesús jaʼ te Ajwalil yuʼun te Wentainel yuʼun Dios, te ay ta chʼulchan (Mateo 6:10). Ay yuʼel, spʼijil, sok ya skʼan ya skanantay te Balumilal soknix te machʼatik ya xkuxinik tey-a (Salmo 72:12, 16). Te ajwalil ini, yame xbajt slajin spisil «te machʼatik yakik ta sjinel te balumilale» (Apocalipsis 11:18; Isaías 35:1, 7).

 Teme ya akʼan ya anaʼxan te bitʼil ya xlaj ta jkʼaxel te bintik ya sjin jilel te kʼinale, ilawil te artículo «¿Bin ya yal te Biblia yuʼun te yak ta jelonel te kʼinale sok te bin-a ya xkʼot ta pasel ta pajel chaʼbej?».