Éxodo 24:1-18
24 Ta patil, jich la yalbey te Moisés: «Moan tal te banti ay te Jehová sok ikʼa tal te Aarón, Nadab sok te Abihú sok 70 ta tul jwolwanejetik yuʼun te Israel sok namaltome* ya akejan abaik.
2 Jaʼnax te Moisés ya xjuʼ ya xnoptsaj* ta stojol te Jehová, te yantike mame skʼan ya xnoptsajik stukel soknix te lum mame skʼan ya stʼunik moel tal te Moisés».
3 Jaʼ yuʼun, te Moisés bajt yalbey yaʼiy te lum spisil te bin la yal te Jehová sok spisil te bintik schapoj. Te lum pajal jich la yalik: «Ya jchʼuunkotik spasel spisil te bin yaloj te Jehová».
4 Tey-abi, te Moisés la stsʼibay spisil te bin la yal te Jehová. Ta patil, buen sab jajch sok la spas jun skajtajib chikʼbil majtanil ta yeʼtal wits sok la spas 12 balal tonetik te jaʼ skʼoplal te 12 ta chajp stsʼumbal Israel.
5 Ta patil la stsa jchʼiel israel-winiketik te jaʼ la yakʼik chikʼbil majtaniletik sok la smilik toroetik yuʼun ya yakʼik jich bitʼil milbil majtaniletik ta stojol te Jehová ta swenta lamalkʼinal.
6 Jaʼ yuʼun, te Moisés la stsob olil te schʼichʼel te chambalametik ta tazaetik, te olilxane la stsijtsin ta skajtajib chikʼbil majtanil.
7 Tey-abi la stsak te libro yuʼun chapbilkʼop sok tulan la skʼopon ta stojol te lume. Ta patil-abi, jich la yalik: «Ya jpaskotik spisil te bin yaloj te Jehová, yame jchʼuuntik spasel».
8 Jich te Moisés la stsijtsin ta chʼichʼ te lum yuʼun Israel sok jich la yaltiklanbey: «Te chʼichʼ ini jaʼ ta swenta te chapbilkʼop te la spas te Jehová sok te jaʼex ta swenta spisil te bin la yale».
9 Te Moisés, Aarón, Nadab, Abihú sok te 70 ta tul jwolwanejetik yuʼun te Israel moik bael ta wits.
10 Tey la yilik-a te Dios yuʼun te lum Israel, ta yeʼtal yok jich yilel te bin-utʼil limbil zafiro-ton te xlemetnax jich te bin-utʼil te chʼulchan te kʼalal kʼepelnaxe.
11 Te Dios maba la yakʼbey swokol te winiketik te ichʼbilik ta mukʼ yuʼun te israeletik. La yilik ta jun najalsitil* te smelelil Dios* sok weʼ uchʼajik.
12 Te Jehová jich la yalbey te Moisés: «Moan tal ta wits te banti ayon sok jilan liʼi. Ya kakʼbat te pejchel tonetik te banti ya jtsʼibay te leyetik sok te mantaliletik swenta ya jnojptes te lume».
13 Jaʼ yuʼun, te Moisés sok te Josué, te jkoltaywanej yuʼun, la schajpan sbaik. Te Moisés mo bael ta wits yuʼun te smelelil Diose.*
14 Pero, nailto jich yalojbeyix-a te jwolwanejetike: «Maliyawotik liʼi jaʼto te kʼalal ya sujtonkotik tale. Yame sjokinex jilel te Aarón sok te Hur, jich yuʼun chikan machʼa-a te ya xjajch kʼop yuʼun te ya skʼan chajpanel yame xjuʼ ya xbajt ta stojolik».
15 Tey-abi, te Moisés mo bael ta wits te potsbil yuʼun te tokale.
16 Te yutsilal te Jehová stalel ay ta wits Sinaí sok wakeb kʼajkʼal potsot yuʼun te tokale. Ta sjukebal kʼajkʼal, te Dios la skʼopon te Moisés kʼalalto ta yolil tokal.
17 Ta sit te israeletik, te yutsilal te Jehová jich yilel te bin-utʼil kʼajkʼ ta sjol wits te ya xlajinwan.
18 Jich yuʼun, te Moisés kʼub ochel ta tokal, jich moxan bael ta wits. Ayin tey-a 40 kʼajkʼal sok 40 ajkʼabal.
Notaetik
^ Ta yantik variante «jakaltome», «kʼubultome».
^ Ta yantik variante «xjijtsʼaj», «xtijtsaj».
