Éxodo 16:1-36
16 Lokʼik bael ta Elim, ta patil spisil te lum yuʼun Israel kʼotik ta jochol takin kʼinal te Sin sbiil te ay ta olil yuʼun te Elim sok te Sinaí. Kʼotik tey-a ta skʼajkʼalel 15 ta schebal u slokʼelik tal ta skʼinal Egipto.
2 Ta jochol takin kʼinal spisil te lum yuʼun Israel jajchik ta wulwulkʼop ta stojol te Moisés sok te Aarón.
3 Te israeletik jich ya yalulanbeyik: «¡Jaʼ lek te lajukotik ta skʼab Jehová ta skʼinal Egipto! Tey najkajotik ta stsʼeel te yoxomal tiʼbal sok ya jweʼtik pan-a jaʼto te kʼalal ya xnoj jchʼujtik. Pero, te jaʼex la awikʼonkotik lokʼel tal ta jochol takin kʼinal yuʼun ya xlaj ta wiʼnal spisil te lume».
4 Jaʼ yuʼun, te Jehová jich la yalbey te Moisés: «Ya kakʼ xko tal bayal weʼelil ta chʼulchan. Spisil te lum yuʼun Israel yame skʼan ya xlokʼik ta stsobel ta jujun kʼajkʼal te jayeb ya xtuun yuʼunik. Jichme ya jpas ta prueba sok ya kil teme ya schʼuunbonik te ley kuʼun o teme maʼuke.
5 Ta swakebal kʼajkʼal yame skʼan ya stsobik swenta cheb kʼajkʼal sok nailto ya skʼan ya schajpanik».
6 Te Moisés sok te Aarón jich la yaltiklanbey spisil te israeletik: «Ta xmal kʼajkʼal yame anaʼik te jaʼ Jehová te la slokʼesex tal ta skʼinal Egipto.
7 Ta sab yame awilbeyik yutsilal te Jehová, melel te Jehová la yaʼiy te yakex ta wulwulkʼop ta stojole. ¿Machʼaonkotik-a te yakex ta wulwulkʼop ta jtojoltike?».
8 Te Moisés jich la yalxan: «Kʼalal te Jehová ya yakʼbeyex tiʼbal yuʼun ya aweʼik ta xmal kʼajkʼal sok te kʼalal ya yakʼbeyex aweʼelik ta sab yuʼun ya xnoj achʼujtik, yame anaʼik te la yaʼiy stojol te Jehová te yakex ta wulwulkʼop ta stojole. ¿Machʼa ya akuyonkotik-a? Te jaʼexe maba yakex ta wulwulkʼop ta jtojoltik. Jaʼ yakex ta wulwulkʼop ta stojol te Jehová».
9 Ta patil, te Moisés jich la yalbey te Aarón: «Jich xa awalbey spisil te lum yuʼun Israel: ‹Laʼik ta stojol te Jehová, melel la yaʼiy te yakex ta wulwulkʼope›».
10 Jaʼnax te kʼalal laj yoʼtan ta kʼop te Aarón ta stojol spisil te lum yuʼun Israel, te israeletik la sut sitik ta yilel te jochol takin kʼinal, tey-abi chiknaj ta tokal te yutsilal te Jehová.
11 Te Jehová jaʼnix jich la yalbey te Moisés:
12 «La kaʼiy stojol te yakik ta wulwulkʼop te israeletik. Jich xa awaltiklanbey: ‹Te kʼalal yakix ta ijkʼubel-a te kʼinal* ya aweʼik tiʼbal, ta sab ya aweʼik pan jaʼto te kʼalal nojix achʼujtik-ae. Jich ya anaʼik te joʼon Jehovaon te Dioson awuʼunik›».
13 Ta mal kʼajkʼalnix-abi tal bayal ta kojt codorniz-mut te noj yuʼunik te campamento, ta sab ko tal tsʼujul ta sjoyobal te campamento.
14 Te kʼalal takij te tsʼujul, ay bin jil ta sba te jochol takin kʼinal te chʼin pechajtike te kʼax jay te jich yilel te bin-utʼil meʼsik o toyiw.
15 Ta skaj te israeletik maba la snaʼik bin-a, jich jajch yalbey sbaik te kʼalal la yilik: «¿Bin-a ini?». Te Moisés jich la yaltiklanbey: «Jaʼ te weʼelil te la yakʼbeyex te Jehová te ya xtuun awuʼunik.
16 Jich la yal ta mantal te Jehová: ‹Ta jujuntul, akʼa stsob te jayebnax ya sweʼe. Yame skʼan ya atsobik jun omer* jaʼ chikan te jaytul ayik ta nailpakʼ awuʼunik›».
17 Jich la spasik te israeletik. Ay machʼatik bayal la stsobik, ay machʼatik jtebnax la stsobik.
18 Kʼalal ya spʼisik ta omer,* te machʼa bayal la stsobe tikʼnax lokʼ-a; te machʼa jtebnax la stsobe maba pasbot falta. Ta jujuntul la stsob te jayebnax ya sweʼe.
