Éxodo 12:1-51
12 Te Jehová jich la yalbey te Moisés sok te Aarón ta skʼinal Egipto:
2 «Te u ini jaʼme te sjajchibal u te ya yichʼ ajtayel yuʼun te jaʼbil awuʼunike.
3 Kʼopojanik ta stojol te lum Israel sok jichme xa awalbeyik: ‹Ta slajunebal kʼajkʼal yuʼun te u ini yame skʼan ya atsakik ta jujun familia jkojt jkolel* tuminchij, jujunkojt tuminchij ta jujun na.
4 Pero, teme ma bayalex ta afamiliaik te ma xlaj awuʼunik sweʼel jkojt jkolel* tuminchij, yame skʼan ya awakʼbeyik-euk te apatxujkik te nopol* ay anaik soke. Yame skʼan awakʼbeyik jaʼ chikan te jayebik ta tul sok te jayeb ya sweʼik ta jujuntule.
5 Yame skʼan atsaik jkojt jkolel* tat tuminchij o jkojt jkolel tat tentsun te maba tsakbil ta chamel sok te juntonax yaʼbilal.
6 Yame skʼan ya akanantayik jaʼto ta skʼajkʼalel 14 yuʼun te u ini. Spisil te lum yuʼun Israel yame skʼan ya smilik te chambalam te kʼalal yakix ta ijkʼubel-a te kʼinale.*
7 Ta patil yame skʼan ya stsijtsinik te schʼichʼel ta schaʼchʼixil steʼel te tiʼnail sok te smarcoil te na te banti ya xweʼike.
8 »›Ta ajkʼabalnix-abi yame skʼan ya sweʼik te tiʼbal, yame skʼan ya swoik sok yame skʼan ya sweʼik sok pan te maba yichʼoj levadura soknix chʼaal itaj.
9 Mame xa aweʼik jxejtʼuk ta stseel ni jaʼuk te paybile. Woaik spisil, jaʼnix jich te sjol, yok sok te bintik ay ta schʼujte.
10 Mame xa akʼejik jxujtʼuk tiʼbal swenta yan kʼajkʼal. Teme ayto jil awuʼunike, yame skʼan ya achikʼik.
11 Te kʼalal yakex ta weʼel-ae, yame skʼan achukoj achʼujtik, alapoj atepik o axanabik, atsakoj anabateʼik sok oranaxme ya skʼan ya xweʼex. Jaʼme te Kʼin Pascua yuʼun te Jehová.
12 Ta ajkʼabal ini yame xkʼaxon ta spamal skʼinal Egipto sok ya jmiltiklan spisil te sba snichʼan spisil te winiketik sok te sba yal te chambalametik te ay ta skʼinal Egipto. Ya kichʼ ta kʼop sok ya kakʼbey castigo spisil te diosetik yuʼun Egipto. Joʼon Jehovaon.
13 Te chʼichʼ ta stiʼ anaik jaʼme señail ya xkʼot awuʼunik. Te kʼalal ya kil te chʼichʼe, ya jwiluntay kʼaxel te banti ayexe. Jich maba ya awichʼik milel te kʼalal ya kakʼbey castigo te skʼinal Egipto.
14 »›Te kʼajkʼal ini, jaʼ snaʼojibal ya xkʼot awuʼunik ta swenta te ya apasik kʼin ta stojol te Jehová. Ta kajalkaj atsʼumbalik yame skʼan ya apasik te kʼin-abi. Jaʼ jun mantalil te ma xlaj skʼoplale.
15 Jukebme kʼajkʼal ya skʼan aweʼik pan te maba yichʼoj levadura. Jaʼto tal ta sbabial kʼajkʼal yame skʼan ya alokʼesik ta anaik te smatsʼul pan te pajubtesbile. Melel machʼauk-a te ya sweʼ te bin yichʼoj levadura ta sbabial kʼajkʼal jaʼto ta sjukebal kʼajkʼal yame yichʼ milel ta yolil te lum Israel.
16 Ta sbabial kʼajkʼal yame skʼan ya apasik chʼul tsoblej, jaʼnix jich ta sjukebal kʼajkʼal yame skʼan ya apasik yan chʼul tsoblej. Mame skʼan ya x-aʼtejex ta cheb kʼajkʼal-abi, jaʼnaxme ya xjuʼ ya apasik te weʼelil te ya aweʼik ta jujuntule.
17 »›Yame apasulanik te Kʼin yuʼun pan te maba yichʼoj levadura, melel ta kʼajkʼalnix-abi ya jlokʼesex ta apisilik* ta skʼinal Egipto. Ta kajalkaj atsʼumbalik yame skʼan ya apasik te kʼin-abi. Jaʼ jun mantalil te ma xlaj skʼoplale.
