Éxodo 26:1-37
26 »Yame apas te nailpakʼ templo ta lajunlijkʼ pakʼ te pasbilik ta lekil lino te tsʼotbil, hilo te azul sbonil, kuxul morado hilo te pasbil ta stsotsel tuminchij sok ta tsajal hilo, sok yame atsʼisbey slokʼomba querubinetik.
2 Te jujunlijkʼ pakʼ yame skʼan te 28 xujkʼubil* snajtil sok chaneb xujkʼubil* sjamalul. Pajalme spʼisol ta spisil.
3 Yame skʼan ya anupʼ joʼlijkʼ pakʼ yuʼun jun-nax ya xkʼot-a, jaʼnixme jich ya skʼan ya apas sok te joʼlijkʼxane.
4 Ta stiʼil te slajibal pakʼ yame apasbey xojbenal ta hilo te azul sbonile, jaʼnixme jich ya apasbey ta stiʼil te yan jlijkʼ, tey te banti ya snupʼ sba te chaʼlijkʼ pakʼe.
5 Ta jujun stiʼil te pakʼ yame apasbey 50 xojbenal te banti ya snujpʼsitay sba te chaʼlijkʼ pakʼ te jich jun-nax ya xkʼotike.
6 Yame apas 50 ganchoetik ta oro yuʼun ya anupʼ-a te chaʼlijkʼ pakʼe, jich jun-naxme ya xkʼot te nailpakʼ templo.
7 »Jaʼnix jich yame apas pakʼ ta stsotsel tentsun swenta ya amuk-a te nailpakʼ templo. Yame apas 11 ta lijkʼ.
8 Te jujunlijkʼ pakʼ yame skʼan 30 xujkʼubil* snajtil sok chaneb xujkʼubil* sjamalul. Te 11 ta lijkʼe pajalme spʼisol ya xkʼot.
9 Yame skʼan ya anupʼ joʼlijkʼ pakʼ, jaʼnixme jich ya skʼan ya apas sok te waklijkʼxane, yame apux te swakebal pakʼ te ya xbajt ta yelaw te nailpakʼ.
10 Ta jujun stiʼil te pakʼ yame apasbey 50 xojbenal te banti ya snupʼ sba te chaʼlijkʼ pakʼ te jich jun-nax ya xkʼotike.
11 Yame apas 50 ganchoetik ta cobre sok yame awakʼ ta xojbenal yuʼun ya anupʼ-a te chaʼlijkʼ pakʼe, jich jun-naxme ya xkʼot.
12 Jokʼolme ya xjil te jayebxan snajtil ya xjil te pakʼe. Te olil sobraile jokʼolme ya xjil ta spat te nailpakʼ templo.
13 Ta jujunjejch yame xjil jun xujkʼubil* snajtil te jokʼajtik ya xjil yuʼun ya smuk te nailpakʼ templo.
14 »Jaʼnix jich yame awakʼbey smujkil te nailpakʼ te pasbil ta snujkulel tat tuminchij te bonbil ta tsaj. Soknix ta sba yame awakʼbey yan smujkil te pasbil ta snujkulel foca.
15 »Yame apas marcoetik ta acacia-teʼ yuʼun te nailpakʼ templo te toj ya atejkʼanlane.
16 Te jujun marcoe yame skʼan te lajuneb xujkʼubil* snajtil sok jun sok olil xujkʼubil* sjamalul.
17 Ta jujun marco yame skʼan ya yichʼ cheb yok te pajalnax ya skʼan te banti ya yichʼ akʼtiklanele. Jichme xa apas sok spisil te yantik marcoetik yuʼun te nailpakʼ templo.
18 Yame apasbey 20 marcoetik yuʼun te nailpakʼ templo ta stojol bael sur.
19 »Jaʼnix jich yame apasbey 40 skajtajib* te pasbilik ta plata yuʼun ya awakʼ ta yeʼtal te 20 marcoetik: ta yeʼtal te jun marco yame awakʼbey cheb skajtajib te banti ya yichʼ otsesel te cheb yoke, jichme ya skʼan ya apas sok te yantik marcoetik.
20 Yame apasbey 20 marcoetik ta yan jejch yuʼun te nailpakʼ templo ta stojol bael norte.
21 Jaʼnix jich yame apasbey 40 skajtajib* te pasbil ta plata: ta yeʼtal te jun marco yame awakʼbey cheb skajtajib, jichme ya skʼan ya apas sok te yantik marcoetik.
