Éxodo 31:1-18
31 Jaʼ yuʼun, te Jehová jich la yalbey te Moisés:
2 «Ilawil, la jtsa te Bezalel, snichʼan Urí, snichʼan Hur, te talem ta stsʼumbal Judá.
3 Ya jnojesbey ta yoʼtan te espíritu kuʼun swenta ay spʼijil yoʼtan, te ya yichʼbey swentail sok te yakuk snaʼ ta lek spasel spisil ta chajp aʼtelil
4 yuʼun jich ya xjuʼ ya spas te bintik tʼujbilik ta ilel, te ya x-aʼtej sok oro, plata sok cobre,
5 te ya sboj sok ya yakʼ ta yawil te tonetik soknix yuʼun ya spas spisil ta chajp biluketik ta teʼ.
6 La jtsa te Oholiab te snichʼan te Ahisamac, te talem ta stsʼumbal Dan, swenta ya xkoltayot yuʼun. Jaʼnix jich ya kakʼbey spʼijil yoʼtanik spisil te machʼatik ya snaʼik ta lek aʼtel swenta ya spasik spisil te bin la kalbat ta mantale:
7 te nailpakʼ ta swenta tsoblej, te skaxaul Testigo Kʼop sok te smajkil, spisil te bintik ya xtuun ta nailpakʼ,
8 te mesa sok spisil te bintik ya xtuun yuʼun, te skajtajib kʼajkʼ te pasbil ta batsʼil oro sok spisil te bintik ya xtuun yuʼun, te skajtajib schikʼojibal pom,
9 te skajtajib chikʼbil majtanil sok spisil te bintik ya xtuun yuʼun, te yawil jaʼ sok te skajtajib,
10 te kʼuʼuletik te leknax jalbilik, te chʼul kʼuʼuletik yuʼun te sacerdote Aarón sok te kʼuʼuletik yuʼun te snichʼnab swenta ya x-abatinik ta sacerdoteetik,
11 te aceite te ay machʼa ya yichʼ malel ta sjol sok te pom te sumetnax* yikʼ ta swenta te chʼul awilal. Yame spasik spisil te bin la kalbat ta mantale».
12 Jaʼnix jich, te Jehová jich la yalbey te Moisés:
13 «Kʼopona te israeletik sok jich xa awaltiklanbey: ‹Mukʼ skʼoplal te ya awichʼik ta mukʼ te sábado kuʼun, melel jaʼ señail ya xkʼot ta atojolik sok ta jtojol ta kajalkaj atsʼumbalik, swenta ya anaʼik te joʼon Jehovaon te yak jchʼultesbelex.
14 Yame skʼan ya awichʼik ta mukʼ te sábado, melel chʼultesbil ya xkʼot awuʼunik. Machʼauk-a te ya sbolobtesbey skʼoplal, yame skʼan ya yichʼ milel. Teme ay machʼa ya spas biluk aʼtelil ta kʼajkʼal-abi, yame yichʼ milel.
15 Ya xjuʼ ya x-aʼtejex wakeb kʼajkʼal, pero ta sjukebal kʼajkʼal te jaʼ jun sábado ya skʼan ya akux awoʼtanik, melel chʼultesbil yuʼun te Jehová. Teme ay machʼa ya x-aʼtej ta sábado, yame skʼan ya yichʼ milel.
16 Yame skʼan ya yichʼik ta mukʼ te sábado te israeletike. Yame skʼan ya spasik kʼin ta sábado ta kajalkaj stsʼumbalik. Jaʼ ini jaʼ jun chapbilkʼop te ma xlaj skʼoplal.
17 Jaʼ jun señail te ma xlaj skʼoplal ta stojol te lum Israel sok ta jtojol, melel joʼon Jehovaon te la jpas te chʼulchan sok te balumilal ta wakeb kʼajkʼal, pero ta sjukebal kʼajkʼal maba aʼtejonix-a, la jkux koʼtan›».
18 Te kʼalal lajnax yoʼtan ta kʼop* sok te Moisés ta wits Sinaí, la yakʼbey te chaʼpejch tonetik yuʼun te Testigo Kʼop, te jaʼik te chaʼpejch tonetik te la stsʼibay ta yal skʼab te Diose.
