Éxodo 22:1-31
-
La yichʼik albeyel te bintik schapoj te Dios (1-31)
-
Ta swenta te elekʼ (1-4)
-
Te kʼalal ay machʼa ya slajinbey yawal tsʼunub yan (5, 6)
-
Te kʼalal ay bin ya yichʼ tojel cheb buelta sok te sderecho te yajwale (7-15)
-
Te castigo ya yichʼ te machʼa ya sloʼlay jtul achʼix te mato tabil ta winik (16, 17)
-
Ta swenta yichʼel ta mukʼ Dios sok te bin stojil ya skʼan ya yichʼ pasbeyel te yantike (18-31)
-
22 »Teme ay machʼa ya yelkʼan jkojt toro o jkojt tuminchij te patil ya smil o ya schon te chambalame, yame skʼan ya yakʼbey sjelol joʼkojt toro ta swenta te toro sok chankojt tuminchij ta swenta te tuminchije.
2 »(Teme la yichʼ tael jtul j-elekʼ te yak ta ochel ta na ta ajkʼabal, pero ay machʼa ejchentesot sok milot yuʼun, mame ayuk smul ta smalel chʼichʼ te machʼa milawane.
3 Teme kʼot ta pasel-abi te kʼalal sakubenix-a te kʼinale, ayme smul ya xkʼot ta smalel chʼichʼ te machʼa milawane).
»Te j-elekʼ yame skʼan ya yakʼbey sjelol te bin la yelkʼane, teme maʼyuk bin ay yuʼune, jaʼnixme ya yichʼ chonel yuʼun ya yichʼ tojel te bintik la yelkʼane.
4 Teme la yichʼ tael ta ilel te ayto ta skʼab sok te kuxulto te chambalam te la yichʼ elkʼanel chikan teme jkojt toro, jkojt burro o jkojt tuminchij, yame skʼan ya stoj cheb buelta.
5 »Teme ay machʼa ya yikʼ bael schambalam ta weʼel ta kʼinal o ta tsʼusubiltik te ma jaʼuk yuʼune, yame skʼan ya stoj sok te bin lekxan ya xlokʼ yuʼun ta skʼinal o ta tsʼusubiltik yuʼun.
6 »Teme ay machʼa la sjach kʼajkʼ te la stsak bael te chʼixtikil sok te la schikʼ te trigo te tomtiklanbil,* te awal tsʼunbil o spamal te kʼinal yame skʼan ya stoj te bintik laj ta kʼajkʼe.
7 »Teme ay machʼa la yakʼbey skʼej stakʼin o yan bintik-a te spatxujk, pero ay machʼa och ta sna te la yelkʼan baele, teme la yichʼ tael te j-elekʼe, yame skʼan ya stoj cheb buelta.
8 Pero, teme maba taot te j-elekʼ, yame skʼan ya yikʼik bael te yajwal na ta stojol te smelelil Dios* swenta ya yilik teme jaʼnix la yichʼbey jilel te bintik yuʼun te spatxujk o maʼuk.
9 Ta jujun buelta te kʼalal ay machʼa ya yichʼ akʼbeyel smulin te ay bin yelkʼanoj chikan teme jkojt toro, jkojt burro, jkojt tuminchij, jlijkʼ kʼuʼul o chikan bin-a te chʼaye te ay machʼa te jich ya yal «¡Jaʼ kuʼun ini!», te xchie, ta schebalik yame skʼan ya xbajtik ta chajpanel ta stojol te smelelil Dios.* Jich te Dios yame yakʼ ta naʼel machʼanix-a te ay smule, jaʼ-abi yame skʼan ya stojbey cheb buelta te spatxujke.
10 »Teme ay machʼa ya skʼanbey te spatxujk te yakuk xkanantaybot jkojt burro, jkojt toro, jkojt tuminchij o chikan bin alakʼil chambalametik* pero teme laj, ejchenaj o bajt ta elkʼanel te maʼyuk machʼa la yile,
11 te machʼa yak ta skanantayel te chambalam yame skʼan ya yal ta jamal ta stojol te Jehová te maʼyuk bin la spasbey te chambalam. Te yajwal te chambalam yame skʼan ya schʼuun te bin jamal la yichʼ alel, jich te yan winike maʼyuk bin ya stoj yuʼun.
12 Pero, teme bajt ta elkʼanel yuʼun te chambalame, yame skʼan ya stojbey te yajwale.
13 Yan teme laj ta tiʼel yuʼun jtiʼawal chambalam, te winik yame skʼan ya yichʼ tal te bintik jil yuʼun te chambalam swenta ya yakʼ ta ilel te yuʼun-nix laj ta tiʼel-a te chambalame, jich maʼyuk bin ya stoj.