18 Ta xmal kʼajkʼal ta skʼajkʼalel 14 yuʼun te sbabial u jaʼto ta skʼajkʼalel 21 ta xmal kʼajkʼal yame skʼan ya aweʼik te pan te maba yichʼoj levadura.
19 Ta jukeb kʼajkʼal yame skʼan te maʼyuk pajuben smatsʼul pan ta anaik. Machʼauk-a te ya sweʼ te bin yichʼoj levadura chikan teme jaʼ jyanlum o jtul israel yame yichʼ milel ta yolil te lum Israel.
20 Mame xa aweʼik te bin yichʼoj levadura. Ta bayuk te banti yakex ta nainel mame xa aweʼik pan te yichʼoj levadura›».
21 Tey-abi, te Moisés oranax la stsob te jwolwanejetik yuʼun te Israel sok jich la yaltiklanbey: «Jujuntul akʼa bajt stsa jkojt jkolel* chambalam ta swenta te sfamilia sok akʼa smil te chambalam te ya yakʼ ta majtanil ta swenta te Kʼin yuʼun Pascua.
22 Ta patil tsakaik jtom hisopo, mulaik ta chʼichʼ te ay ta yawil sok tsijtsinaik te schaʼchʼixil steʼel te tiʼnail sok te smarcoile. Mame ayuk machʼa ya xlokʼ ta snaik jaʼto ta yan kʼajkʼal ta sab.
23 Kʼalal te Jehová ya xkʼax yakʼbey castigo te egipcioetik, pero teme ya yil te tsijtsinbil ta chʼichʼ te schaʼchʼixil steʼel te tiʼnail sok te smarcoile, te Jehová yame swiluntay kʼaxel te tiʼnailetik-abi. Maba ya yakʼ x-och ta anaik te wokolil yuʼun te lajele.*
24 »Te jaʼat sok te awal anichʼnab yame skʼan ya apasulanbeyik skʼinul te bin kʼot ta pasele. Jaʼ jun mantalil te ma xlaj skʼoplal.
25 Te kʼalal ya x-ochex ta kʼinal te jamal yalojix te Jehová te ya yakʼbeyex, yame skʼan ya apasulanik te kʼin-abi.
26 Kʼalal jich ya sjojkʼoybeyex te awal anichʼnabik ‹¿Bin swentail awuʼunik te kʼin ini?›,
27 te jaʼex jich ya awalbeyik ‹Jaʼ te milbil majtanil yuʼun te Kʼin Pascua yuʼun te Jehová. La swiluntay kʼaxel te sna te israeletik te ayik ta Egipto, te jich maba taot te jfamiliatik te castigo la yichʼik te egipcioetike›».
Tey-abi, te israeletik la skejan sbaik sok la snijan sbaik.
28 Jaʼ yuʼun, te israeletik mero jich la spasik te bitʼil la yal ta mantal te Jehová ta swenta te Moisés sok te Aarón. La spasik jich te bitʼil albotike.
29 Ta olil ajkʼabal, te Jehová la smiltiklan spisil te ba-alaletik te ayik ta skʼinal Egipto, te sba snichʼan te faraón te nakal ta smukʼul naktajib, jaʼnix jich te sba snichʼan te machʼa ay ta chukojibal.* La smiltiklan-euk spisil te sba yal te chambalametike.
30 Te faraón, te j-abatetik yuʼun sok te spisil te yantik egipcioetik jajchik ta ajkʼabal, chiknaj tulan aw yuʼun mel-oʼtan ta spamal skʼinal Egipto, melel ta jujun na aynanix machʼa laj tey-a.
31 Ta ajkʼabalnix-abi, te faraón la stikun ta ikʼel ta oranax te Moisés sok te Aarón, jich la yaltiklanbey: «¡Baanikix-abi! Lokʼanik bael ta jlumal jaʼex sok te yantik israeletik. Baan ichʼaik ta mukʼ te Jehová, jichnix te bitʼil la awalike.
32 Ikʼaik bael-euk te atuminchijik sok te awakaxik, jichnix te bitʼil la awalik. Jaʼnix jich akʼbonik bendición».
33 Te egipcioetik jajch sujik te israeletik yuʼun ya xlokʼik bael ta oranax, melel jich yakik ta yalel: «¡Teme maba ya xlokʼex baele, yame xlajotik ta jpisilkotik!».
34 Jich yuʼun, te israeletik la yichʼik bael te wotsʼbil harina te maba yichʼoj levadura soknix te yawil te banti ya yichʼ wotsʼel te spotsojik ta spakʼik-ae sok la skajanik bael ta snejkʼelik.
35 Te israeletik jich la spasik te bitʼil albotik ta mantal yuʼun te Moisés jaʼ te la skʼanbeyik bael te egipcioetik te bintik pasbil ta plata, oro sok kʼuʼul pakʼal.
