Éxodo 7:1-25
7 Jaʼ yuʼun, te Jehová jich la yalbey te Moisés: «Jaʼatme Diosat ya xkʼoat ta stojol te faraón sok jaʼ j-alwanej ya xkʼot ta atojol te abankil Aarón.
2 Jaʼatme ya akʼases ta stojol te abankil Aarón spisil te bin ya kalbat ta mantal sok jaʼme te machʼa ya xkʼopoj ta stojol te faraón. Ta patil, te faraón yame yakʼ lokʼel te israeletik.
3 Te joʼon ya kakʼ te ya xtulanub yoʼtan te faraón sok ya jpas bayal milagroetik sok señailetik ta skʼinal Egipto.
4 Pero, te faraón maba ya yichʼex ta wenta, jaʼ yuʼun ya kakʼ jkʼab ta stojol te Egipto sok ya jlokʼes talel te lum kuʼun, te israeletik. Yame kakʼbey castigo te Egipto yuʼun jich ya jlokʼesex talel.
5 Te egipcioetik yame snaʼik te joʼon Jehovaon te kʼalal ya kakʼ jkʼab ta stojolik sok te kʼalal ya jlokʼes ta yolilik te israeletik».
6 Jaʼ yuʼun, te Moisés sok te Aarón la spasik jich te bitʼil albotik ta mantal yuʼun te Jehová. La spasik jich te bitʼil albotike.
7 Te Moisés 80 yaʼbilal-a yan te Aarón 83 yaʼbilal-a te kʼalal la skʼoponik te faraón.
8 Te Jehová jich la yalbey te Moisés sok te Aarón:
9 «Teme jich ya yalbeyex te faraón ‹Pasaik jun milagro›, jichme xa awalbey te Aarón ‹Chʼoja ta lum te anabateʼ ta stojol te faraón›, jichme ya xkʼatpʼuj ta mukʼul chan».
10 Jaʼ yuʼun, te Moisés sok te Aarón bajt stejkʼan sbaik ta stojol te faraón sok jich la spasik te bitʼil albotik ta mantal yuʼun te Jehová. Tey-abi, te Aarón la schʼoj ta lum te snabateʼ ta stojol te faraón sok te j-abatetik yuʼun, jich kʼatpʼuj ta mukʼul chan.
11 Pero, te faraón la yikʼ tal ta stojol te pʼijil winiketik sok te j-akʼchameletik. Te sacerdoteetik te snopojik magia yuʼun Egipto jaʼnix jich la spasik-euk sok te magia yuʼunike.
12 Ta jujuntul la schʼojik ta lum te snabateʼike, jich kʼatpʼujik ta mukʼul chanetik. Pero, te snabateʼ te Aarón la sbikʼtiklan te chanetik yuʼunike.
13 Manchukme jich-abi tulanub yoʼtan te faraón sok maba la yichʼ ta wenta te Moisés sok te Aarón, jich te bitʼil yaloj te Jehová.
14 Jaʼ yuʼun, te Jehová jich la yalbey te Moisés: «Te faraón ma skʼan ya yakʼ lokʼel te lume. Mero tulan te yoʼtane.
15 Baan ila te faraón te sab pajele, melel yame xbajt ta mukʼul jaʼ Nilo, baan ta tiʼjaʼ te banti ya xjuʼ ya ata aba soke. Tsaka bael te nabateʼ te kʼatpʼuj ta chane.
16 Jichme ya skʼan ya awalbey te faraón: ‹Te Jehová te Dios yuʼun te hebreoetik la yalbon ta mantal te jich ya kalbate: «Akʼa lokʼel te lum kuʼun swenta ya yichʼon ta mukʼ ta jochol takin kʼinal». Pero maʼyuk achʼuunoj kʼop jaʼto ta ora ini.
17 Jich ya yal te Jehová: «Yame anaʼ te joʼon Jehovaon ta swenta ini: yame jmaj te mukʼul jaʼ Nilo sok te jnabateʼ te ay ta jkʼab, jichme ya xkʼatpʼuj ta chʼichʼ.
18 Yame xlaj te schayul te mukʼul jaʼ Nilo sok yame xtuub, jich te egipcioetike maba ya skʼan ya yuchʼik te jaʼe»›».
19 Ta patil, te Jehová la yalbey ta mantal te Moisés: «Jich ya awalbey te Aarón: ‹Jacha te akʼab sok te anabateʼ ta stojol te jaʼetik te ayik ta Egipto, te mukʼul jaʼetik, te bebe jaʼetik,* te pampam jaʼetik sok spisil te yawil jaʼetik swenta ya xkʼatpʼujik ta chʼichʼ›. Yame x-ayin chʼichʼ ta spamal te skʼinal Egipto, jaʼnix jich ta yawil jaʼetik te pastiklanbil ta teʼ sok ta ton».
20 Ta oranax, te Moisés sok te Aarón jich la spasik te bitʼil albotik ta mantal yuʼun te Jehová. Te Aarón la stoy moel te snabateʼ sok la smaj te mukʼul jaʼ Nilo ta sit te faraón sok te j-abatetik yuʼune, jich kʼatpʼuj ta chʼichʼ te mukʼul jaʼe.
21 Laj te chayetik sok jajch ta tuubel te mukʼul jaʼ Nilo, jich te egipcioetik ma juʼ yuʼunik yuchʼel te jaʼe. Noj ta chʼichʼ spamal te skʼinal Egipto.
22 Pero, te sacerdoteetik yuʼun Egipto te snopojik spasel magia jaʼnix jich la spasik-euk sok te magia yuʼunike. Jich yuʼun tulanubxan yoʼtan te faraón sok maba la yichʼ ta wenta te Moisés sok te Aarón, jich te bitʼil yaloj te Jehová.
23 Ta patil sujt bael ta sna te faraón, maʼyuk skʼoplal la yil te bin kʼot ta pasele.
24 Te bitʼil te egipcioetik ma xjuʼ yuchʼik te jaʼ yuʼun te mukʼul jaʼ Nilo, och sjokʼik ta sjoyobal te mukʼul jaʼ swenta ya sleik jaʼ yuchʼik.
25 Kʼalal te Jehová la smaj te mukʼul jaʼ Nilo, tsʼakal kʼax jukeb kʼajkʼal.
Notaetik
^ Jaʼ skʼoplal te yok jaʼetik yuʼun te mukʼul jaʼ Nilo.
