Sbabial carta ta stojol te Corintioetik 3:1-23
3 Jich yuʼun, kermanotak, maba juʼ la jkʼoponex jich bin-utʼil te machʼatik yichʼojik te chʼul espiritue,* jich la jkʼoponex te bin-utʼil machʼatik ya spasik te bin ya skʼan te chʼichʼbakʼete, jich bin-utʼil chʼin alaletik ta stojol te Cristo.
2 La kakʼbeyex awuchʼik leche, maba la kakʼbeyex tulan weʼelil, melel mato xjuʼ awuʼunik-a. Jaʼnix jich, ta ora ini mato xjuʼ awuʼunik,
3 melel ayexto ta swenta te chʼichʼbakʼet, ayto sbikʼtal awoʼtanik sok yato atsak abaik ta kʼop, ¿mabal ayukex ta swenta chʼichʼbakʼet sok mabal jichuk atalelik te bin-utʼil te ants winiketike?
4 Te kʼalal ay machʼa jich ya yal «Joʼon jtʼunoj te Pablo», te yane jich ya yal «Joʼon jtʼunoj te Apolos», ¿mabal jichuk atalelik te bin-utʼil machʼatik ayik ta swenta chʼichʼbakʼet?
5 ¿Machʼa-a te Apolos? ¿Machʼa-a te Pablo? Jaʼik j-abatetik yuʼun Dios te la skoltayex yuʼun jich ochex ta jchʼuunjel, jaʼ chikan te bin-utʼil akʼbot yaʼtelik ta jujuntul yuʼun te Kajwaltike.
6 Joʼon la jtsʼun, te Apolos la yakʼbey yaʼlel, pero jaʼ la yakʼ chʼiuk te Diose,
7 jich yuʼun ma jaʼuk ay skʼoplal te machʼa ya stsʼun sok te machʼa ya yakʼbey yaʼlele, jaʼnax ay skʼoplal te Dios te ya yakʼ chʼiuke.
8 Jun-nax te bin ya skʼan ya staik te machʼa ya stsʼun sok te machʼa ya yakʼbey yaʼlele, pero ta jujuntul ya yichʼik akʼbeyel smajtanik jaʼ chikan te bin-utʼil aʼtejik.
9 Melel joy jbatik ta aʼtel ta stojol te Diose. Jaʼex lumkʼinalex yuʼun te Dios te yak ta tsʼunbajel tey-ae, naex yuʼun te Diose.
10 Ta swenta te slekil yoʼtan Dios te ma snujpʼuk ya kichʼtik te yakʼojbon kile, joʼon la kakʼbey yiptajib jich bin-utʼil te machʼa pʼijuben ta spasel naetik, pero yan machʼa yak ta stsʼakel moel. Akʼa yil ta jujuntul te bin-utʼil yak ta stsʼakel moele.
11 Maʼyuk machʼa ya xjuʼ ya yakʼbey yan yiptajib te bin-utʼil ochemixe, jaʼ-abi jaʼ te Jesucristo.
12 Jich yuʼun, ay machʼa ya xjuʼ ya stsʼak moel ta oro, plata sok tʼujbil tonetik, o sok teʼ, ak sok kʼajben ta sba te yiptajib te nae.
13 Yame xbajt chiknajuk ta ilel te bin yilel yaʼtel te jujuntule. Yame xchiknaj te kʼalal ya xkʼot skʼajkʼalele, melel ta swenta kʼajkʼ ya xchiknaj; yame yichʼ tsajel ta kʼajkʼ te bin yilel te yaʼtelik ta jujuntule.
14 Teme ay machʼa maba jin te yaʼtel te la stsʼak moel te banti yichʼoj yipe, yame yichʼ smajtan.
15 Teme ay machʼa ya xkʼajkʼ te yaʼtel la spase, yame sta swokol yuʼun, pero yame xkol stukel; manchukme jich te bin-utʼil machʼa ya xkol lokʼel tal ta kʼajkʼe.
16 ¿Yuʼunbal ma anaʼojik te jaʼ temploex yuʼun te Diose sok te ay ta atojolik te chʼul espíritu* yuʼun te Diose?
17 Teme ay machʼa ya sjin te templo yuʼun te Dios, yame yichʼ lajinel yuʼun te Diose, melel chʼultesbil te templo yuʼun te Diose, jaʼex te templo-abi.
18 Mame ayuk machʼa ya sloʼlay sba: teme ay machʼa pʼij ya skuy sba ta balumilal ini, akʼame skuy sba te maʼyuk bin ya snaʼ yuʼun jich ya sta spʼijil yoʼtan.
19 Melel te pʼijilal yuʼun te balumilal ini jowilkʼop ta sit te Diose, jich te bin-utʼil tsʼibaybil: «Te Dios ya syak ta swenta skʼopik te machʼatik ay spʼijilik».
20 Jaʼnix jich tsʼibaybil: «Te Jehová* snaʼoj te maʼyuk swentail te bin ya yalik te machʼatik pʼijike».
21 Jaʼ yuʼun mame ayuk machʼa toyol skʼoplal ya yaʼiy sba ta swenta te bin ya spas jtul ants winik, melel spisil la yakʼbeyex te Diose yuʼun jaʼ awuʼunik ya xkʼot:
22 chikan teme jaʼ te Pablo, Apolos, Cefas,* te balumilal, te kuxlejal, te lajel, te bintik ay ta ora ini, te bintik ya x-ayin ta pajel chaʼbej. Spisil jaʼ awuʼunik.
23 Jaʼ yuʼunex te Cristo, sok jaʼ yuʼun Dios te Cristo.
Notaetik
^ Jaʼ yan sbiil te Pedro.
