Éxodo 32:1-35
32 Kʼalal te lum Israel la yil te ma xko tal ta ora ta wits te Moisés, la stsob sbaik tal spisilik ta stojol te Aarón sok jich la yalbeyik: «¡Jajchan! Pasbonkotik jun dios te ya xnailaj bael ta jtojoltik, melel ma jnaʼtik te bin la spas te Moisés te machʼa la slokʼesotik tal ta skʼinal Egipto».
2 Ta swenta-abi, te Aarón jich la yaltiklanbey: «Tsobaik tal te stakʼin schikinik te pasbilik ta oro yuʼun te awinamik, anichʼnabik sok te awantsil anichʼnabik, sok ichʼbonik tal».
3 Tey-abi la slokʼesik ta spisilik te stakʼin schikinik te pasbilik ta oro, jich la yichʼbeyik bael te Aarón.
4 La stsak te oro, ta swenta jun cincel jajch spasbey slokʼomba jkojt jkolel* toro. Jich jajch yalik: «Israel, jaʼme te adiosik ini. Jaʼme te machʼa la slokʼesex tal ta skʼinal Egipto».
5 Kʼalal jich la yil te Aarón, la spas skajtajib chikʼbil majtanil ta stojol te jkolel* toro. Ta patil, jich tulan la yal ta aw: «Te pajele yame jpastik kʼin ta stojol te Jehová».
6 Jich yuʼun, ta yan kʼajkʼal sab jajchik sok jajch yakʼik chikʼbil majtaniletik sok milbil majtaniletik ta swenta lamalkʼinal. Te ants winiketik yuʼun te lume la snajkan sbaik ta weʼel uchʼel, patil jajchik ta spasel kʼin.
7 Te Jehová jich la yalbey te Moisés: «Baan, koan bael, melel bolob yoʼtan te lum awuʼun te la alokʼes tal ta skʼinal Egipto.
8 ¡Oranax la yijkitayik te be te la kaltiklanbey ta mantal te ya stʼunike! La spasbeyik slokʼomba jkolel* toro, yakik ta snijanel sbaik ta stojol, yakik ta yakʼbeyel chikʼbil majtaniletik sok jich yakik ta yalel: ‹Israel, jaʼme te adiosik ini. Jaʼme te machʼa la slokʼesex tal ta skʼinal Egipto›».
9 Jaʼnix jich, te Jehová jich la yalbey te Moisés: «La kilix te mero tulan yoʼtan te lum ini.
10 Akʼbon jlajinlan, melel jajchem kilinba ta stojolik, yan te jaʼate ya kakʼ te mukʼul nación ya xkʼoat».
11 Jaʼ yuʼun, te Moisés jich la slamantesbey yoʼtan te Jehová te Dios yuʼun: «Kajwal Jehová, ¿bin yuʼun te ya alokʼes te awilinba ta stojol te lum awuʼun te la alokʼes tal ta skʼinal Egipto ta swenta smukʼul awuʼel sok yip akʼab?
12 Teme jich ya apase, te egipcioetik jich ya yalik: ‹Ay bin ma lek la snop ta stojolik te Dios yuʼunik. Ta swenta-abi la slokʼeslan bael yuʼun ya slajinlan ta witsetik sok te ya slajin ta jkʼaxel ta kʼinal›. Ijkitaya te awilinba sok nopa teme yananix awakʼbey swokol-a te lum awuʼune.
13 Julukme ta awoʼtan te Abrahán, Isaac sok te Israel te jaʼik te j-abatetik awuʼun. Jaʼat jich la awaltiklanbey ta jamal ta awenta: ‹Ya kakʼ te ya xpʼol te atsʼumbalik jich te bin-utʼil te ekʼetik ta chʼulchan sok ya kakʼbey te atsʼumbalik spamal te kʼinal ini te jtsaoje, swenta jaʼ yuʼunik ya xkʼot ta spisil-ora›».
14 Te Jehová la snop teme yananix yakʼbey swokol-a te lum yuʼun te bitʼilnix yalojix-ae.
15 Tey-abi, te Moisés sujt koel ta wits sok stsakoj tal te chaʼpejch tonetik yuʼun te Testigo Kʼop. Te tonetik tsʼibaybil ta schaʼjejchel: ta yelaw sok ta spat.
16 Te pejchel tonetik jaʼ yaʼtel te Diose, te bin tsʼibaybil tey-a jaʼnix la stsʼibay ochel te Diose.
17 Te Josué la yaʼiy te xchʼinchʼoniknax sok te yakik ta aw te lume, jich la yalbey te Moisés: «Jich yaʼiyel te ayik ta guerra te campamentoe».
