Sbabial carta ta stojol te Corintioetik 7:1-40
7 Jich yuʼun, ta swenta te bintik la atsʼibaybonik tale, jaʼ lek te manchuk ya sjokin ta wayel ants te winike.
2 Ta skaj te bitʼil jaʼ baem ta yoʼtanik spasel mulwej* te ants winiketike, jaʼ lek te ayuk yinam te jujuntul winike sok te ayuk smamalal te jujuntul antse.
3 Te winike akʼame yakʼbey te bin ya skʼan* te yinam sok te antse akʼame yakʼbey te bin ya skʼan te smamalal.
4 Melel, ma jaʼuk stukel ya spasix ta mantal te sbakʼetal te antse, jaʼ ya xpasbotix ta mantal yuʼun te smamalale. Jaʼnix jich, ma jaʼuk stukel ya spasix ta mantal te sbakʼetal te winike, jaʼ ya xpasbotix ta mantal yuʼun te yiname.
5 Mame talel kʼaxeluk te ma xa akʼan ya ata abaik te kʼalal ya ajokin abaik ta wayele, jaʼnax teme jich achapojbeyik skʼoplal ta achebalik, jaʼ chikan te jayeb kʼajkʼal anopojik swenta jich ya awakʼbeyik yorail spasel oración; teme tsʼakaj te yorail achapojike, ya xjuʼ ya ata abaik yan buelta. Jichme maba ya xjuʼ ya spasex ta prueba te Satanás ta skaj te ma xjuʼ awuʼun skomel abaike.
6 Jich ya kalbeyex ini teme ya xjuʼ awuʼunik spasele, mame jaʼuk jun mantalil.
7 Koʼtanuk te jichuk spisil te winiketik te bin-utʼil te joʼone. Pero, ta jujuntul akʼbil smajtan yuʼun te Diose: yan smajtan te jtule, yan smajtan te yane.
8 Te machʼatik maba nujpunemik, jaʼnix jich te meʼba antsetik ya kaltiklanbey te jaʼ lek te jichuk ya xjilik te bin-utʼil te joʼone.
9 Pero, teme ma xjuʼ yuʼunik skomel sbaike, akʼa nujpunikuk. Melel jaʼ lekxan te ya xnujpunik, jaʼ ma lekuk teme ay machʼa yak ta kʼaxel swokol yuʼun te ay machʼa ya skʼan ya sjokin ta wayele.
10 Te machʼatik nujpunemike ya jpas ta mantal —ma joʼukon jmantal, jaʼ smantal te Kajwaltike— te manchuk ya yijkitay smamalal te antse.
11 Pero, teme ya yijkitay te smamalale, mame skʼan ya xchaʼnujpun, akʼa slekubtesbey sba yoʼtan sok te smamalale. Jich-euk te winike, mame skʼan ya yijkitay te yiname.
12 Pero, jich ya kalbey-euk te yantike —jich, joʼon ya kal, ma jaʼuk te Kajwaltike— teme ay jtul hermano te maba jchʼuunjel te yiname, teme jich ya skʼan te ants te ya x-ayin soke, mame xyijkitay te yiname.
13 Jaʼnix jich, teme ay jtul ants te maba jchʼuunjel te smamalal, teme jich ya skʼan te winik te ya x-ayin soke, mame xyijkitay te smamalale.
14 Melel te winik te maba jchʼuunjele chʼultesbil ya xkʼot ta swenta te yiname, jaʼnix jich te ants te maba jchʼuunjele chʼultesbil ya xkʼot ta swenta te hermanoe. Te manchuke, boloben skʼoplal te yal snichʼnabik te jichuke, pero ta ora ini chʼultesbilik.
15 Pero, teme ya skʼan ya xbajt* te machʼa maba jchʼuunjele, akʼa bajtuk. Jich yuʼun, te hermano o te hermana maba sujbil te ya yikʼ jilel te machʼa ya skʼan ya xbajte. Melel te Diose la yikʼex tal swenta ay lamalkʼinal awuʼunik.
16 Ants, ¿bin-utʼil ya anaʼ teme maba ya sta skolel te amamalal ta awentae? O, winik, ¿bin-utʼil ya anaʼ teme maba ya sta skolel te awinam ta awentae?
17 Jich yuʼun, ta jujuntul jichukme akʼa jiluk te bin-utʼil akʼot yuʼun te Jehová* sok te bin-utʼil ay-a te kʼalal ikʼot yuʼun te Diose. Jaʼme te mantalil te yakon ta yakʼel ta stojol spisil te congregacionetike.
18 Teme ay jtul winik te yichʼojix circuncisión-a* te kʼalal la yichʼ ikʼele, jich akʼa jiluk. Teme ay jtul winik te maba yichʼoj circuncisión-a te kʼalal la yichʼ ikʼele, mame xyichʼ circuncisión.
19 Maʼyuk skʼoplal te machʼa yichʼoj circuncisión* sok te machʼa maba yichʼoj circuncisione. Te bin mukʼ skʼoplale jaʼ te ya yichʼ chʼuunel te mantaliletik yuʼun te Diose.
20 Ta jujuntul jich akʼa jiluk te bin-utʼil ay-a te kʼalal la yichʼ ikʼele.
21 Teme mosoinbilat-a te kʼalal la awichʼ ikʼele, mame xa amel awoʼtan yuʼun-abi. Pero, teme ya xjuʼ te libre ya xjilate, akʼa aba ta libre.
22 Melel, te machʼa mosoinbil-a te kʼalal la yichʼ ikʼel yuʼun te Kajwaltike, ta ora ini akʼotix ta libre yuʼun te Kajwaltike. Jaʼnix jich, te machʼa maba mosoinbil-a te kʼalal la yichʼ ikʼele, ta ora ini jaʼ mosoinbilix yuʼun te Cristo.
