Sbabial carta ta stojol te Corintioetik 1:1-31
1 Joʼon Pabloon —la kichʼ ikʼel yuʼun jpuk-kʼop ya xkʼoon yuʼun te Cristo Jesús ta swenta skʼanojel yoʼtan te Diose— sok te kermanotik Sóstenes
2 ya jtikunbeyexkotik te carta ini, jaʼex te congregación yuʼun Dios te ay ta Corinto, jaʼex te la awichʼik chʼultesel ta swenta te Cristo Jesús, la awichʼik ikʼel yuʼun chʼultesbil ya xkʼoex sok spisil te yantik te bayuk ayik ta skʼanel koltayel ta swenta sbiil te Kajwaltik Jesucristo te pajal Kajwalinojtike.
3 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.
4 Spisil-ora ya kalbey wokol Dios ta atojolik ta swenta te slekil yoʼtan te ma snujpʼuk ya kichʼtik te la yakʼbeyex awilik ta swenta te Cristo Jesús.
5 Melel jaʼ ta swenta te la yakʼbeyex bayal akʼulejalik te Diose, jich bitʼil ya anaʼik ta lek kʼop sok te ya anaʼik ta lek te bin ay ta na’ele,
6 jich te bitʼil jamal yalojbey skʼoplal te Cristo ta awolilik,
7 jich yuʼun maʼyuk junuk majtanil te maba awichʼojik akʼbeyel te bitʼil yakex ta smaliyel te ya xchiknaj tal te Kajwaltik Jesucristo sok spisil awoʼtanik.
8 Jaʼnix jich yame yakʼbeyex yip awoʼtanik kʼalalto ta slajibal kʼajkʼal yuʼun jich maʼyuk amulik ya awichʼik tabeyel ta skʼajkʼalel te Kajwaltik Jesucristoe.
9 Stalel jun yoʼtan ta jtojoltik te Diose. Jaʼ la yikʼex ta stojol yuʼun jun ya xkʼoex sok te sNichʼane, jaʼ te Kajwaltik Jesucristo.
10 Jich yuʼun, kermanotak, ya jkʼanbeyex wokol ta swenta sbiil te Kajwaltik Jesucristo te acuerdo ayukex ta apisilik ta swenta te bin ya awalike, sok te manchuk ayuk xatomba ta awolilik, jaʼ lek te junuknax te snopojibal awuʼunik sok junuknax te bin ya snop awoʼtanike.
11 Jich ya kalbeyex ini, kermanotak, yuʼun ay la yalbonik te machʼatik ay ta sna te Cloe te yalaj atsak abaik ta kʼop.
12 Melel jichlaj yakex ta yalel ta jujuntul: «Joʼon jtʼunoj te Pablo», «Joʼon jtʼunoj te Apolos», «Pero joʼon jtʼunoj te Cefas»,* «Joʼon jtʼunoj te Cristo».
13 ¿Yuʼunbal xatoj sba te Cristoe? ¿Yuʼunbal jaʼ la yichʼ jijpanel ta teʼ ta atojolik te Pabloe? O ¿yuʼunbal jaʼ la awichʼik jaʼ* ta swenta sbiil te Pabloe?
14 Ya kalbey wokol Dios yuʼun te maʼyuk la kakʼbeyex awichʼik jaʼ* ni jtulukexe, jaʼnax te Crispo sok te Gayo,
15 jich maʼyuk machʼa ya yal te la awichʼik jaʼ* ta swenta jbiil.
16 Melelnix-a, la kakʼbey yichʼ jaʼ* te machʼatik ayik ta sna te Estéfanas. Pero ma jnaʼ teme ay yan machʼa la kakʼbey yichʼ jaʼ.
17 Te Cristo maba la stikunon ta yakʼel ichʼjaʼ,* jaʼ la stikunon ta yalel te lek yachʼil kʼop, pero maba ta swenta pʼijil kʼopetik yuʼun te ants winiketik, yuʼun jich ma tojoluknax ya xkʼot te la yichʼ jijpanel ta teʼ yuʼun wokolil* te Cristoe.
