Sbabial carta yuʼun Juan 3:1-24
3 ¡Ilawilik kʼaxto kʼuxotik ta yoʼtan te Tatile, melel ya kichʼtik albeyel te yal snichʼnabotik te Diose! Yuʼun-nix yal snichʼnabotik-a. Jaʼ yuʼun ma snaʼbotik jbatik te balumilale, melel ma snaʼbeyik sba te Diose.
2 Kermanotak te kʼuxex ta koʼtan, ta ora ini yal snichʼnabotikix te Diose, pero mato xchiknaj ta ilel te bin yilel ya xkʼootike. Jnaʼojtik te kʼalal ya xchiknaj tale, jich pajal ya xkʼootik sok te bin yilele, melel jich ya kiltik te bin-nix yilel-ae.
3 Spisil te machʼa jich ay smukʼul yoʼtan ta stojole yak ta sakubtesel sba, melel saknanix stukel-a.
4 Spisil te machʼa ya spas mulil yak ta skʼaxuntayel te ley; te mulil jaʼ te skʼaxuntayel te leye.
5 Jaʼnix jich anaʼojik te chiknaj ta jtojoltik yuʼun ya xchʼaybotik te jmultike, sok maʼyuk mulil ta stojol stukel.
6 Spisil te machʼa jun ay soke maba ya spas mulil; spisil te machʼa ya spas mulil maba yiloj sok maba ya snaʼbey sba.
7 Kal jnichʼnab, mame ayuk machʼa ya sloʼlayex. Te machʼa ya spas te bin stojil ta pasele yuʼunme toj yoʼtan, jich te bin-utʼil toj yoʼtan stukel.
8 Te machʼa ya spas te mulile talem ta stojol te Pukuje,* melel te Pukuj kʼalalto ta sjajchibal yak ta spasel mulil stukel. Jaʼ swentail ini te chiknaj te sNichʼan te Diose: jaʼ te ya sjinbey spisil yaʼtel te Pukuje.
9 Spisil te machʼa ayinem* ta stojol Dios maba ya spas mulil, melel te chʼul espíritu* yuʼun te Diose ay ta stojol, sok ma xjuʼ ya spas mulil, melel ayinem ta stojol Dios.
10 Te bin-utʼil ya yichʼ naʼbeyel sba te machʼatik yal snichʼnab Dios sok te machʼatik yal snichʼnab te Pukuje* jaʼ ini: te machʼa maba ya spas te bin stojil ta pasel sok te maba kʼux ta yoʼtan te yermanoe maba talem ta stojol Dios.
11 Melel te bin awaʼiyojbeyik skʼoplal kʼalalto ta sjajchibale jaʼ ini: jaʼ te talel kʼaxel kʼux ya kaʼiy jbatik ta koʼtantik;
12 mame jichukotik te bin-utʼil te Caín te talem ta stojol te Satanás* sok te la smil te yijtsʼine. ¿Bin yuʼun te la smile? Jaʼ yuʼun te chopol te yaʼtele, yan te yijtsʼine toj yaʼtel stukel.
13 Kermanotak, mame chamuknax awoʼtanik* yuʼun te ya spʼajex te balumilale.
14 Melel jnaʼojtikix te kʼaxemix kuʼuntik te lajel, ayix jkuxlejaltik, melel kʼux ta koʼtantik te kermanotaktike. Te machʼa maʼyuk skʼuxul yoʼtane ay ta stojol te lajele.
15 Spisil te machʼa ya spʼaj te yermanoe jaʼ jmilawal, sok anaʼojik te maʼyuk jtuluk jmilawal te ya xjuʼ ya x-ayin ta stojol te kuxlejalil ta sbajtelkʼinale.
16 Jich la jnaʼtik bin-a te kʼuxul oʼtanil ta swenta ini: melel la yakʼ skuxlejal ta jtojoltik, jaʼnix jich te joʼotik ya skʼan te ya kakʼtik jkuxlejaltik ta stojol te kermanotaktike.
17 Pero, teme ay machʼa ay bintik ay yuʼun ta balumilal ini sok te ya yil te ay bin ya xtuun yuʼun te yermanoe, pero teme maba ya skʼan ya snaʼbey yoʼbolil sbae, ¿bin-utʼil ya xjuʼ ya x-ayin te skʼuxul yoʼtan Dios ta stojole?
18 Kal jnichʼnab, mame ta jkʼoptiknax ni ta sbauknax ketik ya kaltik te kʼux ya kaʼiy jbatike, akʼa jpasbeytik yaʼtelul sok smelelilukme.
19 Jichme ya jnaʼtik te ayotik ta smelelil kʼop, jich maʼyuk bin ya snaʼulan te koʼtantik ta stojol te Diose,
20 manchukme ya yalbotik te koʼtantik te ay bin chopol* jpasojtik, te Dios jaʼ mukʼxan te bin-utʼil te koʼtantike sok spisil ya snaʼ stukel.
21 Kermanotak te kʼuxex ta koʼtan, teme ya yalbotik te koʼtantik te maʼyuk bin chopol* jpasojtike, jichme jamal ya xjuʼ ya jkʼopontik te Diose;
22 sok yame yakʼbotik spisil te bin ya jkʼanbeytike, melel yakotik ta schʼuunbeyel te mantaliletik yuʼune sok yakotik ta spasel te bin lek yoʼtan yuʼune.
23 Ta melel, jaʼ mantalil yuʼun ini: jaʼ te ayuk schʼuunel koʼtantik ta swenta sbiil te sNichʼan, jaʼ te Jesucristo, sok te talel kʼaxel kʼuxuk ya kaʼiy jbatike, jich te bin-utʼil la spasotik ta mantal.
24 Jaʼnix jich, te machʼa ya schʼuunbey te mantaliletik yuʼune jun ay sok te Diose, jich-euk te Dios jun ay sok te ants winik-abi. Ta swenta te chʼul espíritu* te la yakʼbotike, jich ya jnaʼtik te jun ayotik soke.
Notaetik
^ O «Diabloe».
^ O «pʼejkʼajem», «tojkem».
^ O «Diabloe».
^ Ta griego: «Machʼa Chopol».
^ O «chajpuknax ya awaʼiyik».
^ O «ma lek».
^ O «ma lek».
