Éxodo 34:1-35
34 Ta patil, te Jehová jich la yalbey te Moisés: «Pasa chaʼpejch tonetik jich te bin-utʼil la apas ta nailal. Jaʼnix ya jtsʼibay tey-a te bin la jtsʼibay ta sbabial tonetik te la awuytiklane.
2 Chajpana aba te sab pajel yuʼun ya xmoat bael ta wits Sinaí sok yuʼun ya atejkʼan aba ta jtojol ta sba te witse.
3 Mame ayuk machʼa ya sjokinat moel sok mame skʼan te ayuk machʼa ay ta sba te witse. Ni jaʼuk tuminchijetik sok wakaxetik te yakik ta sweʼel ak tey-ae».
4 Jaʼ yuʼun, te Moisés la spas chaʼpejch tonetik jich te bitʼil ta nailal. Buen sabto jajch ta yan kʼajkʼal sok mo bael ta wits Sinaí, jich te bitʼil albot ta mantal yuʼun te Jehová. Stsakoj moel te chaʼpejch tonetik.
5 Tey-abi, te Jehová ko tal ta tokal sok tey la yakʼ sba te banti ay te Moisés. Jich te Jehová la yalbey skʼoplal te sbiile.
6 Te Jehová kʼax bael ta stojol te Moisés sok jich la yal: «Jehová, Jehová, jaʼ jun Dios te ya snaʼbey yoʼbolil sba te yantik, te ay yutsil yoʼtan, te ma x-ilin ta ora, te ya yakʼ ta ilel kʼuxul oʼtanil te ma x-ijkitaywan sok te smelelil ya xkʼopoj,*
7 te ya yakʼbey yil skʼuxul yoʼtan te ma x-ijkitaywan bayal ta mil, te ya spasbey perdón te machʼa ay bin ma lek ya spas, te jkʼaxunkʼop sok te machʼa ya spas mulil, pero yananix yakʼbey castigo-a te machʼa ay smul sok ta swenta te smul te meʼil tatil yame xkʼot castigo ta stojol te yal snichʼnab, smamatak* soknix te yoxkajal sok schankajal stsʼumbal».
8 Ta oranax, te Moisés la skejan sba sok la snijan sba.
9 Jich la yal: «Jehová, teme lek ya awilon, jokinawonkotik. Awokoluk, Jehová, jokinawotik manchukme tulan koʼtankotik. Pasa perdón yuʼun te bin ma lek jpasojtik sok te jmultik. Ikʼawotik yuʼun jaʼ awuʼun ya xkʼoonkotik».
10 Jich albot yuʼun: «Ya jpas jun chapbilkʼop ta atojolik: ay bintik ya jpas te jelawen yutsil ta stojol te lume, jaʼ te bintik maʼyuk bin-ora jich kʼoem ta pasel ta swolol balumilal o ta yolil te nacionetik, ta spisil te lumetik te ayik te banti ya xkʼoex ta nainel yame yilik yaʼtel skʼab te Jehová, melel ay bintik chajpnax ya jpas ta atojolik.
11 »Chʼama awaʼiy ta lek spisil te mantaliletik te ya kakʼbat yoʼtik. Yame jten lokʼel te amorreoetik, cananeoetik, hititaetik, perizitaetik, heveoetik sok te jebuseoetik.
12 Tsajtayame* aba te manchuk ya achap akʼop sok te ants winiketik ta kʼinal te banti ya xkʼoat yuʼun ma jichuk ya xkʼot te bin-utʼil pejtsʼ ta atojol.
13 Te bin ya skʼan ya apasik, jaʼ te ya ajinik te skajtajib chikʼbil majtaniletik yuʼunik, ya skʼan ya alajinik te balal tonetik te ya yichʼik ta mukʼ sok ya abojik te chʼul teʼetik yuʼun Aserá.*
14 Mame xa anijan aba ta stojol yan dios, melel te Jehová naʼbil sba jich bitʼil te machʼa jaʼnax ya skʼan ichʼel ta mukʼ.* Jich, jaʼ jun Dios te jaʼnax ya skʼan ichʼel ta mukʼ.
15 Tsajtayame* aba te manchuk ya achap akʼop sok te ants winiketik ta kʼinal-abi, melel te kʼalal ya yakʼ sbaik ta antsinel sok te sdiosik sok te ya yakʼbeyik milbil majtaniletik, ay machʼa ya yikʼex sok ya aweʼbeyik te milbil majtanil yuʼunike.
16 Ta patil ya awakʼ nujpunuk te anichʼnabik sok te yantsil nichʼnabik, kʼalal ya yakʼ sbaik ta antsinel kʼoem te yantsil nichʼnabik ta yichʼel ta mukʼ te sdiosik, jichme ya yakʼik te ya yaʼiy antsiwej kʼoem te anichʼnabik kʼalal ya yichʼik ta mukʼ te sdiosik te antsetike.
17 »Mame xa apas diosetik ta ultesbil takʼin.
18 »Yame skʼan ya apas te Kʼin yuʼun pan te maba yichʼoj levadura. Jukebme kʼajkʼal ya aweʼ te panetik te maba yichʼoj levadura jich te bitʼil la kalbat ta mantal, jaʼ te bin kʼajkʼalil albil skʼoplal ta u yuʼun abib,* melel jaʼ yorail te lokʼat tal ta Egipto.