22 Ta spat te nailpakʼ templo te banti ya xmal te kʼajkʼale yame skʼan ya apasbey wakeb marcoetik.
23 Jaʼnix jich yame skʼan ya apasbey cheb marcoetik yuʼun jaʼ ya xkʼot ta jujunxujk ta spat te nailpakʼ temploe.
24 Yame skʼan ya yichʼ akʼbeyel cheb steʼel te ya snupʼ sba ta stoyolil te banti ya x-och te sbabial schʼokowile. Jichme ya yichʼ pasel sok te cheb marcoetik, te ya xkʼot ta jujunxujk te cheb marcoetik-abi.
25 Ayme waxakeb marcoetik sok 16 skajtajib* te pasbilik ta plata: ta yeʼtal te jun marco yame awakʼbey cheb skajtajib, jichme ya skʼan ya apas sok te yantik marcoetik.
26 »Yame apas joʼchʼix skʼatal teʼel ta acacia-teʼ yuʼun ya anupʼ te marcoetik te ay ta jejch yuʼun te nailpakʼ templo,
27 joʼchʼix skʼatal teʼel yuʼun ya anupʼ te marcoetik te ay ta yan jejch yuʼun te nailpakʼ templo. Jaʼnix jich joʼchʼix skʼatal teʼel yuʼun ya anupʼ te marcoetik te ay ta spat te nailpakʼ templo te banti ya xmal te kʼajkʼale.
28 Te skʼatal teʼel te ya xkʼax ta yolil te marcoetike yame xkʼot ta lokʼel ta jujun stiʼil.
29 »Yame apots ta oro te marcoetik sok yame apasbey schʼokowil ta oro te banti ya xkʼax te skʼatal teʼel. Jaʼnix jich yame apots ta oro te skʼatal teʼele.
30 Yame skʼan ya apas te nailpakʼ templo jich te bitʼil la awichʼ akʼbeyel awil ta wits.
31 »Yame apas jlijkʼ cortina ta hilo te azul sbonil, kuxul morado hilo te pasbil ta stsotsel tuminchij, tsajal hilo sok ta lekil lino te tsʼotbile. Teyme ya atsʼisbey slokʼomba querubinetik-a.
32 Yame ajojkʼan ta chaneb oyetik te pasbilik ta acacia-teʼ te potsbilik ta oro. Te ganchoetik te ya yichʼik tuuntesele pasbilik ta oro. Te oyetik yame yichʼik kajanel ta chaneb skajtajib* te pasbilik ta plata.
33 Yame ajojkʼan te cortina ta ganchoetik. Yame awichʼ ochel ta yutil cortina te skaxaul Testigo Kʼop. Te cortina jaʼme ya xat te Chʼul Awilal sok te Mero chʼul awilal.
34 Yame awakʼbey te smajkil te skaxaul Testigo Kʼop te ya x-ayin ta Mero chʼul awilal.
35 »Ta yan sjejchelul te cortina yame awakʼ te mesa. Tey ta yelaw te mesa yame awakʼ te skajtajib kʼajkʼ. Te mesa yame yichʼ akʼel ta stojol bael norte, yan te skajtajib kʼajkʼ yame yichʼ akʼel ta stojol bael sur.
36 Ta swenta te yochibal te nailpakʼ yame apasbey jlijkʼ scortinaul te jalbil ta hilo te azul sbonil, kuxul morado hilo te pasbil ta stsotsel tuminchij, tsajal hilo sok ta lekil lino te tsʼotbile.
37 Ta swenta te cortinae yame apasbey joʼeb yoyal ta acacia-teʼ te potsbilik ta oro. Yame apasbey ganchoetik ta oro sok joʼeb skajtajib* te pasbilik ta ultesbil cobre.
Notaetik
^ Jaʼ 12.46 metro. Ilawil ta apéndice, B14.
^ Jaʼ 1.78 metro.
^ Jaʼ 13.35 metro. Ilawil ta apéndice, B14.
^ Jaʼ 1.78 metro.
^ Jaʼ 44.5 centímetro. Ilawil ta apéndice, B14.
^ Jaʼ 4.45 metro. Ilawil ta apéndice, B14.
^ Jaʼ 66.75 centímetro.
^ O «skajtajib te jutul yolil».
^ O «skajtajib te jutul yolil».
^ O «skajtajib te jutul yolil».
^ O «skajtajib te jutul yolil».
^ O «skajtajib te jutul yolil».