36 Te Jehová la yakʼ te lek ya yichʼik ilel te israeletik yuʼun te egipcioetik, jich yuʼun akʼbotik bael te bintik la skʼanike. Jich te israeletik la spojbeyik bael te bintik ay yuʼun te egipcioetike.
37 Jich yuʼun, te israeletik lokʼik bael ta Ramesés, bajtik ta Sucot. Ayniwan 600 mil ta tul winiketik te beenik, maba ajtaybil tey-a te alaletike.*
38 Jokinotik bael yuʼun bayal ta chajp ants winiketik.* Jaʼnix jich la yikʼik bael tuminchijetik sok wakaxetik, kʼax bayal ta kojt chambalametik.
39 Te wotsʼbil harina te la yichʼik lokʼel tal ta Egipto jajch spasik sepel panetik te maba yichʼoj levadura. Te pan maba yichʼoj levadura ta skaj te la yichʼik tenel lokʼel ta oranax ta Egipto, jich maba akʼbotik tiempo ta schajpanel te sweʼelike.
40 Te jayeb jaʼbil nainik ta skʼinal Egipto, jaʼ 430 jaʼbil.
41 Te bin kʼajkʼalil tsʼakaj te 430 jaʼbil jaʼnix te bin-ora lokʼik bael ta skʼinal Egipto spisil* te lum yuʼun te Jehová.
42 Ta ajkʼabal ini ya spasbeyik skʼinul te bitʼil lokʼesotik yuʼun Jehová ta skʼinal Egipto. Spisil te lum yuʼun Israel yame skʼan ya spasik kʼin ta ajkʼabal ini ta swenta yichʼel ta mukʼ te Jehová, jichme ya skʼan pasel ta kajalkaj tsʼumbalil.
43 Te Jehová jich la yalbey te Moisés sok te Aarón: «Jaʼme te mantalil ini ta swenta te Kʼin yuʼun Pascua. Maʼyuk jtuluk jyanlum te ya xjuʼ ya sweʼ te milbil majtanil ta swenta te Kʼin yuʼun Pascua.
44 Pero, teme ay machʼa la sman jtul moso ta takʼin, yame skʼan ya spasbey circuncisión.* Jaʼnaxme jich ya xjuʼ ya sweʼ-euk te milbil majtanile.
45 Ni jaʼuk te machʼa la yijkitay jilel slumal sok te jle-aʼtel ma xjuʼ ya sweʼik te milbil majtanile.
46 Ta jun-nax na yame skʼan ya yichʼ weʼel te jkolel* tuminchij. Mame skʼan ya awichʼik lokʼel ta fuera te tiʼbal sok mame skʼan ya awakʼbeyik* jchʼixuk sbakel.
47 Spisil te lum yuʼun Israel yame skʼan ya spas te Kʼin Pascua.
48 Teme ay jtul jyanlum te sjokinojex te ya skʼan ya spas te Kʼin Pascua yuʼun te Jehová, yame skʼan ya yichʼ circuncisión* spisil te winiketik te ayik ta snae. Jaʼnaxme jich ya xjuʼ ya spas te kʼin-abi sok jich ya xkʼot te bitʼil jtul israel. Ni jtuluk winik te maba yichʼoj circuncisión ya xjuʼ ya sweʼ te milbil majtanil yuʼun te Kʼin Pascua.
49 Te ley ini, pajalme ya skʼan ya schʼuunik spasel te israeletik sok te jyanlumetik te yakik ta nainel ta awolilik».
50 Jich yuʼun, spisil te israeletik mero jich la spasik te bitʼil la yal ta mantal te Jehová ta swenta te Moisés sok te Aarón. La spasik jich te bitʼil albotike.
51 Ta kʼajkʼalnix-abi, te Jehová la slokʼes bael spisil* te israeletik ta skʼinal Egipto.
Notaetik
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «tijil».
^ Ta yantik variante «jchʼiel».
^ Jich yaʼiyel te jaʼ te kʼalal malix-a te kʼajkʼal sok te ya x-ochix ta ijkʼubel-a te kʼinale.
^ Ta hebreo: «soldadoetik».
^ Jaʼ skʼoplal jkojt jkolel tuminchij o jkojt jkolel tat tentsun.
^ Ta hebreo: «lajinele».
^ Ta hebreo: «nail pozo».
^ Teyniwan ochem skʼoplal-euk-a te antsetik te ya skanantayik te yalatakike.
^ Jaʼ skʼoplal jtsojb ants winiketik te ma jaʼuk israeletik, tey ayik-euk chaʼoxtul egipcioetik.
^ Ta hebreo: «spisil te soldadoetik».
^ Ta yantik variante «jchʼiel».
^ Ta yantik variante «akʼasbeyik».
^ Ta hebreo: «soldadoetik».
