Sbabial carta ta stojol te Corintioetik 8:1-13
8 Ta swenta te weʼelil akʼbil ta stojol te lokʼombaetike, jpisiltik jnaʼojtik te bin-utʼil ay skʼoplale. Pero, teme ay bin ya jnaʼbeytik lek skʼoplale, ya yakʼ toybail; yan te kʼuxul oʼtanile ya yakʼ yip-oʼtanil.
2 Teme ay machʼa ya skuy te ya snaʼbey lek skʼoplale, mato snaʼbey lek skʼoplal spisil.
3 Pero, teme ay machʼa kʼux ta yoʼtan te Dios, yame xnaʼbot sba yuʼun te Diose.
4 Te bin-utʼil ay skʼoplal te sweʼel te weʼelil akʼbil ta stojol te lokʼombaetike, jnaʼojtik te jkʼaxel maʼyuk skʼoplal kuʼuntik te lokʼombaetik sok te jun-nax te Diose.
5 Manchukme kuybil te bayal diosetik ta chʼulchan sok ta balumilal, jich bitʼil te ay bayal diosetik sok ajwaliletik ta skʼopik,
6 yan te joʼotike jnaʼojtik te jun-nax Dios aye, jaʼ te Tatile, te jaʼ talem ta stojol spisil te bintik aye sok jaʼ kuxulotik yuʼun, sok jun-nax te Kajwaltike, jaʼ te Jesucristoe, jaʼ ta swenta te chiknaj spisil te bintik aye, jaʼ ta swenta te kuxulotike.
7 Pero, ma spisilik snaʼojik ini. Ta skaj te ay machʼatik la yichʼik ta mukʼ lokʼombaetik ta sjajchibalto, te kʼalal ya sweʼik te weʼelil-abi, ay bin ma lek ya x-albot yuʼun te yoʼtanik, melel jich ya yaʼiyik ta yoʼtanik te jaʼ akʼbil ta stojol te lokʼombaetik.
8 Pero, te weʼelile ma jaʼuk ya yakʼ xnoptsajotikxan* ta stojol te Diose. Teme maba ya xweʼotike, ma chopol jkʼoplaltik ya xkʼot yuʼun; teme ya xweʼotike, ma jaʼuk lekxan jkʼoplaltik ya xkʼot yuʼun.
9 Jich yuʼun tsajtayame* abaik yuʼun te bin ya aweʼik manchukme libre ayex ta spasel, yuʼun jich maba ya awakʼbey skʼojchin yokik te machʼatik pekʼel te schʼuunel yoʼtanike.
10 Melel, teme ay machʼa ya yilat te yakat ta weʼel ta templo yuʼun lokʼombaetik, jaʼat te anaʼojbeyix lek skʼoplale, ¿mabal yakuk xjuʼ x-albot yoʼtan te machʼa mato snaʼbey ta lek skʼoplal te ya xjuʼ ya sweʼ-euk te weʼelil te akʼbil ta stojol te lokʼombaetike?
11 Jich yuʼun, ta swenta te bin anaʼoj te jaʼate ya awakʼ ta chʼayel te machʼa mato ayuk yip te yoʼtane, jaʼ te awermano te jaʼnix jich laj Cristo ta stojole.
12 Te kʼalal jich ya ata amulik ta stojol te awermanotakike sok te ya awutsʼinbeyik yoʼtan te bitʼil pekʼelto te schʼuunel yoʼtanike, jich yakex ta stael amulik ta stojol te Cristo.
13 Jich yuʼun, teme ya skʼojchin yok te kermano ta skaj te bin ya jweʼe, maʼyuk bin-ora ya jweʼ tiʼbal swenta maba ya skʼojchin yok-a te kermanoe.
