Éxodo 13:1-22
-
Spisil te ba-alal keremetik sok te sba yalatak te chambalametik jaʼ yuʼun te Jehová (1, 2)
-
Kʼin yuʼun pan te maba yichʼoj levadura (3-10)
-
Spisil te ba-alal keremetik sok te sba yalatak te chambalametik yame yichʼ akʼbeyel te Jehová (11-16)
-
Te Dios ya yikʼ bael te Israel ta mar Rojo (17-20)
-
Te balal tokal sok te balal kʼajkʼ (21, 22)
13 Te Jehová jaʼnix jich la yalbey te Moisés:
2 «Akʼbonik ta jtojol spisil te ba-alal keremetik* yuʼun te israeletik. Jaʼme kuʼun ya xkʼotik te ba-alal keremetik yuʼun te israeletik sok te sba yalatak te chambalametik, te jaʼ statike».
3 Ta patil, te Moisés jich la yalbey te lum: «Akʼa juluk ta awoʼtanik te kʼajkʼal ini, jaʼ te skʼajkʼalel te lokʼex tal ta Egipto, jaʼ te kʼinal te banti la awichʼik mosoinel-ae, melel te Jehová la slokʼesex tal ta swenta yuʼel skʼab. Jaʼ yuʼun mame xa aweʼik te bin yichʼoj levadura.
4 Yame xlokʼex bael ta kʼajkʼal ini, te jaʼ te u yuʼun abib.*
5 Te Jehová la yalbey ta jamal te antiguo ameʼ atatik te ya yakʼbeyex te lekil kʼinal te banti ya yakʼ bayal leche sok chab te jaʼ skʼinal te cananeoetik, hititaetik, amorreoetik, heveoetik sok te jebuseoetik. Te kʼalal ya yikʼex ochel ta kʼinal-abi, jichme ya skʼan ya apasulanik ta jujun jaʼbil ta u yuʼun abib.*
6 Jukebme kʼajkʼal ya skʼan ya aweʼik pan te maba yichʼoj levadura, ta sjukebal kʼajkʼal yame skʼan ya apasik kʼin ta swenta yichʼel ta mukʼ te Jehová.
7 Yame skʼan ya aweʼik pan te maba yichʼoj levadura te jukeb kʼajkʼal-abi. Mame ayuk bin ay awuʼunik te yichʼoj levadura, jaʼnix ta spamal te kʼinal amakojik mame skʼan te ayuk te bin pajubtesbil awuʼunik.
8 Ta kʼajkʼal-abi, jichme ya skʼan ya awalbeyik te awal anichʼnabik: ‹Jaʼ jich ya jpastik yuʼun ya jultes ta koʼtantik te bin la spas ta jtojoltik te Jehová te kʼalal lokʼotik tal ta Egipto›.
9 Te kʼin ini ya xkʼot jich bitʼil señail ta akʼabik sok jich bitʼil snaʼojibal ta atiʼbaik.* Jichme ya x-ayin ta aweik te ley yuʼun te Jehová, melel te Jehová la slokʼesex tal ta Egipto sok yuʼel skʼab.
10 Ta jujun jaʼbil yame skʼan ya achʼuunik spasel te mantalil ini ta skʼajkʼalel te tsabile.
11 »Kʼalal te Jehová ya yikʼex ochel ta skʼinal te cananeoetik —te la yalbeyex ta jamal sok te antiguo ameʼ atatik te ya yakʼbeyexe—,
12 yame skʼan ya awakʼik ta stojol te Jehová spisil te ba-alal keremetik,* jaʼnix jich spisil te sba yalatak te chambalametik, te jaʼ statik. Jaʼme yuʼun, Jehová ya xkʼot spisilik.
13 Ta swenta te sba yal te burroe yame skʼan ya ajel ta jkojt tuminchij yuʼun ya akoltay-a. Teme maba ya ajeltaye, yame skʼan ya awakʼbey* snukʼ. Jaʼnix jich yame skʼan ya awakʼbeyik sjelol spisil te ba-alaletik awuʼun yuʼun ya xkolik.
14 »Teme jich ya sjojkʼoybeyex te awal anichʼnabik ta pajel chaʼbej ‹¿Bin swentail ini?›, yame skʼan jich ya awalbeyik ‹Te Jehová la slokʼesotik tal sok yuʼel skʼab ta Egipto, te banti mosoinbilotik-ae.
15 Te bitʼil mananix ya skʼan yakʼotik lokʼel-a te faraone, te Jehová la smiltiklan spisil te ba-alaletik te ayik ta spamal te skʼinal Egipto soknix te sba yalatak te chambalametike. Jaʼ swentail te ya kakʼtik milbil majtanil ta stojol te Jehová ta swenta te sba yal te chambalametik, te jaʼ statike* sok ya kakʼbeytik sjelol te ba-alal keremetik kuʼuntik yuʼun ya xkolik-a›.
16 Jaʼ ini yame skʼan ya xkʼot bitʼil señail ta akʼabik sok jich bitʼil chujkilal ta atiʼbaik,* melel te Jehová la slokʼesotik ta Egipto sok yuʼel skʼab».
17 Kʼalal te faraón la yakʼ lokʼel te lum yuʼun Israel, te Dios maba la yikʼ lokʼel ta be te ay ta skʼinal te filisteoetik, manchukme jaʼ komxan-a. Yuʼun jich la yal te Dios: «Yaniwan xchebaj yoʼtan te lum te kʼalal ya sitintayik guerra te jich ya skʼan ya sujtik bael ta Egipto».
18 Jaʼ yuʼun, te Dios la sjelbey sbeik, jaʼ la yakʼbey stʼunik bael te be te ya xbajt ta jochol takin kʼinal te ay ta stojol bael te mar Rojo. Te israeletik lokʼik bael ta skʼinal te Egipto, chapalik jich te bin-utʼil te soldadoetik te ya xbajtik ta yakʼel guerra.
19 Te Moisés la yichʼ bael te sbakel te José, melel te José la yakʼ te yakuk yalik ta jamal te snichʼnab te Israel te bin ya spasik te kʼalal jich la yaltiklanbey: «Jnaʼoj te ya xbajt skoltayex te Diose. Yame awichʼbonik bael te jbakele».
20 Te israeletik lokʼik bael ta Sucot, och spas scampamentoik ta Ezam te banti ya xjajch te jochol takin kʼinal.
21 Te Jehová jaʼ nail yak ta bael ta stojolik. Ta kʼajkʼaleltik la stojobtestiklan bael ta be ta swenta balal tokal, ta ajkʼabal la yakʼ sakal kʼinal ta swenta balal kʼajkʼ. Jich ya xjuʼ yuʼunik beel ta kʼajkʼaleltik sok ta ajkʼabal.
22 Maʼyuk bin-ora lokʼ ta stojol te lum te balal tokal ta kʼajkʼaletik sok te balal kʼajkʼ ta ajkʼabal.
Notaetik
^ Ta hebreo: «spisil ba-alaletik te ya sjam te yawil alajel».
^ Ilawil ta apéndice, B15.
^ Ilawil ta apéndice, B15.
^ Ta hebreo: «ta yolil asitik».
^ Ta hebreo: «spisil te bin ya sjam te yawil alajel».
^ Ta yantik variante «akʼasbey».
^ Ta hebreo: «spisil te bin ya sjam te yawil alajel».
^ Ta hebreo: «ta yolil asitik».
