Sbabial carta ta stojol te Corintioetik 14:1-40
14 Mame xa akom abaik ta yakʼel ta ilel kʼuxul oʼtanil, pero jaʼnix jich pasaik tulan yuʼun ya awichʼik te majtaniletik te ya yakʼ te chʼul espiritue,* kʼaxemtoxan-a te majtanil yuʼun ya xkʼopojotik ta skʼop j-alwanej.
2 Melel te machʼa ya xkʼopoj ta yan kʼopil ma jaʼuk ya skʼopon te ants winiketik, jaʼ ya skʼopon te Diose, melel maʼyuk machʼa ya xkʼot ta yoʼtan te bin ya yale manchukme jaʼnix ya x-albot yuʼun te chʼul espíritu* te bin mato yakʼoj ta naʼel te Diose.
3 Yan stukel te machʼa ya xkʼopoj ta skʼop j-alwanej ya yakʼ yip-oʼtanil, smukʼul oʼtanil sok ya yakʼbey smukʼul kʼinal yaʼiy te ants winiketik ta swenta te bin ya yale.
4 Te machʼa ya xkʼopoj ta yan kʼopil jaʼnax stukel ya yakʼbey sba yip yoʼtan, pero te machʼa ya xkʼopoj ta skʼop j-alwanej ya yakʼbey yip yoʼtan te congregación.
5 Koʼtanuk te apisilik ya xkʼopojex ta yantik kʼopiletik, pero jaʼ ya jkʼan te yakuk xkʼopojex ta skʼop j-alwanej. Ta melel, jaʼ ya xtuunxan te bin ya yal te machʼa ya xkʼopoj ta skʼop j-alwanej, ma jaʼuk te machʼa ya xkʼopoj ta yantik kʼopiletike, jaʼnax teme ay machʼa ya skʼasesbot yuʼun te bin ya yal swenta jich ya sta yip yoʼtan-a te congregación.
6 Kermanotak, te yakuk xkʼoon ta atojolik ta ora ini sok te yakuk jkʼoponex ta yantik kʼopiletik, ¿aybal bin ya xlokʼ awuʼunik-a teme ma jaʼuk ya kakʼbeyex anaʼik te bin yakʼojbon jnaʼ te Dios, te bin ay ta naʼel, jun albilkʼop o jun nojptesel?
7 Jaʼ pajal kʼoem sok te aʼtejibaletik yuʼun música, jich bin-utʼil te amay* o te arpa. Teme maba yanyantik te skʼopike, ¿bin-utʼil ya xnaʼbaj te bin yak ta tijel ta amay o ta arpa?
8 Sok teme ma xkʼot ta oʼtanil te bin swentail te yak ta okʼesinel te trompetae, ¿machʼa ya schajpan sba ta yakʼel guerra?
9 Jaʼnix jichex-euk, teme kʼax chujkul ta naʼbeyel swentail te bin ya awalbeyik skʼoplale, ¿aybal machʼa ya xkʼot ta yoʼtan te bin yakex ta yalele? Jaʼ jich kʼoem te yakex ta skʼoponel te ikʼe.
10 Ta balumilal ay bayal ta chajp kʼopiletik, spisil chikan ta aʼiyel te bin ya skʼan ya yale.
11 Pero, teme ma xkichʼbey swentail te bin yak ta alele, jyanlum kʼoemon ta stojol te machʼa yak ta kʼope sok jich ya kil-euk te bin-utʼil jyanlum te machʼa yak ta kʼope.
12 Jich yak ta kʼoel ta pasel ta atojolik. Jich te bin-utʼil awoʼtanikuk ya awichʼik te majtaniletik yuʼun te chʼul espiritue,* jaʼ xa apasik tulan ta staelxan te majtaniletik te ya yakʼbey yip yoʼtan te congregacione.
13 Jich yuʼun, te machʼa ya xkʼopoj ta yan kʼopil, akʼa skʼan ta oración te yakuk xjuʼ skʼases te bin yak ta yalele.
14 Melel, teme ya jkʼopon Dios ta yan kʼopil, jaʼ te majtanil yuʼun te chʼul espíritu* te jich ya yakʼ jkʼopon te Diose, pero te snopojibal kuʼune ma xyichʼbey swentail.
15 Jich yuʼun, ¿bin ya skʼan ya jpasix-a? Ya jkʼopon Dios ta swenta te majtanil yuʼun te chʼul espíritu,* pero jaʼnix jich ya jkʼopon Dios sok te snopojibal kuʼune. Ta swenta te majtanil yuʼun te chʼul espíritu ya jkʼayojtay te Diose, pero jaʼnix jich ya jkʼayojtay te Dios sok te snopojibal kuʼune.
16 Teme ya awichʼ ta mukʼ te Dios sok te majtanil yuʼun te chʼul espiritue,* ¿bin-utʼil ya xjuʼ ya yal «Jichuk» te machʼa maba nojptesbil te yak yaʼiybelat te akʼop teme ma xyichʼbey swentail te bin la awal wokol yuʼun ta skʼoponel te Diose?
17 Melelnix-a te kʼax lek te bin-utʼil la awalbey wokol te Diose, pero maba yak ta yichʼel yip yoʼtan te yane.
18 Ya kalbey wokol Dios yuʼun te jaʼ bayalxan ta chajp kʼopiletik ya xkʼopojon te bin-utʼil te jaʼexe.
19 Pero, ta congregación jaʼ lek te ya kal joʼpʼalnax kʼopetik te ya xkʼot ta oʼtanil yuʼun jich ya jnojptes-a te yantik, ma jaʼuk te ya kal 10 mil ta pʼal kʼopetik ta yan kʼopil.
