Éxodo 37:1-29
37 Ta patil, te Bezalel la spas te Kaxa ta acacia-teʼ te cheb sok olil xujkʼubil* snajtil, jun sok olil xujkʼubil* sjamalul sok jun sok olil xujkʼubil stoyolil.
2 La spots ta batsʼil oro ta yutil sok ta spatpat. Jaʼnix jich la spasbey stiʼil ta oro ta sjoyobal.
3 Ta patil la spasbey chaneb schʼokowil ta ultesbil oro yuʼun ya yakʼ ta sba ta jujun yok: cheʼcheb schʼokowil ta jujunjejch.
4 Tey-abi la spas ta acacia-teʼ te steʼelul sok la spotstiklan ta oro.
5 La xojtiklan ochel te teʼetik ta chʼokowiletik te ayik ta jujunjejch yuʼun te Kaxa swenta ya xjuʼ ya yichʼ kʼechel bael.
6 Jaʼnix la spasbey smajkil ta batsʼil oro te cheb sok olil xujkʼubil* snajtil sok jun sok olil xujkʼubil* sjamalul.
7 La spas cheb querubinetik ta oro. Tenbil ta martillo la spas sok la yakʼ ta schaʼjejchel te smajkil te Kaxae.
8 Te jun querubín la yakʼ ta jun jejch, te yane la yakʼ ta yan jejch. La spas te querubinetik sok la yakʼ ta schaʼjejchel te smajkil te Kaxae.
9 Te querubinetik slichʼojik moel te xikʼik te jich ya yaxintesik koel te smajkil te Kaxae. Sitintayoj sbaik sok yilojik koel te majkilale.
10 Ta patil la spas te mesa ta acacia-teʼ te cheb xujkʼubil* snajtil, te jun xujkʼubil* sjamalul sok te jun sok olil xujkʼubil* stoyolil.
11 La spots ta batsʼil oro sok la spasbey stiʼil ta oro ta sjoyobal.
12 Jaʼnix jich ay bin la yakʼbey ta sjoyobal te mesa chaneb yal kʼabal* sjamalul sok ta sjoyobal la yakʼbey oro.
13 La spasbey chaneb schʼokowil ta ultesbil oro sok la yakʼbey ta schanxujkul te banti ay te jujun yoke.
14 La yichʼ akʼel te chʼokowiletik ta nopol* yeʼtal te bin ay ta sjoyobal te mesae sok tey ya yichʼ xojtiklanel ochel te teʼetik yuʼun ya yichʼ kʼechel bael.
15 Swenta ya yichʼ kʼechel bael te mesae la spasbey steʼelul ta acacia-teʼ sok la spotstiklan ta oro.
16 Jaʼnix jich la spas ta batsʼil oro te bintik ya xtuun ta sba mesa: platoetik, copaetik, jarraetik sok tazaetik swenta ya yichʼ akʼel malbil majtaniletik.
17 Ta patil la spas skajtajib kʼajkʼ ta batsʼil oro te tenbil ta martillo, jun-nax la spas ta spisil. La spasbey snaktajib, jchʼix yolil steʼel, skʼabkʼab, spatnich, swolnich sok snichimal.
18 Ta yolil steʼel lokʼ wakeb skʼab te ox-oxeb ta jujunjejch.
19 Ta jujun skʼab te ay ta jujunjejch ay oxeb spatnich te jich yilel te bin-utʼil snich te almendro-teʼ, te swolnich sok te snichimal, jich ta jich la yichʼ pasel bael ta jujun skʼab. Jich la yichʼ pasel ta swakebal skʼab te ya xlokʼ tal ta yolil steʼel te skajtajib kʼajkʼ.
20 Te steʼel te ay ta yolil te skajtajib kʼajkʼ ay chaneb spatnich te jich yilel te bin-utʼil snich te almendro-teʼ, te swolnich sok te snichimal, jich ta jich la yichʼ pasel bael ta schʼixil.
21 Ay swolnich ta yeʼtal te sbabial cheb skʼab te ya xlokʼ ta steʼel te ay ta yolil, jaʼnix jich ay swolnich ta yeʼtal te schebal sok ta yoxebal te banti ya xlokʼ te cheb skʼabe. Jich te bitʼil ya xlokʼ te wakeb skʼab ta yolil te steʼele.
22 Te swolnich, te skʼabkʼab sok spisil te skajtajib kʼajkʼ jun-nax la yichʼ pasel ta batsʼil oro te tenbil ta martillo.
23 Tey-abi la spasbey jukeb yawil kʼajkʼetik, te stupʼojibal smechail kʼajkʼ sok te yawil akʼal, la spastiklan ta batsʼil oro.
24 La stuuntes jun talento* yuʼun batsʼil oro swenta ya spas te skajtajib kʼajkʼ sok spisil te bintik ya xtuun yuʼune.
25 Jaʼnix jich la spas te skajtajib schikʼojibal pom ta acacia-teʼ. Chaneb xujk la yichʼ pasel te jun xujkʼubil* snajtil sok jun xujkʼubil sjamalul soknix cheb xujkʼubil* stoyolil. Te skajtajib schikʼojibal pom sok te xulubiletik yuʼun jun-nax kʼotik.
26 La spots ta batsʼil oro te sba, te spatpat sok te xulubiletik. Jaʼnix jich la spasbey stiʼil ta oro ta sjoyobal.
27 Ta yeʼtal stiʼil ta schaʼjejchelul la spasbey cheb chʼokowiletik ta oro swenta ya yichʼ xojtiklanel ochel tey-a te teʼetik yuʼun ya yichʼ kʼechel bael.
28 Ta patil la spas ta acacia-teʼ te steʼelul sok la spotstiklan ta oro.
29 Jaʼnix jich la spas chʼul aceite te ay machʼa ya yichʼ malel ta sjol sok te pom te sumetnax* yikʼ. Jich la yichʼ pasel te bitʼil ya spas te machʼa ya snaʼ spasel te pomadaetik.
Notaetik
^ Jaʼ 1.11 metro. Ilawil ta apéndice, B14.
^ Jaʼ 66.75 centímetro.
^ Jaʼ 1.11 metro. Ilawil ta apéndice, B14.
^ Jaʼ 66.75 centímetro.
^ Jaʼ 89 centímetro. Ilawil ta apéndice, B14.
^ Jaʼ 44.5 centímetro.
^ Jaʼ 66.75 centímetro.
^ Jaʼniwan 7.4 centímetro. Ilawil ta apéndice, B14.
^ Ta yantik variante «tijil».
^ Jaʼ 34.2 kilo. Ilawil ta apéndice, B14.
^ Jaʼ 44.5 centímetro. Ilawil ta apéndice, B14.
^ Jaʼ 89 centímetro.
^ Ta yantik variante «xyukʼetnax».
