Sbabial carta ta stojol te Corintioetik 5:1-13
5 Ta melel, la kichʼ albeyel te ay jtul ta awolilik te yak ta spasel mulwej,* te mulwej te yak ta spasele jaʼ kʼax tulan mulil te maʼyuk jich ya spasik te machʼatik maba schʼuunojik te Diose: te ay jtul winik te yikʼojbey yinam te state.
2 ¿Yato atoy abaik yuʼun-a? ¿Mabal jaʼuk ya skʼan te lajuk amel awoʼtanik yuʼune? La skʼan te lajuk alokʼesik ta awolilik te winik te yak ta spasel te mulil-abi.
3 Manchukme maba jokinejex sok jbakʼetal, jokinojex ta koʼtan, jich yuʼun la kichʼix ta kʼop te winik te jich la spase, jich kʼoem te jokinojex ta smelelile.
4 Te kʼalal ya atsob abaik ta swenta sbiil te Kajwaltik Jesús, sok te bitʼil anaʼojik te jokinojex ta koʼtan sok ta swenta yuʼel te Kajwaltik Jesuse,
5 akʼaik ta skʼab Satanás te winik-abi yuʼun jich ya yichʼ lokʼesel bael te mulil te la yotses tal ta congregacione, jichme lek ay-a te snopojibal yuʼun te congregación ta skʼajkʼalel te Kajwaltike.
6 Ma lekuk te ya atoy abaike. ¿Yuʼunbal maba anaʼojik te jtebnax levadura ya spajubtes skʼolol te harinae?
7 Lokʼesaik te pokoʼ levadura yuʼun jich yachʼil wotsʼbil harina ya xkʼoex te maba yichʼoj levadura, jich te bin-utʼil ayexe. Melel, te Cristo, te jkolel* tuminchij kuʼuntik yuʼun Pascua, la yichʼix akʼel ta milbil majtanil.
8 Jich yuʼun, te kʼalal ya jpastik te kʼine, mame jaʼuk ya jtuuntestik te pokoʼ levadura ni jaʼuk te levadura te ya yakʼ ta ilel mulil sok te bin chopole,* jaʼ akʼa jtuuntestik te pan te maba yichʼoj levadura te ya yakʼ ta ilel te bintik lek sok te bintik smelelile.
9 La jtsʼibaybeyex ta jun carta te manchuk ya ajokinikix te machʼatik ya spasik mulwej.*
10 Maba jaʼ la jkʼan kalbeyex te jkʼaxel maba ya ajokinikix te ants winiketik yuʼun te balumilal te ya spasik mulwej,* te ay sbikʼtal yoʼtanik, te ya x-elkʼajik o te machʼatik ya yichʼik ta mukʼ lokʼombaetik. Te jichuke, ya skʼan ya xlokʼex bael ta balumilal.
11 Pero, ta ora ini ya jtsʼibaybeyex te mame xa ajokinikix te machʼa ya skuy sba ta hermano te yak ta mulwej,* te ay sbikʼtal yoʼtan, te ya yichʼ ta mukʼ lokʼombaetik, te ya xbolkʼoptaywan, te ya xyakub o te ya x-elkʼaje. Jkʼaxel mame xa ajokinik te machʼa jich stalel-abi.
12 ¿Bin yuʼun te joʼon ya jchajpan te machʼatik ayik ta balumilale? ¿Mabal jaʼuk ay ta awentaik schajpanel te machʼatik ayik ta congregacione?
13 Yan stukel te machʼatik ayik ta balumilal jaʼ ya xchajpanot yuʼun te Diose. Jich yuʼun «lokʼesaik te machʼa chopol* ay ta awolilike».