20 Jich yuʼun, kermanotak, mame jichuk snopojibal awuʼunik te bin-utʼil te alaletik. Jichukexme te bin-utʼil te alaletik te ma snaʼik spasel te bin chopole,* pero mukʼul ants winikukex ta swenta te snopojibal awuʼunike.
21 Jich tsʼibaybil ta Ley: «‹Yame jkʼopon te lum ini ta skʼop jyanlumetik sok ta skʼop ants winiketik te ma snaʼbeyik sbae; manchukme jich-abi, mananix ya yaʼiybonik-a te jkʼope›, xchi te Jehová».*
22 Te yantik kʼopiletik ma jaʼuk señail ta stojol te jchʼuunjeletik, jaʼ señail ta stojol te machʼatik maba jchʼuunjeletike; te albilkʼopetik ma jaʼuk yuʼun te machʼatik maba jchʼuunjeletike, jaʼ yuʼun te machʼatik jchʼuunjeletike.
23 Jich yuʼun, teme spisil te congregación ya stsob sba ta jun lugar sok te spisilik ya xkʼopojik ta yanyantik kʼopiletik, tey-abi teme ya x-och tal ants winiketik te maba nojptesbilik o te maba jchʼuunjeletike, ¿mabal yakuk yalik te sojkem ajolike?
24 Yan teme apisilik yakex ta kʼop ta skʼop j-alwanej, teme ya x-och tal te machʼa maba jchʼuunjel o te machʼa maba nojptesbile, jichme ya yaʼiy sba te ay smul sok ya xtijbot yoʼtan ta yilel te bin-utʼil ay te skuxlejale.
25 Jich bitʼil ya xchiknaj ta sakal kʼinal te bin muken ay ta yoʼtane, yame skejan sba sok jich ya yal ta yichʼel ta mukʼ te Diose: «Ta melel, yuʼun-nix ay ta awolilik-a te Diose».
26 Jich yuʼun, kermanotak, ¿bin ya skʼan ya apasikix-a? Te kʼalal ya atsob abaik, te jtule ya skʼayojtay jun salmo, te yane ya xnojpteswan, te yane ya yal te bin akʼbot snaʼ yuʼun te Diose, te yane ya xkʼopoj ta yantik kʼopiletik sok te yane ya skʼases kʼop. Jichme xa apasik spisil ini yuʼun talel kʼaxel ya awakʼbey abaik yip awoʼtanik.
27 Teme ay machʼatik ya xkʼopoj ta yan kʼopil, jaʼ lek teme chaʼtul o oxtulnax te ya xkʼopojike sok akʼa sjel sbaik te kʼalal ya xkʼopojik, sok ya skʼan te ay machʼa ya skʼasesbot te skʼopike.
28 Pero, teme maʼyuk machʼa ya skʼases te kʼope, jaʼ lek te manchuk ya xkʼopojik ta congregación, akʼa skʼoponik Dios ta yoʼtanik.
29 Akʼa kʼopojukik chaʼtul o oxtul j-alwanejetik, te yantike akʼa yilbeyik swentail te bin la yichʼ alele.
30 Pero, teme ay machʼa ay bin ya x-akʼbot snaʼ yuʼun Dios te kʼalal nakal tey-ae, akʼa chʼabuk te machʼa nail yak ta kʼope.
31 Melel ta apisilik ya xjuʼ ya xkʼopojex ta skʼop j-alwanej ta jujuntul, yuʼun jich ay bin ya anopik ta apisilik sok jich ya sta yip awoʼtanik.
32 Te majtaniletik yuʼun te chʼul espíritu* te akʼbil ta stojol te j-alwanejetik ya skʼan te lekuk ya stuuntesik te j-alwanejetike.
33 Melel te Diose jaʼ jun Dios te ya yakʼ lamalkʼinal sok chajpanbil ta lek spisil te bintik ya spase.
Jich te bin-utʼil yak ta pasel ta spisil te congregacionetik yuʼun te machʼatik chʼultesbilik,
34 te manchuk ya xkʼopojik ta congregacionetik te antsetike, melel ma xjuʼ ya xkʼopojik stukelik. Jaʼ lek te akʼa yakʼ sbaik ta wentainele, jich te bin-utʼil ya yal te Leye.
35 Teme ay bin ya skʼan ya snaʼbeyik swentail, akʼa sjojkʼoybeyik te smamalalik ta snaik, melel kʼexlaltik sba te ya xkʼopoj jtul ants ta congregación.
36 ¿Yuʼunbal jaʼ chiknaj tal ta atojolik te skʼop Diose? ¿Yuʼunbal jaʼexnax te jul ta atojolike?
37 Teme ay machʼa ya skuy sba ta j-alwanej o teme ay akʼbil smajtan yuʼun te chʼul espiritue,* yame skʼan ya snaʼ te jaʼ mantaliletik yuʼun te Kajwaltik te bin yakon ta stsʼibaybelexe.
38 Pero, teme ay machʼa ma xyichʼ ta wenta ini, jaʼnix jich ma x-ichʼot ta wenta-euk.*
39 Jich yuʼun, kermanotak, pasaikxan tulan te ya xkʼopojex ta skʼop j-alwanej sok mame xa akomik te machʼatik ya xkʼopojik ta yantik kʼopiletik.
40 Pero, spisil te bintik ya apasike yichʼojuk swentail sok chajpanbiluk ta lek.
Notaetik
^ O «flauta».
^ O «ma lekuke».
^ O jaʼniwan ya skʼan ya yal «te machʼa ma xkʼot ta yoʼtan yuʼun-nanix ma xkʼot ta yoʼtan-a».
