Éxodo 9:1-35
9 Jaʼ yuʼun, te Jehová jich la yalbey ta mantal te Moisés: «Baan ta stojol te faraón sok jichme xa awalbey: ‹Jich la yal te Jehová te Dios yuʼun te hebreoetik: «Akʼa lokʼel te lum kuʼun yuʼun ya yichʼonik ta mukʼ.
2 Pero, teme maba ya awakʼ lokʼel sok teme ya akomtiklane,
3 naʼame te ya yakʼ skʼab te Jehová ta stojol te chambalametik awuʼun te ay ta akʼinale. Te caballoetik, burroetik, camelloetik, wakaxetik sok te tuminchijetik yame stsakotik ta chamel te ya xmilotik yuʼune.
4 Pero, te Jehová parte ya yakʼ te chambalametik yuʼun te israeletik sok parte ya yakʼ te chambalametik yuʼun te egipcioetik, maba ya xlaj ni jkojtuk te schambalam te israeletik»›».
5 Jaʼnix jich, te Jehová la yal te bin-ora ya xkʼot ta pasel te kʼalal jich la yal: «Pajel jich ya spas te Jehová ta kʼinal ini».
6 Jaʼme jich mero la spas te Jehová ta yan kʼajkʼal. Jajch ta lajel spisil ta chajp te chambalametik yuʼun te egipcioetike, pero maba laj ni jkojtuk yuʼun stukel te israeletike.
7 Kʼalal te faraón la stikun ta ilel te bin kʼot ta pasel, la yilik te maba laj ni jkojtuk schambalam te israeletike. Manchukme jich-abi, te faraón maba la yakʼ lokʼel te lum ta skaj te tulanub yoʼtane.
8 Ta patil, te Jehová jich la yalbey te Moisés sok te Aarón: «Jopaik sok schebal akʼabik te stanul horno sok akʼa sbujkʼiy te Moisés ta stojol te faraón.
9 Te tan yame x-esmajxan te jich ya xpujk bael ta spamal skʼinal Egipto sok yame xkʼatpʼuj ta chakaletik* ta sbakʼetal te ants winiketik sok te chambalametik ta spamal skʼinal Egipto».
10 Jich la sjopik te stanul te horno sok la stejkʼan sbaik ta stojol te faraón. Ta patil, te Moisés la sbujkʼiy moel te tane, jich kʼatpʼuj ta chakaletik* ta sbakʼetal te ants winiketik sok te chambalametik.
11 Te sacerdoteetik te snopojik magia maba juʼ yuʼunik te la stejkʼan sbaik ta stojol te Moisés, melel tsakotik ta chakal-euk* jich bitʼil te yantik egipcioetike.
12 Pero, te Jehová la yakʼ te tulanubxan yan buelta te yoʼtan te faraón, jich maba la yichʼ ta wenta te Moisés sok te Aarón, jich te bitʼil albot yuʼun Jehová te Moisés.
13 Tey-abi, te Jehová jich la yalbey te Moisés: «Sabtome ya xjajchat te pajel yuʼunme ya xbajt atejkʼan aba ta stojol te faraón. Jichme xa awalbey: ‹Jich la yal te Jehová te Dios yuʼun te hebreoetik: «Akʼa lokʼel te lum kuʼun yuʼun ya yichʼon ta mukʼ.
14 Ta ora ini yame jtikun wokoliletik ta atojol, ta stojol te j-abatetik awuʼun sok ta stojol te lum awuʼun yuʼun jich ya anaʼ te maʼyuk machʼa jich te bitʼil te joʼon ta swolol balumilal.
15 Te lajuk jkʼane, juʼ kuʼun sjachel jkʼab ta atojol sok ta stojol te lum awuʼun yuʼun ya kakʼbat castigo ta swenta jun chamel te ya xmilawan, jich maba kuxulatix te jichuke.
16 Pero kakʼoj te ya xkuxinatxan ta swenta ini: yuʼun ya kakʼbat awil te kuʼel sok yuʼun ya yichʼ pukbeyel skʼoplal jbiil ta swolol balumilal.
17 ¿Yatobal atoy aba ta stojol te lum kuʼun te maba ya awakʼ lokʼele?
18 Ta jich ora te pajele yame kakʼ tal tulan bat te kʼax mukʼik te maʼyuk bin-ora jich kʼaxem ta Egipto ni jaʼto tal ta sjajchibal.
