Éxodo 33:1-23
33 Te Jehová jaʼnix jich la yalbey te Moisés: «Beenanxan bael sok te lum te la alokʼes tal ta skʼinal Egipto. Baan ta kʼinal te jich jamal la kalbey te Abrahán, Isaac sok te Jacob: ‹Ya kakʼbey te atsʼumbale›.
2 Ya jtikun tal jtul chʼul-abat te ya xnailaj ta atojol sok ya jtentiklan lokʼel te cananeoetik, amorreoetik, hititaetik, perizitaetik, heveoetik sok te jebuseoetik.
3 Baan ta lekil kʼinal te banti ya yakʼ bayal leche sok chab. Pero maba ya jokinex bael, melel te jaʼexe tulanuben awoʼtanik te jich ya xjuʼ ya jlajinex ta be».
4 Kʼalal la yaʼiyik stojol te tulan kʼoponotike, la smel yoʼtanik yuʼun te jich maʼyuk machʼa la schʼalix sbaik yuʼun-a.
5 Te Jehová jich la yalbey te Moisés: «Albeya yaʼiy te israeletik ini: ‹Te jaʼexe mero tulanuben awoʼtanik. Te yakuk xkʼaxon jtsʼinuk ta awolilik ya xjuʼ ya jlajinex te jichuke. Te bitʼil yakonto ta snopel te bin ya jpas ta atojolike, mame xa achʼal abaik›».
6 Jaʼ yuʼun, te israeletik la slokʼesik te schʼalilik ta wits Horeb sok maba la schʼalix sbaik.
7 Jaʼ yuʼun, te Moisés la slokʼes bael te nailpakʼ yuʼun te ay ta campamento, namal* bajt yakʼ jtebuk sok la yakʼbey sbiilin nailpakʼ ta swenta tsoblej. Spisil te machʼatik ay bin ya skʼan ya sjojkʼoybeyik te Jehová, ya xbajtik tey ta nailpakʼ ta swenta tsoblej te ay ta slokʼibal te campamentoe.
8 Ta jujun buelta te ya xlokʼ bael te Moisés ta nailpakʼ, spisil te lum ya xlokʼ yilik. Spisil ya stejkʼan sbaik ta stiʼ snailpakʼik sok ya stʼojan sitik ta stojol te Moisés jaʼto te kʼalal ya x-och bael ta nailpakʼ.
9 Te kʼalalnax ya x-och bael te Moisés, ya xko tal te balal tokal sok ya yakʼ sba ta yochibal te nailpakʼ kʼalal te Dios ya xkʼopoj sok te Moisés.
10 Kʼalal te israeletik ya yilik te balal tokal ta yochibal te nailpakʼ, ya snijan sbaik ta spisilik ta stiʼ snailpakʼik.
11 Kʼalal te Moisés ya xkʼoponot yuʼun te Jehová, ya yilbey sba sitik jich te bin-utʼil chaʼtul winiketik ya skʼopon sbaik. Kʼalal te Moisés ya sujt bael ta campamento, tey ya xjil stukel ta nailpakʼ ta swenta tsoblej te Josué te snichʼan Nun te jaʼ jkoltaywanej sok j-abat yuʼun.
12 Te Moisés jich la yalbey te Jehová: «Yak awalbelon ‹Tojobtesa bael te lum ini›. Pero maba awalojbon te machʼa ya awakʼ sjokinon baele. Jaʼnix jich awalojbon ‹Ya jnaʼbat aba ta swenta abiil* sok lek kilojat›.
13 Teme lek ya awilone, awokoluk, akʼbon kil te beetik awuʼun swenta ya jnaʼbat aba sok swenta lekxan ya awilon. Mame xchʼay ta awoʼtan te jaʼ lum awuʼun te nación ini».
14 Jich albot yuʼun: «Joʼon-nix ya jokinat bael sok ya kakʼ te ya akux awoʼtan».
15 Jaʼ yuʼun, te Moisés jich la yal: «Teme ma jaʼukatnix ya ajokinotik bael, mame xa alokʼesonkotik bael liʼi.
16 ¿Bin-utʼil ya yichʼ naʼel te lek ya awil te lum awuʼun soknix-euk te joʼone? Teme ya ajokinotik baele, te lum awuʼun sok te joʼon ma pajal ya xkʼootik sok te yantik lumetik te ayik ta balumilal».
17 Te Jehová jich la yalbey te Moisés: «Jaʼnix jich ya jpas te bin yak akʼanbelone, melel lek kilojat sok ya jnaʼbat aba ta swenta abiil».*
18 Te Moisés jich la yal: «Awokoluk, akʼbon kil te awutsilal».
19 Jich albot yuʼun: «Ya kakʼ te ya xkʼax ta asit spisil te yutsil koʼtan sok ya kal ta atojol te jaʼ Jehová te jbiile. Ya jkʼuxultay te machʼa ya jkʼan ya jkʼuxultay sok ya jnaʼbey yoʼbolil sba te machʼa ya jkʼan ya jnaʼbey yoʼbolil sba».
20 Pero, jich la yalxan: «Ma xjuʼ ya awilbon te jsit kelaw, melel maʼyuk jtuluk ants winik ya xjuʼ ya yilon te kuxul ya xjile».
21 Jaʼnix jich, te Jehová jich la yalbey: «Ay jun lugar te banti nopol* ayone. Tejkʼana aba ta sba te mukʼul tone,
22 te kʼalal yak ta kʼaxel bael te kutsilale, ya kakʼat ochel te banti jatem te mukʼul ton sok ya jmakat ta jkʼab jaʼto te kʼalal ya xkʼaxon baele.
23 Ta patil ya jlokʼes te jkʼab jich ya awilbon te jpat. Pero te sit kelaw ma xjuʼ ya awilbon stukel».
Notaetik
^ Ta yantik variante «jakal», «kʼubul».
^ O «Jtsaojat».
^ O «jtsaojat».
^ Ta yantik variante «tijil».
