Éxodo 5:1-23
5 Ta patil-abi, te Moisés sok te Aarón bajt stejkʼan sbaik ta stojol te faraón sok jich la yalbeyik: «Jich la yal te Jehová te Dios yuʼun Israel: ‹Akʼa lokʼel te lum kuʼun swenta ya spasik kʼin ta jtojol ta jochol takin kʼinal›».
2 Pero, jich la yal te faraón: «¿Machʼa-a te Jehová swenta ya jchʼuunbey skʼop sok te ya kakʼ lokʼel te Israel? Maba ya jnaʼbey sba te Jehová sok maba ya kakʼ lokʼel te Israel».
3 Jaʼ yuʼun, jich la yalbeyik: «La skʼoponotik te Dios yuʼun te hebreoetik. Jaʼ yuʼun, awokoluk, akʼawotik bael oxeb kʼajkʼal ta jochol takin kʼinal yuʼun ya kakʼbeykotik milbil majtanil te Jehová te Dios kuʼuntike. Teme maba jich ya jpastike, yame yakʼbotik castigo ta swenta chamel o espada».
4 Pero, jich la yal te ajwalil yuʼun Egipto: «Moisés sok Aarón, ¿bin yuʼun ya akʼanik te ya yijkitayik yaʼtelik te lume? ¡Sujtan ta awaʼtelik!».
5 Jich la yalxan te faraón: «Ilawilik jayebto ta tul alumalik jwentainoj. Te jaʼexe ya akʼanik te ya skejchanik te yaʼtelike».
6 Ta kʼajkʼalnix-abi, te faraón jich la spas ta mantal te jwolwanejetik yuʼun te mosoetik sok te jkoltaywanejetik yuʼunik:
7 «Ma xa awakʼbeyix ak swenta ya spas ladrilloetik te lume, jaʼukiknix akʼa bajtukik ta sleel tal.
8 Sujaik ta spasel ladrilloetik jich te bitʼil jayeb yakiknanix ta spasel-ae. Mame xa apejkʼanbeyik yajtalul. Mero chʼajik, jaʼ yuʼun jich yakik ta yalel: ‹¡Ya jkʼan ya xbootik! ¡Ya jkʼan ya kakʼbeykotik milbil majtanil te Dios kuʼuntike!›
9 Sujaik ta spasel tulan aʼtelil sok akʼbeyaikxan bayal yaʼtelik yuʼun jich maba ya schʼam yaʼiyik lotil kʼopetik».
10 Jaʼ yuʼun, te jwolwanejetik yuʼun te mosoetik sok te jkoltaywanejetik yuʼunik jich bajt yalbeyik te lume: «Jich la yal te faraón: ‹Maba ya kakʼbatikix ak.
11 Jaʼexnix ya xbajt aleik tal te ak chikan te banti ya ataik sok maba ya jpejkʼanbeyex te awaʼtelike›».
12 Jaʼ yuʼun, spisil te lum bajt sleik kʼajben* ta spamal Egipto yuʼun ya stuuntesik jich bitʼil ak.
13 Te jwolwanejetik yuʼun te mosoetik jich la yalik: «Ta apisilik tsʼakalme ya apasik te awaʼtelik ta jujun kʼajkʼal jich te bitʼil kʼalal yato awichʼik akʼbeyel-a te ake».
14 Jaʼnix jich, te jkoltaywanejetik te jaʼik israeletik la yichʼik majel yuʼun te jwolwanejetik yuʼun te mosoetik te akʼbil yaʼtelik yuʼun te faraón ta stojol te israeletik. Jich jojkʼoybotik: «¿Bin yuʼun maba tsʼakal la apasik te ladrilloetik wojey sok te nax jich te bitʼil ta nailto?».
15 Jaʼ yuʼun, te jkoltaywanejetik te jaʼ israeletik bajtik ta kʼop ta stojol te faraón, jich la yalbeyik: «¿Bin yuʼun te jich ya apasbonkotik te bitʼil j-abatotik awuʼune?
16 Maba ya kichʼtik akʼbeyel ak sok jich ya yalulanbotik: ‹¡Pasaik ladrilloetik!›. Sok yak smajbelotik, pero jaʼ smul te lum awuʼune».
17 Pero, te faraón jich la yaltiklanbey: «¡Chʼajex! ¡Te jaʼexe mero chʼajex! Jaʼ yuʼun, jich ya awalik: ‹Ya jkʼan ya xbootik. Ya jkʼan ya kakʼbeykotik milbil majtanil te Jehová›.
18 ¡Baanik, baanik ta aʼtel! Maba ya awichʼik akʼbeyel ak, pero yame skʼan ya apasik te jayebnanix ladrillo ya apasik-ae».
19 Jaʼ yuʼun tenbil la yaʼiy sbaik te jkoltaywanejetik te jaʼik israeletik, melel jich albotik ta mantal: «Ma xjuʼ ya apejkʼanbeyik yajtalul te jayeb ladrillo ya apasik ta jujun kʼajkʼale».
20 Ta patil, te kʼalal lokʼik bael te banti ay te faraón, kʼot stsob sbaik sok te Moisés sok te Aarón te yakik ta maliyel yuʼune.
21 Jich la yalbeyik te Moisés sok te Aarón: «Te Jehová, akʼa yilbeyex te awaʼtelik sok akʼa yichʼex ta kʼop, melel te jaʼexe la awakʼ te ya yilayotik te faraón sok te j-abatetik yuʼune, jaʼnix jich la awakʼbeyik espada ta skʼabik yuʼun ya smilotik-a».
22 Jaʼ yuʼun, te Moisés la skʼopon te Jehová sok jich la yalbey: «Jehová, ¿bin yuʼun te ya awakʼbey swokol te lum ini? ¿Bin yuʼun te la atikunon tale?
23 Jaʼtonix-a te kʼalal la jtejkʼan jba ta stojol te faraón yuʼun ya kalbat akʼoplal, kʼaxto bayal yutsʼinoj* te lum ini, te jaʼate maʼyuk bin apasoj yuʼun ya akoltay te lum awuʼune».
Notaetik
^ Jaʼ smakojbey skʼoplal te steʼel trigo sok cebada te ya xjil te kʼalal ya yichʼ tsobeyel sit te awal tsʼunubile.
^ Ta yantik variante «yilbajinoj».
