Éxodo 11:1-10
11 Te Jehová jich la yalbey te Moisés: «Ya kakʼ tal junxan wokolil ta stojol te faraón sok ta stojol Egipto. Jaʼtome jich ya yakʼex lokʼel bael-a. Manchukme ya yakʼex lokʼel, ta melel ya stenex lokʼel.
2 Ta ora ini albeya te ants winiketik ta lum Israel te akʼa skʼanbeyik te spatxujkik te bintik pasbil ta plata sok ta oro».
3 Te Jehová la yakʼ te lek ya yichʼ ilel te israeletik yuʼun te egipcioetike. Jaʼnix jich, te Moisés mukʼ skʼoplal kʼot ta stojol te j-abatetik yuʼun te faraón sok te ants winiketik ta spamal skʼinal Egipto.
4 Te Moisés jich la yalbey te faraón: «Jich la yal te Jehová: ‹Ta olil ajkʼabal bael yame xkʼaxon ta spamal skʼinal Egipto.
5 Spisil te ba-alaletik te ayik ta skʼinal Egipto yame xlajik, te sba snichʼan te faraón te nakal ta smukʼul naktajib, jaʼnix jich te sba yal te j-abat ants te ya x-aʼtej ta molino. Ya xlajik-euk spisil te sba yal te chambalametik.
6 Ta spamal skʼinal Egipto yame yichʼ aʼiyel tulan aw yuʼun mel-oʼtan te maʼyuk jich kʼoem ta pasel ta nailal sok maʼyuk bin-ora jich ya xkʼotxan ta pasel.
7 Pero maʼyuk jkojtuk tsʼiʼ te ya swojwojtay te israeletik ni jaʼuk te schambalamik. Jichme ya anaʼik te maba pajal ya yil Jehová te israeletik sok te egipcioetike›.
8 Spisil te j-abatetik awuʼun yame xtal skejan sbaik ta jtojol sok jichme ya yalik: ‹Lokʼan bael sok te lum te stʼunojate›. Tey-abi ya xlokʼon bael». Te kʼalal laj yoʼtan ta kʼop te Moisés, mero ilinem lokʼ bael ta stojol te faraón.
9 Te Jehová jich la yalbey te Moisés: «Maba ya yaʼiybeyex akʼopik te faraón yuʼun jich ya xpʼolxan kuʼun te milagroetik ta skʼinal Egipto».
10 Spisil te jayeb milagroetik te spasojikix-a te Moisés sok te Aarón, la spasik ta stojol te faraón, manchukme jich-abi te Jehová la yakʼ tulanubuk yoʼtan te faraón swenta maba ya yakʼ lokʼel te israeletike.