14 »Teme ay machʼa ya skʼanbey ta majanel jkojt chambalam te spatxujk, pero teme ya x-ejchenaj o ya xlaj te kʼalal maba tey ay-a te yajwale, te winik te la skʼan ta majanel te chambalame yame skʼan ya stoj.
15 Pero, teme tey ay-a te yajwale, maʼyuk bin ya stoj te winike. Teme la yichʼ tojel te jayeb tiempo la yichʼ majanel te chambalame, te takʼin-abi jaʼme stojol ya xkʼot.
16 »Teme jtul winik ya sloʼlay sok ya sjokin ta wayel jtul achʼix te mato makbile, yame skʼan ya stoj te jayeb ya xkʼanbot swenta ya yikʼ yinamin.
17 Teme te stat te achʼix maba ya yakʼ te ya xnujpun soke, te winike yananixme skʼan ya stoj jaʼ chikan te jayebnanix takʼin ya yichʼ kʼanel ta swenta te achʼixetik ya xnujpunike.
18 »Mame xa awakʼ kuxajuk jtul j-akʼchamel ants.
19 »Machʼauk-a te ya skuch sba sok chambalam, yame skʼan ya yichʼ milel.
20 »Machʼauk-a te ya yakʼbey milbil majtanil yantik diosetik te ma jaʼuknax ya yakʼbey te Jehová, yame skʼan ya yichʼ milel.
21 »Mame xa awutsʼin* sok mame xa awakʼbey swokol te jyanlum, melel jyanlum kʼoex ta skʼinal Egipto.
22 »Mame xa awutsʼin* te meʼba antsetik sok te alaletik te lajem statike.
23 Teme ay la awakʼtiklanbey swokolik te jich ya skʼopononik yuʼun ya skʼanbonik koltayel, yananixme kaʼiybey-a te skʼopike.
24 Bayalme ya x-ilinon ta atojolik sok yame jmilex ta espada. Meʼba ya xjil te awinamik sok te anichʼnabike.
25 »Teme ya awakʼbey smajan takʼin jtul te machʼa ay swokol ta yolil te lum kuʼun, mame jichuk xa awil te bitʼil machʼa ya skʼan sjol stakʼin. Mame xa akʼanbey sjol.
26 »Teme jtul apatxujk ya yakʼbat jilel te snajtil kʼuʼ ta swenta te ay bin la skʼan bael ta majanele, yame skʼan ya asutbey te kʼalal mato xmal bael-a te kʼajkʼale.
27 Melel jaʼnax ay yuʼun te snajtil kʼuʼ-abi swenta ya smuk-a te sbakʼetale,* ¿binme ya smuk sba-a te kʼalal ya xbajt ta wayel? Kʼalal ya skʼanbon koltayel, yame kaʼiybey skʼop, melel ya jnaʼbeyex yoʼbolil abaik.
28 »Mame xa achopolkʼoptay te Dios sok mame xa achopolkʼoptay jtul jolal yuʼun te alumale.
29 »Mame xchebetuk awoʼtan ya awakʼ ta majtanil kʼalal bayal sit ya yakʼ te awal tsʼunubil awuʼun sok te kʼalal bayal ya xlokʼ yaʼlel te tsʼusubil awuʼun ta spitsʼojibal.* Yame skʼan ya awakʼbon te ba-alal kerem awuʼun.
30 Jichme ya skʼan ya apas ta stojol te toro sok te tuminchij awuʼun: yame skʼan ya awakʼbey sjokin smeʼ te chambalam jukeb kʼajkʼal, pero ta swaxakebal kʼajkʼal yame awakʼbon.
31 »Yame skʼan ya awakʼik ta ilel te chʼul lumex kuʼun sok mame xa aweʼik te chambalam te ya ataik ta jamalal te la yichʼ tiʼel yuʼun jtiʼawal chambalam. Yame skʼan ya awakʼbeyik stiʼ te tsʼiʼetike.
Notaetik
^ Ta yantik variante «yomtiklanbil».
^ Jaʼik te chambalametik te ma xtiʼawanik.
^ Ta yantik variante «awilbajin».
^ Ta yantik variante «awilbajin».
^ Ta hebreo: «snujkulel».
^ Jaʼ skʼoplal te yawil spitsʼojibal tsʼusub sok aceite.
