Sbabial carta ta stojol te Corintioetik 9:1-27
9 ¿Yuʼunbal maba libre ayon? ¿Yuʼunbal ma jpuk-kʼopukon? ¿Yuʼunbal maba kiloj te Kajwaltik Jesuse? ¿Mabal jaʼukex sit kaʼtel ta swenta te Kajwaltike?
2 Manchukme ma jpuk-kʼopukon ya yilon te yantike, te jaʼexe jpuk-kʼopon ya awilonik. Melel te jaʼexe sello kʼoemex te ya yakʼ ta naʼel te jpuk-kʼopon yuʼun te Kajwaltike.
3 Jich ya jsutbey skʼop te machʼatik ya slebonik jmule.
4 ¿Mabal yakuk xjuʼ kuchʼtik sok ya jweʼtik te bin ya jkʼantike?
5 ¿Yuʼunbal ma xjuʼ ya kinamintik jtul jchʼuunjel ants yuʼun ya sjokinotik ta beel, jich te bitʼil ya spasik te yantik jpuk-kʼopetik soknix te yijtsʼinab te Kajwaltik soknix te Cefas?*
6 O ¿joʼon-naxbal sok te Bernabé te ya skʼan ya x-aʼtejonkotik yuʼun ya jtatik te bintik ya xtuun kuʼunkotike?
7 ¿Aybal jtuluk soldado te jaʼnix ya stoj te bintik ya xtuun yuʼune? ¿Aybal machʼa ya stsʼun tsʼusub te maba ya sloʼbey te site? ¿Aybal machʼa ya skanantay tuminchijetik te maba ya yuchʼbey jtebuk te leche yuʼun te tuminchijetike?
8 ¿Skʼopnaxbal ants winik te bin yakon ta yalele? ¿Yuʼunbal ma jichuk ya yal-euk te Leye?
9 Melel jich tsʼibaybil ta Ley yuʼun Moisés: «Mame xa awakʼbey sbozal* te toro te kʼalal ya spechʼ ta tekʼel te trigoe». ¿Yuʼunbal jaʼ ayxan skʼoplal ta yoʼtan Dios te toroetike?
10 O ¿mabal jaʼuk la yal ta jtojoltik? Jich, jaʼ la yichʼ tsʼibayel ta jtojoltik, melel te winik te ya schajpanbey slumil te bin ya yichʼ tsʼunele sok te winik te ya spechʼbey ta tekʼel te sit te trigo ya smaliyik te ya yichʼbeyik jtebuk sit te yaʼtelike.
11 Teme la jtsʼunkotik ta atojolik te bintik swenta skʼop Dios, ¿chopolbal* teme ya awakʼbonkotik jtebuk te bintik ya xtuun kuʼunkotike?
12 Teme ay jich yakex ta skoltayel yantik, ¿mabal kʼaxukxan jich ya skʼan ya awakʼbonkotik-a te joʼotike? Manchukme jich-abi, maba jkʼanojkotik te bin ay ta jwentatik skʼanele, spisil kujchem kuʼuntik swenta maʼyuk bin ya smakex ta swenta te lek yachʼil kʼop yuʼun te Cristo.
13 ¿Yuʼunbal maba ya anaʼik te ya sweʼik te bintik ay ta templo te machʼatik ya spasik te chʼul aʼtelil tey-ae sok te tey ya xweʼik-euk-a te machʼatik spisil-ora ya x-aʼtejik te banti ay te skajtajib chikʼbil majtanile?
14 Jaʼnix jich la yal ta mantal te Kajwaltik ta stojol te machʼatik ya scholik te lek yachʼil kʼop te jaʼ akʼa weʼukik-a ta swenta te lek yachʼil kʼope.
15 Pero, te joʼone maʼyuk bin jkʼanoj ta atojolik. Ta melel, ma jaʼuk ya jtsʼibaybeyex ini yuʼun ya jkʼan te jich ya apasbonike, te jichuke jaʼ lek te ya xlajone. ¡Maʼyuk machʼa ya xjuʼ ya spojbon te stseʼelil koʼtan ta swenta te jich ya jpase!
16 Jich yuʼun, teme ya jchol te lek yachʼil kʼope, maʼyuk bin ya xjuʼ ya jtoy jba yuʼun, melel yuʼun-nanix jich ya skʼan ya jpas-a. ¡Yame jta jwokol teme maba ya jchol te lek yachʼil kʼope!
17 Teme ya jpas sok spisil koʼtan te aʼtelil ini, yame jta jmajtan yuʼun; manchukme ma jkʼan ya jpas, yananix jpas-a, melel jaʼ te aʼtelil te la kichʼ akʼbeyel ta jwenta.
18 Jich yuʼun, ¿bin-a te majtanil te ya kichʼ akʼbeyele? Jaʼ te maba ya jkʼanbey stojol te kʼalal ya jchol te lek yachʼil kʼop yuʼun jich maba ya xjelawon ta skʼanel te bin ay ta jwenta yichʼel ta swenta te ya jchol te lek yachʼil kʼope.
19 Manchukme libre ayon, kakʼoj jba ta mosoinel yuʼun spisilik swenta ya jpas ganar bayal ta tul ants winiketik te bantito ya xjuʼ kuʼune.
20 Ta stojol te judioetik la jpas jba ta judío yuʼun jich ya jpas ta ganar-a te judioetike. Te machʼatik wentainbilik yuʼun te ley jich la jpas jba te wentainbilon yuʼun te ley yuʼun jich ya jpas ta ganar-a te machʼatik wentainbilik yuʼun te ley, manchukme maba wentainbilon yuʼun te leye.
21 Te machʼatik maba wentainbilik yuʼun te ley jich la jpas jba te maba wentainbilon yuʼun te ley yuʼun jich ya jpas ta ganar-a te machʼatik maba wentainbilik yuʼun te ley, manchukme jaʼ swentainojon te ley yuʼun Dios te jaʼ ley yuʼun te Cristoe.
22 Ta stojol te machʼatik maʼyuk yip yoʼtanik jich la jpas jba te maʼyuk yip koʼtan yuʼun jich ya jpas ta ganar-a te machʼatik maʼyuk yip yoʼtanike. Jich la jpas jba-a te bin yilel spisil te ants winiketik yuʼun jich ay machʼatik ya sta skolelik ta swenta te jich la jpas jba-a te bin yilelike.
23 Pero, jich ya jpas spisil ta swenta te lek yachʼil kʼope, yuʼun jich ya kalbey yaʼiy-euk te yantike.
24 ¿Yuʼunbal maba anaʼojik te spisil te machʼatik ya x-animajik jtulnax te machʼa ya sta te smajtane? Animajanik yuʼun jich ya ataik te amajtanike.
25 Spisil te machʼatik ya x-animajik ya snaʼ skomel sbaik ta swenta spisil te bin ya spasike. Jich ya spasik yuʼun jich ya yichʼik jun corona te ya xlaje, yan te joʼotike jich ya jpastik yuʼun ya kichʼtik jun corona te ma xlaje.
26 Jich yuʼun, ma tojoluknax ya x-animajon, melel ay banti ya xkʼoon; maba ya kaʼiy majtamba te jaʼnax ya jmaj te ikʼe.
27 Te bin ya jpase jaʼ te ya jmaj* te jbakʼetal sok ya jmosoin yuʼun jich lek jkʼoplal ya xkʼoon ta stojol Dios te kʼalal jcholojbeyix skʼop Dios-a te yantike.