19 Ta patil, te Moisés jich la yaltiklanbey: «Mame ayuk machʼa ayto ya yijkitay ta swenta yan kʼajkʼal».
20 Pero ma la schʼuunik te bin la yal te Moisés. Kʼalal chaʼoxtul winiketik ayto la yijkitayik ta swenta yan kʼajkʼal, tojk schanul sok jajch ta tuubel. Jaʼ yuʼun, te Moisés bayal ilin ta stojolik.
21 Ta jujun sab, jujuntul ya stsob jaʼ chikan te jayeb ya sweʼe. Te kʼalal ya xkʼixnaj tal te kʼajkʼale, ya x-ulub te jayebxan jile.
22 Ta swakebal kʼajkʼal la stsobik weʼelil ta swenta cheb kʼajkʼal, jaʼ ya skʼan ya yal cheb omer* ta swenta jujuntul. Jaʼ yuʼun, spisil te jolaletik yuʼun te lum bajt yalbeyik yaʼiy te Moisés.
23 Ta swenta-abi, te Moisés jich la yaltiklanbey: «Jich la yal te Jehová. Ta sjunal kʼajkʼal te pajele, jaʼme skʼajkʼalel kux-oʼtan, jaʼ jun sábado te chʼultesbil ya xkʼot ta stojol te Jehová. Teme ya akʼan ya apasik pane, pasaikme; teme ay bin ya akʼan ya apayike, payaikme. Te binxan ya xjil awuʼunike kʼejaik ta swenta sab pajel».
24 La skʼejik ta swenta sab pajel jich te bitʼil la yal ta mantal te Moisés, maba tojk schanul sok maba tuub.
25 Jaʼ yuʼun, jich la yal te Moisés: «Weʼaik yoʼtik, melel jaʼ jun sábado ta swenta te Jehová. Maba ya ataikix ta lumkʼinal ta kʼajkʼal ini.
26 Wakeb kʼajkʼal ya atsobik, pero ta sjukebal kʼajkʼal, ta sábado, mame ayukix».
27 Manchukme jich-abi ay machʼatik lokʼ stsobik ta sjukebal kʼajkʼal, pero maʼyuk bin la staik.
28 Jaʼ yuʼun, te Jehová jich la yalbey te Moisés: «¿Binto-ora ya achʼuunbonik te mantaliletik sok te leyetik kuʼune?
29 Mame xchʼay ta awoʼtanik te la yakʼbeyex te Jehová te skʼajkʼalel sábado. Jaʼ yuʼun, te swakebal kʼajkʼal ya yakʼbeyex weʼelil ta swenta cheb kʼajkʼal. Ta sjukebal kʼajkʼal, ta spisilik ya skʼan ya xjilik te banti ayike, mame ayuk machʼa ya xlokʼ tey-a».
30 Jich yuʼun, te lum la spas kʼin ta sjukebal kʼajkʼal ta skʼajkʼalel sábado.*
31 Te israeletik la yakʼbeyik sbiilin maná* te weʼelil-abi. Sak jich te bin-utʼil te sbakʼ kulanto sok jich sbujtsʼ te bin-utʼil galleta te pasbil ta chab.
32 Jaʼ yuʼun, te Moisés jich la yal: «Jich la yal ta mantal te Jehová: ‹Nojesaik jun omer* yuʼun maná sok kʼejaik yuʼun jich ya yilik te kajalkaj atsʼumbalik te weʼelil la kakʼbeyex yuʼun ya aweʼik ta jochol takin kʼinal te kʼalal la jlokʼesex tal ta Egipto›».
33 Te Moisés jich la yalbey te Aarón: «Tsaka tal jun oxom, nojesa ta jun omer* yuʼun maná, akʼa ta stojol te Jehová yuʼun ya yichʼ kʼejel ta kajalkaj tsʼumbalil».
34 Jichnix te bitʼil albot ta mantal yuʼun Jehová te Moisés, te Aarón la yakʼ ta stojol te skaxaul Testigo Kʼop yuʼun tey ya yichʼ kʼejel-a.
35 Te israeletik la sweʼik te maná 40 jaʼbil jaʼto te kʼalal kʼotik ta jun kʼinal te ay yajwalule. La sweʼik maná jaʼto te kʼalal kʼotik ta stiʼil skʼinal Canaán.
36 Te jun omer* jaʼ jun ta slajunebal yuʼun te jun efá.*
Notaetik
^ Jich yaʼiyel te jaʼ te kʼalal malix-a te kʼajkʼal sok te ya x-ochix ta ijkʼubel-a te kʼinale.
^ Jaʼniwan 2.2 litro. Ilawil ta apéndice, B14.
^ Jaʼniwan 2.2 litro. Ilawil ta apéndice, B14.
^ Jaʼniwan 4.4 litro. Ilawil ta apéndice, B14.
^ O «la skux yoʼtan».
^ Jaʼ jpʼal kʼop te talemniwan ta hebreo kʼop te ya skʼan ya yal «¿bin-a ini?».
^ Jaʼniwan 2.2 litro. Ilawil ta apéndice, B14.
^ Jaʼniwan 2.2 litro. Ilawil ta apéndice, B14.
^ Jaʼniwan 2.2 litro. Ilawil ta apéndice, B14.
^ Jaʼ 2.2 litro. Ilawil ta apéndice, B14.