19 »Spisil te ba-alal keremetik* jaʼme kuʼun ya xkʼotik. Jaʼnix jich kuʼunme ya xkʼot te sba yalatak te chambalametik te jaʼ statik, te jaʼ yal te wakax sok te tuminchij.
20 Ta swenta te sba yal te burroe yame skʼan ya ajel ta jkojt tuminchij yuʼun ya akoltay-a. Teme maba ya ajeltaye, yame skʼan ya awakʼbey* snukʼ. Jaʼnix jich yame skʼan ya awakʼbey sjelol spisil te ba-alaletik awuʼun yuʼun ya xkolik. Mame ayuk machʼa jochol skʼab ya xtal ta jtojol.
21 »Wakebme kʼajkʼal ya x-aʼtejat, pero ta sjukebal kʼajkʼal yame akux awoʼtan, jaʼnix jich ta yorail te jokʼlum sok te stsobel te sit awal tsʼunubil.
22 »Yame skʼan ya apas te Kʼin yuʼun Semanaetik te kʼalal ya awakʼ sba sit te trigo te la atsobe. Jaʼnix jich yame apas te Kʼin yuʼun stsobeyel sit awal tsʼunubil* ta slajibal jaʼbil.
23 »Spisil te winiketik ya skʼan ya stejkʼan sbaik oxeb buelta ta jun jaʼbil ta stojol te Kajwaltik, Jehová, te Dios yuʼun Israel.
24 Melel ya jtentiklan lokʼel te nacionetik sok ya jmukʼubtes te akʼinale. Maʼyuk machʼa ya xtal yuʼuninbat akʼinal te kʼalal ya xmoat bael oxeb buelta ta jun jaʼbil ta yilbeyel sit yelaw te Jehová te Dios awuʼun.
25 »Mame xa awakʼbon te chʼichʼ yuʼun milbil majtanil te kapal sok te bintik yichʼoj levadura. Te milbil majtanil ta swenta Kʼin yuʼun Pascua, mame skʼan ya yichʼ kʼejel jaʼto ta yan kʼajkʼal.
26 »Yame awichʼ tal ta sna Jehová te Dios awuʼun te sba sit te awal tsʼunubil awuʼun te lekikxane.
»Mame xa apay te alal tentsun ta yaʼlel schuʼ te smeʼe».
27 Te Jehová jich la yalbeyxan te Moisés: «Tsʼibaya te kʼopetik ini, melel yakon ta spasel jun chapbilkʼop ta atojol sok ta stojol te Israel ta swenta te bin la kalixe».
28 Tey jil-a te Moisés sok te Jehová 40 kʼajkʼal sok 40 ajkʼabal. Maba weʼ sok maba la yuchʼ jaʼ. Te Dios la stsʼibay ta pejchel tonetik te kʼopetik yuʼun te chapbilkʼop te jaʼ te Lajuneb Mantaliletik.*
29 Tey-abi, te Moisés ko ta wits Sinaí sok stsakoj tal te chaʼpejch tonetik yuʼun te Testigo Kʼop. Ta swenta te kʼopoj sok te Diose, ya yakʼ xojobil te sit yelaw, pero maba ya snaʼ stukel.
30 Kʼalal te Aarón sok spisil te israeletik la yilik te Moisés, la yilik te ya yakʼ xojobil te sit yelawe. Jich yuʼun la xiʼik te ya xnoptsajik* ta stojole.
31 Pero, te Moisés la yikʼtiklan ta stojol, jich te Aarón sok spisil te jolaletik yuʼun te lum noptsajik* bael ta stojol. Ta patil kʼoponotik yuʼun te Moisés.
32 Tey-abi noptsajik* ta stojol spisil te israeletik, jich te Moisés la yakʼtiklanbey snaʼ spisil te mantaliletik yuʼun te Jehová te akʼbot ta wits Sinaí.
33 Kʼalal te Moisés ya xlaj yoʼtan ta kʼop, ya smuk ta pakʼ te sit yelawe.
34 Pero, kʼalal te Moisés ya stejkʼan sba ta stojol te Jehová yuʼun ya xkʼopoj sok, ya slokʼes te pakʼ jaʼto te kʼalal ya xlokʼ tale. Te kʼalal ya xlokʼe, ya yalbey yaʼiy te israeletik te mantaliletik te la yichʼ albeyele.
35 Te israeletik ya yilik te ya yakʼ xojobil te sit yelaw te Moisés. Jich yuʼun, te Moisés ya schaʼmuk ta pakʼ te sit yelaw jaʼto ya slokʼes-a te kʼalal ya xchaʼbajt ta kʼop* sok te Diose.
Notaetik
^ O «stalel jun yoʼtan».
^ Ta yantik variante «yil-altak».
^ Ta yantik variante «Ilame».
^ O «te ma skʼan te ay machʼa ya stsal sba sok».
^ Ta yantik variante «Ilame».
^ Ilawil ta apéndice, B15.
^ Ta hebreo: «spisil te bin ya sjam te yawil alajel».
^ Ta yantik variante «akʼasbey».
^ Jaʼnix jich naʼbil sba bitʼil Kʼin yuʼun axibal naetik.
^ Ta hebreo: «te lajuneb kʼopetik». Te jaʼnix jich naʼbil sba bitʼil Decálogo.
^ Ta yantik variante «xjijtsʼajik», «xtijtsajik».
^ Ta yantik variante «jijtsʼajik», «tijtsajik».
^ Ta yantik variante «jijtsʼajik», «tijtsajik».
^ Ta yantik variante «aʼiyej».
