Sbabial carta ta stojol te Corintioetik 16:1-24
16 Jich yuʼun, ta swenta te stsobel takʼin ta stojol te machʼatik chʼultesbilike, jichme xa apasik te bin-utʼil la kal jilel ta mantal ta congregacionetik te ayik ta skʼinal Galacia.
2 Te sbabial kʼajkʼal yuʼun te jujun semana, ta jujuntulex parteme xa awakʼik te jayeb ya akʼan ya awakʼik jaʼ chikan te bin-utʼil ya xjuʼ awuʼunike yuʼun jich ma jaʼukto ya xjajch atsobik-a te kʼalal ya xkʼoone.
3 Te kʼalal ya xkʼoone, yame jtikun bael ta Jerusalén te winiketik te jaʼexnix ya awalbonik ta acartaik te tsabil awuʼunike yuʼun jich ya yichʼik bael te majtanil te la awakʼik sok slekil awoʼtanike.
4 Teme jich ya skʼan te ya xboon-euke, yame sjokinonik bael.
5 Ya xkʼot kilex te kʼalal kʼaxemonix ta Macedonia-ae, melel ya xkʼaxon ta Macedonia,
6 sok yaniwan xjil jokinex junuk tiempo o teyniwan ya xkʼax kuʼun-a te yorail sike, yuʼun ya ajokinonik bael jmajkʼuk ta be te banti ya xboone.
7 Melel ma jkʼan te bueltanax ya xkʼax kilexe, jaʼ ya jkʼan te ya xjalajon te banti ayex teme jich ya skʼan te Jehová.*
8 Pero yananix xjilon ta Éfeso-a jaʼto ta Kʼin yuʼun Pentecostés,
9 melel jambotonxan mukʼul tiʼnail ta spaselxan mukʼul aʼtelil manchukme bayal machʼatik ya xkontrainwanik.
10 Teme ya xkʼot te Timoteo te banti ayexe, lekukme xa awikʼ ta atojolik yuʼun jich ma xiw yoʼtan, melel yak ta aʼtel ta stojol te Jehová* jich bin-utʼil te joʼone.
11 Jich yuʼun mame ayuk machʼa ya spejkʼanbey skʼoplal. Koltayaik yuʼun jich ay lamalkʼinal ta stojol te kʼalal ya xtal te banti ayone, melel yakotik ta smaliyel sok te hermanoetike.
12 Ta swenta te kermanotik Apolos, bayal buelta la jkʼanbey te yakuk xtal yilex sok te yantik kermanotaktike. Ma jichuk snopoj te ya xbajt yilex ta ora ini, pero ya xbajt yilex te bin-ora ya xjuʼ yuʼune.
13 Wikʼilukme asitik, ayukme yip te schʼuunel awoʼtanik, mame xiwex, ayukme yip awoʼtanik.
14 Spisil te bin ya apasike jaʼukme ta swenta skʼuxul awoʼtanik.
15 Ay bin ya jkʼan ya kalbeyex, kermanotak. Anaʼojik te jaʼ sbabial ochik ta jchʼuunjel te machʼatik ayik ta sna te Estéfanas te ayik ta skʼinal Acaya, jaʼik te machʼatik la yakʼ sbaik ta abatinel ta stojol te machʼatik chʼultesbilike.
16 Jaʼnix jichex-euk, akʼa abaik ta wentainel yuʼun te machʼatik jich stalelik ini sok spisil te machʼatik ya xkoltaywanik sok te tulan ya x-aʼtejike.
17 Tseʼelnax koʼtan yuʼun te tal yilon te Estéfanas, te Fortunato sok te Acaico, melel jaʼ la yakʼbonik smukʼul koʼtan te bitʼil maba liʼ ayex te jaʼexe.
18 Jaʼ la yakʼbonikxan yip koʼtan sok la yakʼbeyex yip awoʼtanik-euk. Jich yuʼun akʼaik ta ilel te ay skʼoplal ta awoʼtanik te winiketik te jich stalelik te bin-utʼil ini.
19 Ya stikunbeyex spatjibal awoʼtanik te congregacionetik te ay ta skʼinal Asia. Sok yutsil yoʼtanik ya stikunbeyex spatjibal awoʼtanik ta swenta Kajwaltik te Áquila sok te Prisca* soknix te congregación te ya stsob sba ta snae.
20 Ya stikunbeyex spatjibal awoʼtanik spisil te kermanotaktike. Te kʼalal ya apatbey aba awoʼtanik, talel kʼaxel ujtsʼuya* abaik.
21 Joʼon Pabloon, te la jtsʼibaybeyex ta jkʼab te spatjibal oʼtanil ini.
22 Teme ay machʼa maba kʼux ya yaʼiy ta yoʼtan te Kajwaltike, akʼa yichʼ lajinel. ¡Kajwaltik, laʼme!
23 Ayukme ta atojolik te slekil yoʼtan te Kajwaltik Jesús te ma snujpʼuk ya kichʼtike.
24 Ta apisilik ayukme ta atojolik te skʼuxul koʼtan te bitʼil jun-nax ayotik sok te Cristo Jesús.
Notaetik
^ O «Priscila».
^ O «bujtsʼia». Te jchʼuunjeletik ya yujtsʼuy sbaik ta schoik te kʼalal ya spatbey sba yoʼtanik-ae.