19 Jaʼ yuʼun tikuna ta otsesel ta sna spisil te chambalametik awuʼun sok spisil te bintik ay awuʼun ta akʼinal. Teme ya xjil ta jamalal jtul ants winik o jkojt chambalam, yame xlaj te kʼalal ya xko tal te bate»›».
20 Spisil te j-abatetik yuʼun te faraón te la xiʼik te bin la yal te Jehová oranax la yakʼik ochel ta na te j-abatetik sok te chambalametik yuʼunike.
21 Pero, te machʼatik maba la yichʼik ta mukʼ te bin la yal te Jehová maba la yotsesik ta na te j-abatetik sok te chambalametik yuʼunike.
22 Te Jehová jich la yalbey te Moisés: «Jacha moel akʼab ta chʼulchan, jichme ya xko tal tulan bat ta spamal skʼinal Egipto. Yame xtal ta stojol te ants winiketik, chambalametik sok te jaʼmaletik te ay ta skʼinal Egipto».
23 Tey-abi, te Moisés la sjach moel te snabateʼ ta chʼulchan, jich te Jehová la yakʼ kʼopojuk chawuk sok la yakʼ tal bat, jaʼnix jich la yakʼ tal kʼajkʼ* ta skʼinal Egipto. Te Jehová la yakʼxan taluk bat ta skʼinal Egipto.
24 Jaʼnix jich chiknaj kʼajkʼ te xlemlajan xojobil te kʼalal yak ta yakʼel te bate. Maʼyuk bin-ora kʼaxem tulan bat ta Egipto jaʼto te kʼalal chiknaj jich bitʼil nación.
25 Te bat la smiltiklan te ants winiketik sok te chambalametik te jilik ta jamalal, jaʼnix jich la slajin spisil te jaʼmaletik sok spisil te teʼetik te ayik ta skʼinal Egipto.
26 Te bantinax maba la yakʼ te bate jaʼ ta skʼinal Gosén te banti yakik ta nainel te israeletike.
27 Jich yuʼun, te faraón la stikun ta ikʼel te Moisés sok te Aarón sok jich la yaltiklanbey: «Jnaʼoj te jtaoj jmule. Toj yoʼtan stukel te Jehová, yan te joʼon sok te lum kuʼune ma lek te bin jpasojkotike.
28 Kʼanbeyaik wokol te Jehová te yakuk skom te chawuk sok te bate. Teme jiche, maba ya kakʼ xjalajex liʼi, ya kakʼex lokʼel bael».
29 Jich la yal te Moisés: «Te kʼalalnax ya xlokʼon bael ta mukʼul lume, ya jach moel jkʼab ta stojol te Jehová. Swenta ya anaʼ te jaʼ yuʼun Jehová te kʼinal ini yame xkom te chawuk sok te bate.
30 Manchukme jich-abi jnaʼoj te jaʼat sok te j-abatetik awuʼun mananix ya axiʼik-a* te Jehová Diose».
31 Laj ta bat te lino-nichim sok te cebadae, melel yak ta yijubel sit-a te cebada sok yak ta nich-a te linoe.
32 Pero, te trigoetik* maba lajik, melel patilto ya xyijub sitik.
33 Kʼalal te Moisés lokʼ bael ta stojol te faraón ta mukʼul lum, la sjach moel te skʼab ta stojol te Jehová, jich kom te chawuk, te bat sok te jaʼale.
34 Kʼalal te faraón la yil te kom te jaʼal, bat sok te chawuk, la sta smul yan buelta sok tulanub yoʼtan, jaʼnix jich la spasik te j-abatetik yuʼune.
35 Mananix kʼunub yoʼtan-a te faraón, jich maba la yakʼ lokʼel te israeletik, jich te bitʼil yaloj te Jehová ta swenta te Moisés.
Notaetik
^ Jaʼniwan mukʼul kʼaʼel chin te ay bayal spojobil.
^ Jaʼniwan mukʼul kʼaʼel chin te ay bayal spojobil.
^ Jaʼniwan mukʼul kʼaʼel chin te ay bayal spojobil.
^ Jaʼniwan skʼoplal te yip chawuk.
^ Ta namey junetik te la yichʼ tsʼibayel ta hebreo kʼop ya yalbey skʼoplal chaʼchajp trigo te ya yichʼ tsʼunel ta namey Egipto, te june jaʼ lekil trigo, te yane ma mero lek stukel.
