Éxodo 40:1-38
40 Jaʼ yuʼun, te Jehová jich la yalbey te Moisés:
2 «Ta sbabial kʼajkʼal yuʼun te sbabial u yame atejkʼan te nailpakʼ templo te jaʼ te nailpakʼ ta swenta tsoblej.
3 Yame awotses tey-a te skaxaul te Testigo Kʼop sok yame awakʼ ta spat te cortina yuʼun ma chikanuk ta ilel-a.
4 Yame skʼan ya awotses te mesa sok yame achajpan te bintik ya xbajt ta sba, jaʼnix jich yame skʼan ya awotses te skajtajib kʼajkʼ sok yame atsum te yawil kʼajkʼetik yuʼune.
5 Ta patil yame skʼan ya awakʼ te skajtajib schikʼojibal pom te pasbil ta oro ta yelaw te skaxaul Testigo Kʼop sok yame ajojkʼan ta yawil te cortina yuʼun te yochibal nailpakʼ templo.
6 »Yame skʼan ya awakʼ te skajtajib chikʼbil majtanil ta nopol* yochibal nailpakʼ templo te jaʼ te nailpakʼ ta swenta tsoblej.
7 Yame awakʼ te yawil jaʼ ta olil yuʼun te nailpakʼ ta swenta tsoblej sok te skajtajib chikʼbil majtanil, sok yame anojes ta jaʼ.
8 Ta patil yame achajpan te yamakʼul ta sjoyobal sok yame awakʼ te cortina yuʼun te yochibal te amakʼe.
9 Tey-abi yame skʼan ya amal ta aceite te nailpakʼ templo sok spisil te bintik ay tey-ae. Sok yame skʼan ya achʼultes te nailpakʼ templo sok spisil te bintik ya xtuun yuʼun swenta chʼultesbil ya xkʼot.
10 Jaʼnix jich yame skʼan ya amal ta aceite te skajtajib chikʼbil majtanil sok spisil te bintik ya xtuun yuʼune. Sok yame skʼan ya achʼultes te kajtajibal swenta chʼultesbil ya xkʼot.
11 Yame amal ta aceite te yawil jaʼ sok te skajtajib sok yame achʼultes.
12 »Tey-abi yame skʼan ya awikʼ bael te Aarón sok te snichʼnab ta nopol* te yochibal nailpakʼ ta swenta tsoblej sok akʼa spok sbaik.
13 Yame skʼan ya awakʼbey slap te Aarón te chʼul kʼuʼuletik, yame amalbey aceite ta sjol sok yame achʼultes swenta sacerdote ya xkʼot kuʼun.
14 Ta patil yame skʼan ya awakʼ te ya xnoptsajik* te snichʼnab sok yame skʼan ya awakʼbey slapik te najtil kʼuʼuletik.
15 Yame skʼan ya amalbey aceite ta sjol jich te bin-utʼil la yichʼ malel ta aceite te statik swenta ya xkʼotik ta sacerdoteetik kuʼun-euk. Te bitʼil ya yichʼik malbeyel aceite ta sjolik ya yakʼ ta ilel te maba ya xlaj skʼoplal ta stojolik te aʼtelil ta sacerdote sok ta stojol te stsʼumbalik ta kajalkaj bael».
16 Te Moisés la spas spisil te bin albot ta mantal yuʼun te Jehová. La spas jich te bitʼil albote.
17 Ta sbabial kʼajkʼal yuʼun te sbabial u ta schebal jaʼbil la yichʼ tejkʼanel te nailpakʼ templo.
18 Kʼalal te Moisés la stejkʼan te nailpakʼ templo, la yakʼtiklanbey te skajtajib* sok la yakʼ te marcoetik ta sba. La yakʼtiklan ta yawil te skʼatal teʼel sok la stejkʼan te yoyal.
19 La slim te pakʼ ta sba te nailpakʼ templo sok la yakʼbey smujkil, jich te bitʼil pasot ta mantal yuʼun te Jehová.
20 Ta patil la stsak te pejchel tonetik yuʼun te Testigo Kʼop sok la yotses ta yutil te skaxaule. Tey-abi la xojtiklanbey steʼelul te Kaxa sok la yakʼbey te smajkil.
