Sbabial carta ta stojol te Corintioetik 6:1-20
6 Teme ay jajch kʼop awuʼunik ta stojol yan, ¿bin-utʼil ay-a te ya xbajt akʼanik chajpanel yuʼun te machʼatik maba jchʼuunjeletik, te ma jaʼuk ta stojol te machʼatik chʼultesbilike?
2 ¿Yuʼunbal maba anaʼojik te machʼatik chʼultesbilik ya schajpanik te ants winiketik te ayik ta balumilale? Teme ya xbajt achajpanik te ants winiketik te ayik ta balumilal, ¿bin-utʼil ay-a te ma xjuʼ awuʼunik schajpanel te kʼopetik te maʼyuk lek skʼoplale?
3 ¿Yuʼunbal maba anaʼojik te ya xbajt jchajpantik te chʼul-abatetike? Teme jiche, ¿bin yuʼun te maba ya achajpanik te kʼopetik ta swenta te jkuxlejaltik liʼ ta balumilale?
4 Jich yuʼun, teme ya achajpanik kʼopetik ta swenta te jkuxlejaltike, ¿bin yuʼun ya awakʼ schajpanex te winiketik te maba ichʼbil ta mukʼ yuʼun te congregacione?
5 Jich ya kalbeyex ini swenta ya xkʼexawex-a. ¿Yuʼunbal maʼyuk jtuluk ta awolilik te ay spʼijil yoʼtan te ya xjuʼ ya schajpan te kʼop te ya xjajch ta yolil te awermanotakike?
6 Te bin yakex ta spasele jaʼ te ya awakʼ abaik ta chajpanel ta stojol juecetik te maba yichʼojik ta mukʼ te Diose.
7 Kʼax chʼayemex te bitʼil ya awakʼ abaik ta chajpanel ta stojol te juecetike. ¿Mabal jaʼuk lek te yakuk xkujch awuʼunik te bin ma stojiluk ya awichʼik pasbeyele? ¿Mabal jaʼuk lek te yakuk xkujch awuʼunik te ya sloʼlayexe?
8 Pero, jaʼexnix te ma stojiluk te bin ya apasik sok te ya xloʼlaywanexe, ¡jaʼ jich ya apasbeyik te awermanotakike!
9 ¿Yuʼunbal maba anaʼojik te maba ya yichʼik te Wentainel* yuʼun Dios te machʼatik maba toj yoʼtanike? Mame sloʼlayex te awoʼtanike.* Te machʼatik ya spasik mulwej,* te machʼatik ya yichʼik ta mukʼ lokʼombaetik, antsiwejetik, antsineletik, winiketik te ya skʼanik te ya xjokinotik ta wayel yuʼun yan winik, te machʼatik sjoy sbaik ta winikil te ya sjokin sbaik ta wayel,
10 te j-elekʼetik, te jbikʼtal-oʼtanetik, te jyakubeletik, te jbolkʼoptaywanejetik sok te jloʼlaywanejetik maba ya yichʼik te Wentainel* yuʼun te Diose.
11 Manchukme ay chaʼoxtulex te jich atalelik ta nailalto, la awichʼikix pokel, la awichʼikix chʼultesel sok toj la awichʼikix ilel ta swenta sbiil te Kajwaltik Jesucristo sok ta swenta te chʼul espíritu* yuʼun te Dios kuʼuntike.
12 Ya xjuʼ ya jpas spisil te bin ya jkʼane, pero ma spisil ya jta lekilal yuʼun. Ya xjuʼ ya jpas spisil te bin ya jkʼane, pero maba ya kakʼ te ay bin ya yuʼuntayone.
13 Te weʼelile jaʼ yuʼun te jchʼujtike; te jchʼujtike jaʼ yuʼun te weʼelile, pero te Diose yame slajin ta schebal. Te jbakʼetaltike ma jaʼuk yuʼun mulwej,* jaʼ yuʼun te Kajwaltike; te Kajwaltike jaʼ yuʼun te jbakʼetaltike.
14 Pero, te Dios la schaʼkuxajtes te Kajwaltike, jaʼnix jichotik-euk yame schaʼkuxajtesotik ta yolil te machʼatik lajemik ta swenta te yuʼele.
15 ¿Yuʼunbal maba anaʼojik te jun ay te abakʼetalik sok te sbakʼetal te Cristoe? ¿Yabal xjuʼ ya kakʼbey sjokin te sbakʼetal te Cristo sok te sbakʼetal te jmulawil antse? ¡Ma jichuk stukel-abi!
16 ¿Yuʼunbal maba anaʼojik te machʼa jun-nax ya yakʼ sba sok te jmulawil ants jun-nax sbakʼetal ya xkʼot sok? Melel jich ya yal te Diose: «Jun-nax sbakʼetal ya xkʼot ta schebalik».
17 Yan te machʼa jun-nax ya yakʼ sba sok te Kajwaltike jun-nax snopojibal yuʼunik ya xkʼot.
18 ¡Ananik ta stojol te mulweje!* Biluk muliletik te ya spas te ants winik maba ay ta sbakʼetal, pero te machʼa ya spas mulweje ya sta smul ta stojol te sbakʼetale.
19 ¿Yuʼunbal maba anaʼojik te jich kʼoemex te bin-utʼil templo yuʼun te chʼul espíritu* te jaʼ yakʼojbeyex te Diose? Jaʼnix jich, ma jaʼuk awuʼuninojix abaik,
20 melel toyol atojolik la awichʼik manel. Jich yuʼun tuuntesa te abakʼetalik ta yalbeyel yutsil skʼoplal te Diose.
Notaetik
^ O «Mame xa awakʼ abaik ta loʼlayel».