18 Pero, te Moisés jich la yal:
«Ma jaʼuk kʼayojiletik ta swenta tsalawni jaʼuk ta swenta mel-oʼtan yuʼun te la yichʼik tsalel.Yan swentail te kʼayojiletik te ya kaʼiy stojole».
19 Kʼalalnax kʼot te Moisés ta campamento sok te la yil te jkolel* toro sok te yakik ta ajkʼote, mero ilin yuʼun. La schʼoj koel te chaʼpejch tonetik te ay ta skʼab, wuy ta jkʼaxel ta yeʼtal wits.
20 Tey-abi la stsak te jkolel* toro te spasojike, la schʼoj ochel ta kʼajkʼ sok la swuy jaʼto kʼalal tanub. Ta patil la sbujkʼiy ochel ta jaʼ sok la yakʼtiklanbey yuchʼik te israeletike.
21 Jaʼ yuʼun, te Moisés jich la yalbey te Aarón: «¿Bin la spasbat te lum ini yuʼun la awakʼbey staik tulan mulil?».
22 Te Aarón jich la yal: «Kajwal, ma x-ilinat. Anaʼoj ta lek te kʼayemik ta spasel te bin chopol* te lum ini.
23 Jich la yalbonik: ‹Pasbonkotik jun dios te ya xnailaj bael ta jtojoltik, melel ma jnaʼtik te bin la spas te Moisés te machʼa la slokʼesotik tal ta skʼinal Egipto›.
24 Jaʼ yuʼun, jich la kal: ‹Machʼauk-a te ay bin slapoj te pasbil ta oro, akʼa slokʼes sok akʼa yichʼbon tal›. Ta patil la jchʼoj ochel ta kʼajkʼ te oro, jich lokʼ tal te jkolel* toro ini».
25 Te Moisés la yil te maba ya skom sbaik te lume, melel maba komotik yuʼun te Aarón, jich pʼajotik yuʼun te skontratakike.
26 Tey-abi, te Moisés la yakʼ sba ta yochibal te campamento sok jich la yal: «¿Machʼa ay ta stojol te Jehová? ¡Akʼa talukik ta jtojol!». Spisil te levitaetik talik ta stojol.
27 Ta patil, jich la yal: «Jich la yal te Jehová te Dios yuʼun Israel: ‹Akʼa stsak te yespada ta jujuntul sok akʼa kʼaxuk bael ta spisil te campamento ta smilel te yermano, spatxujk sok te yamigo›».
28 Jich la spasik te levitaetik te bitʼil la yal te Moisés, ta kʼajkʼal-abi ayniwan 3 mil ta tul winiketik te la yichʼik milele.
29 Ta patil, jich la yal ta mantal te Moisés: «Chʼultesa abaik yoʼtik yuʼun ya x-abatinex ta stojol te Jehová, melel ta apisilik te jaʼexe la akontrainik te awal anichʼnabik sok te awermanotakik. Ta swenta-abi yame yakʼbeyex bendición yoʼtik».
30 Ta yan kʼajkʼal, te Moisés jich la yalbey te lume: «Te jaʼexe tulan mulil la ataik. Jaʼ yuʼun, ta ora ini ya xmoon bael ta wits ta skʼoponel te Jehová yuʼun ya kil teme ay bin ya xjuʼ ya jpas swenta ya spasbeyex perdón yuʼun te amulike».
31 Tey-abi chaʼmo bael te Moisés sok jich la yalbey te Jehová: «¡Kʼax tulan te mulil la spasik te lum ini! ¡La spas sdiosik ta oro!
32 Pero, teme ya akʼane, pasbeya perdón yuʼun te smulike. Teme maʼuke, awokoluk, tupʼa te jbiil ta libro te la atsʼibaye».
33 Pero, te Jehová jich la yalbey te Moisés: «Jaʼ ya jtupʼbey sbiil ta libro kuʼun te machʼa la sta smul ta jtojole.
34 Baanme jiche, ikʼa bael te lum te banti kalojbate. Ilawil, te chʼul-abat kuʼun ya xnailaj bael ta atojol. Te bin kʼajkʼalil ya kichʼtiklan ta kʼop yame kakʼtiklanbey castigo yuʼun te smulike».
35 Te Jehová jajch yakʼtiklanbey castigo te lum ta swenta te jkolel* toro te la yakʼbeyik spas te Aarone.
Notaetik
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «ma lek».
^ Ta yantik variante «jchʼiel».
^ Ta yantik variante «jchʼiel».