23 Melel, toyol atojolik la awichʼik manel; jich yuʼun mame xa awakʼix abaik ta mosoinel yuʼun te ants winiketike.
24 Kermanotak, ta jujuntul jich akʼa jiluk ta stojol Dios te bin-utʼil ay-a te kʼalal la yichʼ ikʼele.
25 Jich yuʼun, ta swenta te achʼixetik* te mato tabilik ta winik, maʼyuk junuk mantalil ta stojolik te yaloj te Kajwaltike, pero ya kal te bin ya jnope, joʼon te la snaʼbon yoʼbolil jba te Kajwaltik yuʼun jich jun koʼtan ya kakʼ jba.
26 Ta swenta te wokol te kuxinel ta ora ini, ya kal te jaʼ lek te jichuk ya xjil te winik te bin-utʼil aye.
27 Teme ayix awinam, mame xa ale te bin-utʼil libre ya xjilat. Teme mato ayuk awinam, mame xa ale awinam.
28 Pero, teme ya xnujpunate, maba yakat ta spasel mulil. Sok teme ay jtul achʼix o kerem* te ya xnujpune, maba yak ta spasel mulil. Pero, te machʼatik ya xnujpune, yame sta swokolik ta skuxlejalik. Ma jkʼan te jichuk ya xkʼot ta atojolike.
29 Jaʼnix jich, kermanotak, ya kalbeyex te maʼyukix bayal tiempo. Ta ora bael ini, te machʼatik ay yinamik jichukme kʼoem te maʼyuk yinamik;
30 te machʼatik ya x-okʼike jichukme kʼoem te maba ya x-okʼik; te machʼatik tseʼel yoʼtanik jichukme kʼoem te maba tseʼel yoʼtanik; te machʼatik ay bintik ya smanik jichukme kʼoem te maʼyuk bin ay yuʼunik sok
31 te machʼatik yakik ta stuuntesel te bintik ay ta balumilale jichukme kʼoem te maba tsʼakal yakik ta stuuntesele. Melel yak ta jelonel te bintik yak ta kʼoel ta pasel ta balumilale.
32 Ta melel, jaʼ ya jkʼan te manchuk ay bin ya amel awoʼtanik yuʼune. Te winik te maba nujpunem jaʼ ya xbajt ta yoʼtan spasbeyel te yaʼtel te Kajwaltike, jaʼ ya sle te bin-utʼil lek ya x-ilot yuʼun te Kajwaltike.
33 Yan stukel te winik te nujpuneme jaʼ ya xbajt ta yoʼtan te bintik swenta te balumilal, jaʼ ya sle te bin-utʼil lek ya x-ilot yuʼun te yiname,
34 sok xatoj sba te yoʼtane. Te ants te maba nujpuneme sok te achʼix te maba tabil ta winik jaʼ ya xbajt ta yoʼtan spasbeyel te yaʼtel te Kajwaltike swenta chʼultesbil ya xkʼot te sbakʼetal sok te snopojibal yuʼune. Yan stukel te ants te nujpuneme jaʼ ya xbajt ta yoʼtan te bintik swenta te balumilal, jaʼ ya sle te bin-utʼil lek ya x-ilot yuʼun te smamalale.
35 Jich ya kalbeyex ini ta swenta alekilalik. Mame yuʼunuk ya jkomex, jaʼ ya jtijbeyex awoʼtanik yuʼun ya apasik te bin stojil sok te manchuk ay bin ya smakex yuʼun spisil-ora ya x-abatinex ta stojol te Kajwaltike.
36 Pero, teme ay machʼa ma snaʼ skomel te sbakʼetal ta skaj te maba nujpuneme sok teme maba jchʼielixe,* jaʼme ya skʼan ya spas ini: akʼa spas te bin ya skʼane, ma muliluk. Akʼa nujpunuk.
37 Yan teme ay machʼa yakʼoj ta yoʼtan te ma skʼan ya xnujpun sok teme ma puersauk ya yaʼiye, teme ya snaʼ skomel te sbakʼetale sok te staoj ta nopel te ma xnujpune, lek te jich ya spase.
38 Jich yuʼun, te machʼa ya xnujpune lek te jich ya spase, pero te machʼa ma xnujpune kʼax lekxan-a.
39 Te ants te nujpunem chukul kʼoem ta stojol te smamalal te jayeb kʼajkʼal kuxul te smamalale. Pero, teme laj te smamalal, libre ya xjil yuʼun ya xchaʼnujpun sok te machʼa ya skʼane, jaʼnax teme jaʼ ta swenta te Kajwaltike.
40 Pero, te bin ya kal te joʼone jaʼ tseʼelxan yoʼtan teme maba ya xchaʼnujpune. Schʼuunoj koʼtan-euk te kichʼoj te chʼul espíritu* yuʼun te Diose.
Notaetik
^ Te kʼopil pornéia ta griego kʼop te ya xchiknaj ta versículo ini, ay ta plural. Ilawil ta glosario, Mulwej.
^ Jaʼ te akʼa sjokin sbaik ta wayel.
^ O «x-ijkitaywan».
^ Smakojbey skʼoplal-euk te keremetik te mato sjokinojik ta wayel achʼixetik.
^ Jaʼ skʼoplal jtul achʼix o jtul kerem te maʼyuk machʼa sjokinojik ta wayele.
^ Jaʼ ya yalbey skʼoplal te kʼalal kʼaxemix yorail te jaʼnax ya skʼanik te ay machʼa ya xwayik soke.