21 Jaʼnix jich la yotses te Kaxa ta nailpakʼ templo sok la yakʼ ta yawil te cortina te ya xatawan, jich la smak te skaxaul Testigo Kʼop, jich te bitʼil pasot ta mantal yuʼun te Jehová.
22 Tey-abi la yotses te mesa ta yutil te nailpakʼ ta swenta tsoblej ta stojol bael norte yuʼun te nailpakʼ templo te ay ta yan jejch yuʼun te cortina,
23 sok la scholan moel te panetik ta stojol te Jehová, jich te bitʼil pasot ta mantal yuʼun te Jehová.
24 La yotses te skajtajib kʼajkʼ ta nailpakʼ ta swenta tsoblej sok la yakʼ ta yelaw te mesa ta stojol bael sur yuʼun te nailpakʼ templo.
25 Jaʼnix jich la stsum te yawil kʼajkʼetik ta stojol Jehová, jich te bitʼil pasot ta mantal yuʼun te Jehová.
26 Ta patil la yakʼ te skajtajib schikʼojibal pom te pasbil ta oro ta nailpakʼ ta swenta tsoblej te ay ta yelaw te cortina
27 swenta ya yichʼ chikʼel tey-a te pom te sumetnax* yikʼe, jich te bitʼil pasot ta mantal yuʼun te Jehová.
28 Tey-abi la yakʼ ta yawil te cortina yuʼun te yochibal nailpakʼ templo.
29 Jaʼnix jich la yakʼ te skajtajib chikʼbil majtanil ta stojol bael te yochibal nailpakʼ templo te jaʼ te nailpakʼ ta swenta tsoblej yuʼun tey ya yichʼ akʼel-a te chikʼbil majtanil sok te majtanil yuʼun sit awal tsʼunubil, jich te bitʼil pasot ta mantal yuʼun te Jehová.
30 Tey-abi la yakʼ te yawil jaʼ ta yolil te nailpakʼ ta swenta tsoblej sok te kajtajibal, sok la snojes ta jaʼ te ya xtuun yuʼun ya spok sbaik tey-a.
31 Te Moisés, Aarón sok te snichʼnab la spok yok skʼabik tey-a.
32 Ta jujun buelta te ya x-ochik ta nailpakʼ ta swenta tsoblej o ya xnoptsajik* bael ta skajtajib chikʼbil majtanil, ya spok sbaik, jich te bitʼil pasot ta mantal yuʼun te Jehová te Moisés.
33 Ta slajibal la schajpan te amakʼ ta sjoyobal te nailpakʼ templo sok te skajtajib chikʼbil majtanil sok la sjojkʼan te cortina yuʼun te yochibal te amakʼ.
Jich laj yoʼtan te Moisés ta spasel te aʼtelile.
34 Jaʼ yuʼun, te tokal jajch spots te nailpakʼ ta swenta tsoblej, jich te nailpakʼ templo noj ta yutsilal te Jehová.
35 Te Moisés maba ya xjuʼ ya x-och ta nailpakʼ ta swenta tsoblej ta skaj te potsol ta tokal, jich te nailpakʼ templo noj ta yutsilal te Jehová.
36 Ta bayuk te banti beenik, te kʼalal ya sjach sba te tokal ta sba te nailpakʼ templo, te israeletik ya sjach te scampamentoik.
37 Pero, teme maba ya sjach sba te tokal, maba ya sjach te scampamentoik jaʼto ya smaliyik te bin-ora ya sjach sba te tokale.
38 Ta bayuk te banti beenik, spisil te israeletik ya yilik te tokal yuʼun te Jehová ta sba te nailpakʼ templo ta kʼajkʼaleltik, pero ta ajkʼabal ya yilik te kʼajkʼ te ay ta sbae.
Notaetik
^ Ta yantik variante «tijil».
^ Ta yantik variante «tijil».
^ Ta yantik variante «xjijtsʼajik», «xtijtsajik».
^ O «skajtajib te jutul yolil».
^ Ta yantik variante «xyukʼetnax».
^ Ta yantik variante «xjijtsʼajik», «xtijtsajik».