18 Te machʼatik chʼayel ya xbajtike jowilkʼopnax ya yaʼiyik te kʼalal ya yichʼ albeyel skʼoplal te teʼ yuʼun wokolile,* yan te joʼotik te la jtatikix te kolele jich ya kiltik te jaʼ yuʼel te Diose.
19 Melel jich tsʼibaybil: «Ya jlajinbey spʼijil yoʼtanik te machʼatik pʼijike sok yame jpʼajbey te spʼijilik te machʼatik bayal bin ya snaʼike».
20 ¿Banti ay te machʼa pʼije? ¿Banti ay te machʼa ya snaʼ ta lek te bin ya yal te Leye? ¿Banti ay te machʼa ya snaʼ lek kʼop ta swenta te balumilal ini? ¿Mabal jaʼuk te Dios la yakʼ te jowilkʼopnax ya xkʼot te spʼijil te machʼatik ayik ta balumilale?
21 Ta swenta spʼijil yoʼtan te Dios, ma la yakʼ sba ta naʼel ta stojol te ants winiketik ta swentanax spʼijilik. Jaʼ lek la yil te ya yakʼbey skolel te machʼatik ya schʼuunik te bin ya kalbeytik skʼoplal te kuybil ta jowilkʼope.
22 Melel te judioetik ya skʼan ya yilik milagroetik,* te griegoetik ya sleik pʼijil oʼtanil.
23 Yan te joʼotik ya jcholbeytik skʼoplal te Cristo te la yichʼ jijpanel ta teʼ, jaʼ te bin kʼojchinojibal yuʼun te judioetik, te nacionetik ya skuyik ta jowilkʼopnax.
24 Pero, te machʼatik ikʼbilik chikan teme judioetik o griegoetik jich ya yilik te jaʼ yuʼel Dios sok jaʼ spʼijil yoʼtan Dios te Cristoe.
25 Melel te bin jowilkʼop ya skuyik te ya yal te Diose jaʼ kʼax jelawenxan spʼijil ya xkʼot-a te bin-utʼil spʼijil te ants winiketik, sok te machʼatik ya skuyik te ay bin maʼyuk yip ta sit te Diose jaʼ kʼax bayalxan yip ya xkʼot-a te bin-utʼil yip te ants winiketik.
26 Kermanotak, ilawilik te bin awilelik, jaʼex te awichʼojik ikʼele: maʼyuk bayalex te ay apʼijilik ta sit te ants winiketike, maʼyuk bayalex te awichʼoj mukʼ awaʼtelik sok maʼyuk bayalex te mukʼ skʼoplal te afamiliaike.
27 Te Dios jaʼ la stsa te machʼatik maʼyuk spʼijilik ta sit te balumilal yuʼun jich ya yakʼ ta kʼexlal te machʼatik pʼijike. Te Dios la stsa te bintik maʼyuk yip ya yil te balumilal yuʼun jich ya yakʼ ta kʼexlal te bintik ay yipe.
28 Te Dios la stsa te bintik ma xtuun yuʼun te balumilal sok te bintik pʼajbil yuʼune, jaʼ te bintik maʼyuk skʼoplal, yuʼun jich ya slajinbey skʼoplal te bintik ay skʼoplale,
29 jich maʼyuk machʼa ya xjuʼ ya stoy sba ta stojol te Diose.
30 Jaʼ wokolayal te Dios te jun-nax ayex sok te Cristo Jesús, te jich kʼot ta jtojoltik te bitʼil pʼijilal te talem ta stojol te Diose, jaʼnix ta swenta te toj ya kichʼtikix ilel, te chʼultesbilotikix sok te ayotikix ta libree,
31 yuʼun jich ya xkʼot ta pasel te bin-utʼil tsʼibaybil: «Te machʼa mukʼ skʼoplal ya yaʼiy sba, jaʼukme mukʼ skʼoplal ya yaʼiy sba ta stojol te Jehová».*
