Sbabial carta ta stojol te Corintioetik 4:1-21
4 Ya skʼan te jichuk ya yilotik te ants winiketik te bitʼil j-abatotik yuʼun Cristo sok te jwentainojtik te bintik mato yakʼoj ta naʼel te Diose.
2 Te bin ya skʼanik ta stojol te machʼatik ya swentainik te nae jaʼ te junuk yoʼtanike.
3 Maʼyuk lek skʼoplal ta koʼtan teme ya awichʼonik ta kʼope o teme ya yichʼonik ta kʼop te machʼatik ya xchajpanwanike. Ta melel, ni joʼukon-nix ya kichʼ jba ta kʼop.
4 Melel maʼyuk bin chopol* ya yalbon te koʼtane, pero maba ya skʼan ya yal-abi te tojone. Te machʼa ya yichʼon ta kʼope jaʼ te Jehová.*
5 Jich yuʼun mame x-ichʼawanex ta kʼop te kʼalal mato staoj yoraile, jaʼto te kʼalal ya xtal te Kajwaltike. Jaʼme ya slokʼes ta sakal kʼinal te bintik nakʼal ta ijkʼal kʼinal sok yame yakʼ ta naʼel te bin snopoj ta yoʼtanik ya spas te ants winiketike. Ta swenta-abi, ta jujuntul yame yichʼ albeyel yutsil skʼoplal yuʼun te Diose.
6 Kermanotak, la kalbeyex spisil ini yuʼun la kakʼ jba ta ejemplo sok te Apolos ta swenta alekilalik, yuʼun jich ya anopik ta jtojolkotik te mantalil ini: «Mame xjelawex-a te bin tsʼibaybile». Jich maba ya atoy abaik sok maba jtulnax te machʼa lek ya awilik sok te jaʼ ya akontrainik te yane.
7 ¿Bin yuʼun ya akuy te jaʼ mukʼxan akʼoplal ta stojol te yantike? ¿Aybal bin ay awuʼun te maba awichʼoj akʼbeyele? Jich yuʼun, teme awichʼojix akʼbeyele, ¿bin yuʼun te ya atoy aba yuʼune?
8 ¿Aybalix awuʼunik spisil? ¿Aybalix akʼulejalik? ¿Jajchexixbal ta wentainwanej te bitʼil mato tey ayotik-a te joʼotike? Kʼax lek te jajchukexix ta wentainwanej, yuʼun jich pajal ya xjajchotik ta wentainwanej-euk te jichuke.
9 Melel te Diose jich yilel te slajibal la yakʼotik ta ilel te bitʼil jpuk-kʼopotike, jich bitʼil te machʼatik chapalix skʼoplal te ya yichʼik milele, yakotik ta ilel ta komonsitil* yuʼun te balumilal, te chʼul-abatetik sok te ants winiketik.
10 Te joʼonkotike kuybilotik te ma jnaʼtik kʼinal ta swenta te Cristo, yan te jaʼexe kuybilex te ay apʼijilik ta swenta te Cristo; te joʼonkotike maʼyuk kiptik, yan te jaʼexe ay awipik; te jaʼexe ya awichʼik ichʼel ta mukʼ, yan te joʼonkotike ya kichʼtik pʼajel.
11 Jaʼto ta ora ini yakonkotik ta kʼaxel ta wiʼnal sok ta takintiʼil, maʼyuk lek jkʼuʼ jpakʼtik, kichʼojtik majel,* maʼyuk jnatik,
12 tulan aʼtejemonkotik sok jkʼabtik. Te kʼalal ya kichʼtik bolkʼoptayel, ya jkʼanbeytik bendición ta stojolik; te kʼalal ya kichʼkotik kontrainel, jun koʼtantik ya xkujch kuʼuntik;
13 te kʼalal ya sleonkotik ta kʼope, lamalnax koʼtantik ya jsutbeytik te skʼopike. Jaʼto ta ora ini, ta sit te ants winiketik jich kʼoemonkotik bin-utʼil kʼaʼpal yuʼun te balumilale, jaʼ te bin jkʼaxel maʼyukix skʼoplal.
14 Maba la jtsʼibaybeyex ini yuʼun ya kakʼex ta kʼexlal, jich yakon ta spasel yuʼun jich ya jtojobtesex te bin-utʼil kal jnichʼnab te kʼux ta koʼtane.
15 Manchukme ay 10 mil ta tul jtojobteswanejetik awuʼunik ta swenta te Cristo, ta melel maʼyuk bayal atatik; melel ta swenta te Cristo Jesús jich kʼoon bitʼil atatik ta swenta te lek yachʼil kʼope.
16 Jich yuʼun ya jkʼanbeyex wokol te yakuk akʼayinbonik te jtalele.
17 Jaʼ yuʼun ya jtikunbeyex ta atojolik te Timoteo, melel jaʼ jnichʼan te kʼux ta koʼtane sok te jun yoʼtan ta stojol te Kajwaltike. Jaʼ ya sjultesbeyex ta awoʼtanik te bin-utʼil nojpteswanon ta swenta te Cristo Jesús, jich te bin-utʼil yakon ta yakʼel ta nopel ta jujun congregación te bayuk ayike.
18 Ay machʼatik te ya stoy sbaik yuʼun ya skuyik te maba ya xtal kilexe.
19 Pero, teme jich ya skʼan te Jehová,* nopolme* ya xtal kilex, mame jaʼuk ya xbajt ta koʼtan te bin ya yalik te machʼatik ya stoy sbaike, pero ya jkʼan ya kil teme yichʼojik te yuʼel te Diose.
20 Te Wentainel* yuʼun te Dios ma jaʼuk skʼoplal kʼopetiknax, jaʼ skʼoplal te yuʼel te Diose.
21 ¿Bin ya akʼanik jiche? ¿Jaʼbal ya akʼanik te ya xtalon sok xul o wajchʼ? O ¿jaʼbal ya akʼanik te ya xtalon sok skʼuxul koʼtan sok slamalil koʼtan?
