Sbabial carta yuʼun Juan 4:1-21
4 Kermanotak te kʼuxex ta ko’tan, mame xa achʼuunik te ay bin ya awichʼik albeyel, te jich yilel te talem ta stojol Dios, ilawilik ta lek teme yuʼun-nix talem ta stojol Dios-ae, melel chiknajemix bayal lotil j-alwanejetik ta balumilal.
2 Te bin-utʼil ya xjuʼ ya anaʼik teme talem ta stojol Dios te bin ya yichʼ alel, jaʼ ini: spisil te bin ya yichʼ alel te ya yal ta jamal te xtaluk ta chʼichʼbakʼet te Jesucristoe talem ta stojol Dios-abi.
3 Spisil te bin ya yichʼ alel te ma xyal ta jamal ta swenta te Jesús maba talem ta stojol Dios. Te bin ya yichʼ alel-abi talem ta stojol te anticristo te awaʼiyojbeyik skʼoplal te ya xtal sok te liʼ ayix ta balumilal ta ora ini.
4 Kal jnichʼnab, te jaʼexe talemex ta stojol Dios sok atsalojikix te lotil j-alwanejetike, melel te machʼa jun ayex soke jaʼ kʼax mukʼxan-a te bitʼil machʼa jun ay sok te balumilale.
5 Jaʼ talemik ta stojol te balumilal; jaʼ yuʼun jaʼ ya yalbeyik skʼoplal te bintik talem ta swenta balumilal sok ya x-aʼiybotik skʼopik yuʼun te balumilale.
6 Yan te joʼotike talemotik ta stojol Dios. Te machʼa ya snaʼbey sba te Dios yame yaʼiybotik te jkʼoptike; te machʼa maba talem ta stojol Dios maba ya yaʼiybotik te jkʼoptike. Jichme ya jnaʼtik teme smelelil te bin ya yichʼ alel, o teme lotil te bin ya yichʼ alele.
7 Kermanotak te kʼuxex ta koʼtan, mame xkijkitaytik ta yakʼel ta ilel te talel kʼaxel kʼux ya kaʼiy jbatik, melel te kʼuxul oʼtanil jaʼ yuʼun te Diose, spisil te machʼa kʼux ta yoʼtan te yantike ayinem* ta stojol Dios sok ya snaʼbey sba te Diose.
8 Te machʼa maʼyuk skʼuxul yoʼtane yuʼun-nanix ma snaʼojbey sba-a te Diose, melel jkʼuxul-oʼtanil stukel te Diose.
9 Te bitʼil la yakʼ ta ilel te skʼuxul yoʼtan Dios ta jtojoltik jaʼ ini: te Dios la stikun tal ta balumilal te jip jtul sNichʼan yuʼun jich ya jta jkuxlejaltik ta swenta.
10 Jich ay skʼoplal te kʼuxul oʼtanile: ma jaʼuk te kʼux la kaʼiy ta koʼtantik te Diose, jaʼ kʼux la yaʼiyotik sok la stikun tal te sNichʼan yuʼun ya yakʼ ta milbil majtanil ta skaj te jmultik, yuʼun jich lek ya kil jbatik sok-a te Diose.
11 Kermanotak te kʼuxex ta koʼtan, teme jich kʼux la yaʼiyotik te Diose ya skʼan te jichnix talel kʼaxel kʼux ya kaʼiy jbatik-euke.
12 Maʼyuk jtuluk machʼa yiloj te Diose. Teme ma xkijkitaytik ta yakʼel ta ilel te talel kʼaxel kʼux ya kaʼiy jbatik, jichme ay ta jtojoltik te Diose sok yame xlekub te skʼuxul yoʼtan ta jtojoltike.
13 Ta swenta ini jich ya jnaʼtik te jun ayotik sok, jaʼnix jich jun ay ta jtojoltik-euk: jaʼ te yakʼojbotik te chʼul espíritu* yuʼune.
14 Jaʼnix jich, joʼotiknix kilojtik te la stikun tal te sNichʼan te Tatil, jich te bin-utʼil jkoltaywanej yuʼun te balumilal sok te ya kalbeytik skʼoplale.
15 Teme ay machʼa ya yal ta jamal te jaʼ sNichʼan Dios te Jesuse, te Dios jun ay sok te machʼa jich jamal ya yale, sok te machʼa jich jamal ya yale jun ay sok te Diose.
16 Te joʼotike la kilbeytikix te skʼuxul yoʼtan Dios ta jtojoltik sok ya schʼuun koʼtantik te kʼuxul oʼtanil-abi.
Jaʼ jkʼuxul-oʼtanil stukel te Diose, te machʼa ya x-ayin ta kʼuxul oʼtanil junme ay sok te Diose, sok te Diose jun ay ta stojol-euk.
17 Jaʼ jich te bin-utʼil lekubenix te kʼuxul oʼtanil ta jtojoltike, yuʼun jich jamal ya xjuʼ ya xkʼopojotik ta Skʼajkʼalel ichʼel ta kʼop,* melel jich te bin yilel te Jesucristo jaʼnix jich kileltik-euk ta balumilal.
18 Maʼyuk xiwel teme kʼux ta koʼtantik te Diose, te smelelil kʼuxul oʼtanil ya sten lokʼel te xiwele, melel te xiwel ya skomotik. Ta melel, maba lekubtesbil ta kʼuxul oʼtanil te machʼa ya xiwe.
19 Te joʼotike ya kakʼtik ta ilel kʼuxul oʼtanil, melel jaʼ nail kʼux la yaʼiyotik.
20 Teme ay machʼa ya yal «Kʼux ta koʼtan te Diose», pero teme ya spʼaj te yermano, jaʼ jpaslot stukel-abi. Melel te machʼa maba kʼux ta yoʼtan te yermano te ya yilbey site, ma xjuʼ kʼux ta yoʼtan te Dios te ma xyilbey sit stukele.
21 Jaʼ la yakʼbotik te mantalil ini: te machʼa kʼux ta yoʼtan te Diose, jaʼnixme jich kʼuxuk ta yoʼtan te yermanoe.
Notaetik
^ O «pʼejkʼajem», «tojkem».
