Éxodo 8:1-32
8 Te Jehová jich la yalbey ta mantal te Moisés: «Baan ta stojol te faraón sok jichme xa awalbey: ‹Jich ya yal te Jehová: «Akʼa lokʼel te lum kuʼun yuʼun ya yichʼon ta mukʼ.
2 Teme mananix ya awakʼ lokʼel-ae, yame jnojes ta chʼuchʼetik spamal te kʼinal awentainoje.
3 Yame xnoj ta chʼuchʼetik te mukʼul jaʼ Nilo, yame xlokʼik tal sok yame x-ochik ta ana, ta awayibal na, ta awayib sok ta sna te j-abatetik awuʼune, yame x-ayin ta lum awuʼun, ta hornoetik soknix ta yawil te banti ya yichʼ wotsʼel te pane.
4 Yame xtal bayal chʼuchʼetik ta atojol, ta stojol te lum awuʼun sok ta stojol spisil te j-abatetik awuʼune»›».
5 Ta patil, te Jehová la yalbey ta mantal te Moisés: «Jich xa awalbey te Aarón: ‹Jacha te akʼab sok te anabateʼ ta stojol te jaʼetik, te bebe jaʼetik yuʼun te mukʼul jaʼ Nilo sok te pampam jaʼetik sok akʼa nojuk ta chʼuchʼetik spamal te skʼinal Egipto›».
6 Te Aarón la sjach te skʼab ta stojol te jaʼetik yuʼun Egipto, jich jajchik ta lokʼel tal chʼuchʼetik te la snojesik te lume.
7 Pero, te sacerdoteetik te snopojik spasel magia jaʼnix jich la spasik-euk sok te magia yuʼunike, juʼ yuʼunik slokʼesel tal chʼuchʼetik te la snojesik spamal te skʼinal Egipto.
8 Pero ta patil, te faraón la stikun ta ikʼel te Moisés sok te Aarón, jich la yaltiklanbey: «Kʼanbeyaik wokol te Jehová te yakuk slokʼes te chʼuchʼetik ta jtojol sok ta stojol te lum kuʼune, melel ya kakʼ lokʼel te lum swenta ya yakʼbeyik milbil majtanil te Jehová».
9 Tey-abi, te Moisés jich la yalbey te faraón: «Jaʼme ay ta awenta yalbelon te bin-ora ya akʼan te ya kalbey wokol te Dios te yakuk slokʼes te chʼuchʼetik ta atojol, ta stojol te j-abatetik awuʼun, ta lum awuʼun sok ta naetik awuʼune. Jaʼnaxme ya x-ayin jilel chʼuchʼetik ta mukʼul jaʼ Nilo».
10 «Pajel ya jkʼan», xchi te faraón. Jich yuʼun, te Moisés jich la yalbey: «Swenta ya anaʼ te maʼyuk machʼa jich te bitʼil te Jehová te Dios kuʼunkotike, jichme ya xkʼot ta pasel te bitʼil ya awale.
11 Yame xlokʼ bael te chʼuchʼetik ta atojol, ta naetik awuʼun, ta stojol te j-abatetik awuʼun sok ta lum awuʼun. Jaʼnaxme ya x-ayin jilel chʼuchʼetik ta mukʼul jaʼ Nilo».
12 Jich te Moisés sok te Aarón lokʼik bael ta stojol te faraón. Te Moisés la skʼanbey te Jehová te yakuk slokʼes te chʼuchʼetik te la stikun ta stojol te faraón.
13 Te Jehová jich la spas te bitʼil albot yuʼun te Moisés, jich laj te chʼuchʼetik ta nanatik, ta amakʼetik sok ta skʼinalik.
14 Te egipcioetik jajch stsobtiklanik, bayal ta tsojboltsojb la yakʼik te chʼuchʼetike. Jajch ta tuubel te kʼinale.
15 Kʼalal te faraón la yil te maʼyukix te chʼuchʼetike, tulanub yoʼtan sok maba la skʼan la schʼam yaʼiy te bin la yal te Moisés sok te Aarón, jich te bitʼil yaloj te Jehová.
16 Jich yuʼun, te Jehová la yalbey ta mantal te Moisés: «Jich xa awalbey te Aarón: ‹Jacha te anabateʼ sok maja te lum, te stanul yame xkʼatpʼuj ta chʼin usetik* ta spamal skʼinal Egipto›».
17 Jich la spasik. Te Aarón la sjach te snabateʼ, la smaj te lum, jich te chʼin usetik* jajch sjumtayik te ants winiketik sok te chambalametike. Te stanul te lum kʼatpʼuj ta chʼin usetik ta spamal skʼinal Egipto.
