Éxodo 19:1-25
19 Kʼalal ayix oxeb u slokʼelik tal ta Egipto te israeletike, ta kʼajkʼalnix-abi kʼotik ta jochol takin kʼinal te Sinaí sbiil.
2 Lokʼik bael ta Refidim, kʼotik ta jochol takin kʼinal Sinaí sok la spas scampamentoik tey-a ta stojol bael te witse.
3 Tey-abi, te Moisés mo bael ta wits yuʼun ya stejkʼan sba ta stojol te smelelil Dios.* Teyto-a te Jehová la skʼopon tal, jich la yalbey: «Jichme ya skʼan ya awalbey te stsʼumbal Jacob sok jichme ya acholbey yaʼiy te israeletik:
4 ‹Jaʼex awilojik ta asitik te bin la jpasbey te egipcioetike. Jich la jkajanex tal ta xikʼ te águila yuʼun jich ya kikʼex tal ta jtojol.
5 Jich yuʼun, teme ya achʼuunik ta lek spasel te jkʼop sok ya akʼotesik ta pasel te chapbilkʼop kuʼun ta yolil te yantik lum, jaʼexme tsabil ya xkʼoex kuʼun te mukʼ akʼoplalike, melel jaʼ kuʼun swolol te balumilale.
6 Te jaʼexe chʼul lum ya xkʼoex kuʼun sok sacerdote ya xkʼoex te ya xwentainwanex jich te bin-utʼil ajwaliletik›. Spisil-abi yame skʼan ya awalbey yaʼiy te israeletike».
7 Jich ko bael te Moisés, la stsob te jwolwanejetik yuʼun te lum sok la yaltiklanbey spisil te bintik albot ta mantal yuʼun te Jehová.
8 Ta patil-abi, spisil te lum pajal jich la yalik: «Ya jpaskotik spisil te bin yaloj te Jehová». Ta oranax, te Moisés bajt yakʼbey snaʼ te Jehová te bin la yal te lume.
9 Te Jehová jich la yalbey te Moisés: «Ilawil, yame xtalon ta atojol ta ijkʼal tokal swenta ya yaʼiybonik jkʼop te lum te kʼalal ya jkʼoponate, yuʼun jich spisil ya schʼuunatik-euk». Tey-abi, te Moisés la yalbey yaʼiy te Jehová te bin la yal te lume.
10 Te Jehová jich la yalbey: «Baan ta stojol te lume, chʼultesa yoʼtik sok pajel soknix akʼa sakʼ skʼuʼik.
11 Ta yoxebal kʼajkʼal yame skʼan chapalukik, melel ta yoxebal kʼajkʼal te Jehová ya xko tal ta wits Sinaí ta sit spisil te lume.
12 Yame skʼan ya awakʼbey yil te lum te bantinax ya xjuʼ ya xkʼotik ta sjoyobal te wits sok jich ya awaltiklanbey: ‹Tsajtayame* abaik te mame xmoex bael ta wits sok mame xa atekʼbeyik stiʼil. Machʼauk-a te ya spik te wits yananixme xlaj-a.
13 Pero mame skʼan ya apikik te machʼa jich ya spase, yame skʼan ya achʼojik ta ton o ya atʼimuytayik. Chikan teme jaʼ chambalam o winik yananixme xlaj-a›. Jaʼnaxme ya xjuʼ ya xnoptsajex* bael ta wits, kʼalal ya yichʼ okʼesinel te xulub yuʼun te tat tuminchij».
14 Ta patil, te Moisés ko tal ta wits, jajch schʼultes te lume, jich la sakʼik te skʼuʼik.
15 Te Moisés jich la yaltiklanbey: «Chapalukexme ta yoxebal kʼajkʼal, mame xa ajokinik ta wayel te awinamike».
16 Ta yoxebal kʼajkʼal ta sakubel kʼinal chiknaj chawuk sok tsantsewal. Ay pimil tokal ta sba te witse sok ya xchiknaj ta aʼiyel tulan yokʼel xulubil. Jajchik ta nijkel yuʼun xiwel spisil te ants winiketik te ayik ta campamento.
17 Tey-abi, te Moisés la yikʼ lokʼel ta campamento te lume, kʼot stejkʼan sbaik ta yeʼtal te wits ta stojol te smelelil Diose.*
18 Bayuknax ya xlokʼ te chʼail ta spisil te wits Sinaí, melel ko tal ta yolil kʼajkʼ te Jehová. Yak ta moel te chʼail jich te bin-utʼil schʼail horno. Spisil te wits tulan yak ta nijkel.
19 Kʼalal bejbe* yak yichʼbel yip te yokʼel te xulubil, yak ta kʼop te Moisés sok ya xjakʼbot skʼop yuʼun te smelelil Diose.*
20 Te Jehová ko tal ta sba te wits Sinaí. Jaʼ yuʼun, te Jehová la yalbey te Moisés te yakuk xmo ta sba te witse, jich mo bael te Moisés.
21 Te Jehová jich la yalbey ta mantal te Moisés: «Albeya ta jamal te lum te manchuk jkʼaxel ya sjam tal sbeik yuʼun ya yilik te Jehová, teme jich ya spasike, bayalme machʼatik ya xlajik.
22 Jaʼnix jich, te sacerdoteetik te spisil-ora ya xnoptsajik* ta stojol te Jehová yame skʼan ya schʼultes sbaik swenta maba ya xmilotik yuʼun te Jehová».
23 Te Moisés jich la yalbey te Jehová: «Ma xjuʼ ya xmoik tal ta wits Sinaí te lume, melel jich la awal ta jamal kʼalal jich la awalbon: ‹Akʼbeya yil te bantinax ya xjuʼ ya xkʼotik ta sjoyobal te wits sok chʼultesa›».
24 Pero, jich albot yuʼun te Jehová: «Baan, koan bael sok ikʼa moel tal te Aarón. Pero mame xa awakʼ sjamik tal sbe yuʼun ya xmoik tal te banti ay te Jehová te sacerdoteetik sok te lum yuʼun jich maba ya xmilotik yuʼun».
25 Jich yuʼun, te Moisés ko bael te banti ay te lume, la yaltiklanbey te bintik albote.
Notaetik
^ Ta yantik variante «Ilame».
^ Ta yantik variante «xjijtsʼajex», «xtijtsajex».
^ Ta yantik variante «xkechkon».
^ Ta yantik variante «xjijtsʼajik», «xtijtsajik».