18 Te sacerdoteetik te snopojik spasel magia jaʼnix jich kʼan schiknajtesik chʼin usetik-euk ta swenta te magia yuʼunike, pero maba juʼ yuʼunik. Jich te chʼin usetik* jajch sjumtayik te ants winiketik sok te chambalametike.
19 Jaʼ yuʼun, te sacerdoteetik te snopojik spasel magia jich la yalbeyik te faraón: «¡Jaʼ yal skʼab* te Diose!». Pero tulanubxan yoʼtan te faraón, maba la yichʼ ta wenta te Moisés sok te Aarón, jich te bitʼil yaloj te Jehová.
20 Jaʼ yuʼun, te Jehová la yalbey ta mantal te Moisés: «Sabtome ya xjajchat te pajel yuʼunme ya xbajt atejkʼan aba ta stojol te faraón, melel ya xbajt ta mukʼul jaʼ. Jichme ya xkʼot awalbey: ‹Jich la yal te Jehová: «Akʼa lokʼel te lum kuʼun yuʼun ya yichʼon ta mukʼ.
21 Pero, teme maba ya awakʼ lokʼel te lum kuʼune, yame jtikun tal xkachetik* ta atojol, ta stojol te j-abatetik awuʼun, ta lum awuʼun sok ta naetik awuʼun. Sok yame xnoj ta xkachetik te naetik yuʼun Egipto sok yame xnoj te lumkʼinal te banti ayexe.*
22 Ta yorail-abi maba ya kakʼ xtaot ta xkachetik* te skʼinal Gosén te banti yak ta nainel te lum kuʼune. Jichme ya anaʼ te joʼon Jehovaon te liʼ ayon ta kʼinal ini.
23 Jichme ya xnaʼbaj te machʼatik-a te lum kuʼun sok te machʼatik-a te lum awuʼune. Pajel ya xchiknaj ta ilel te señail ini»›».
24 Jaʼ jich la spas te Jehová. Xjumetnax tal te xkachetik* ta sjumtayel te sna te faraón, te sna te j-abatetik yuʼun sok spamal te skʼinal Egipto. Te xkachetik la yakʼ bayal wokolil ta Egipto.
25 Jaʼto jich te faraón la stikun ta ikʼel te Moisés sok te Aarón, jich la yaltiklanbey: «Baan akʼbeyaik milbil majtanil te Dios awuʼunik liʼnix ta kʼinal ini».
26 Pero, te Moisés jich la yalbey: «Ma lek te jich ya jpastike, melel te egipcioetik ma lek ya yilik te milbil majtanil te ya jkʼan ya kakʼbeytik te Jehová te Dios kuʼunkotike. ¿Mabal yakuk schʼojotik ta ton te kʼalal ya yilik te ya kakʼtik milbil majtanil te maba lek ya yilike?
27 Jaʼ yuʼun ya xbootik oxeb kʼajkʼal ta jochol takin kʼinal sok tey ya kakʼbeytik chikʼbil majtanil-a te Jehová te Dios kuʼunkotik jich te bitʼil la yalbotike».
28 Jaʼ yuʼun, te faraón jich la yal: «Ya kakʼex bael ta jochol takin kʼinal yuʼun ya awakʼbeyik milbil majtanil te Jehová te Dios awuʼunike. Pero, mame namal* ya xbaex sok kʼoponaik Dios ta jtojol».
29 Te Moisés jich la yal: «Ya xlokʼon bael ta atojol sok ya jkʼanbey wokol te Jehová yuʼun libre ya xjilat te pajel te jaʼat, te j-abatetik awuʼun sok te lum awuʼun ta swenta te xkachetike.* Pero mame xa aloʼlayotikxan, mame jaʼuk te maba ya awakʼ lokʼel te lum swenta ya yakʼbey milbil majtanil te Jehová».
30 Tey-abi, te Moisés lokʼ bael ta stojol te faraón sok la skʼopon te Jehová.
31 Te Jehová jich la spas te bitʼil albot yuʼun te Moisés. Jich te faraón, te j-abatetik yuʼun sok te lum yuʼun libre jilik ta swenta te xkachetike.* Maʼyuk jil ni jkojtuk ta Egipto.
32 Pero, jaʼnix jich te faraón tulanubxan yoʼtan sok maba la yakʼ lokʼel te lume.
Notaetik
^ O «jejenetik».
^ O «jejenetik».
^ O «jejenetik».
^ O «yuʼel».
^ Ta yantik variante «jaetik».
^ Jaʼ te banti ayik te egipcioetike.
^ Ta yantik variante «jaetik».
^ Ta yantik variante «jaetik».
^ Ta yantik variante «jakal», «kʼubul».
^ Ta yantik variante «jaetike».
^ Ta yantik variante «jaetike».
