Sbabial carta yuʼun Juan 5:1-21
5 Spisil te machʼa ya schʼuun te jaʼ Cristo te Jesús ayinem* ta stojol Dios. Spisil te machʼa kʼux ta yoʼtan te Diose jaʼnix jich kʼux ya yaʼiy ta yoʼtan-euk te yal snichʼnab te Diose.
2 Ya jnaʼtik te kʼux ta koʼtantik te yal snichʼnab Dios teme ya jpastik ini: teme kʼux ta koʼtantik te Dios sok teme ya jchʼuunbeytik te mantaliletik yuʼune.
3 Jichme ya xchiknaj ta ilel te skʼuxul koʼtantik ta stojol te Diose: jaʼ te ya jchʼuunbeytik te mantaliletik yuʼun; sok maba wokol ta chʼuunel te mantaliletik yuʼune,
4 melel spisil te machʼa ayinem* ta stojol Dios ya stsal te balumilale. Te schʼuunel koʼtantik jaʼ stsaloj te balumilale.
5 ¿Machʼa ya xjuʼ ya stsal te balumilal? ¿Mabal jaʼuk te machʼa ya schʼuun te jaʼ sNichʼan Dios te Jesuse?
6 Jaʼ te machʼa tal ta swenta jaʼ sok ta chʼichʼ, jaʼ te Jesucristo; ma jaʼuknax ta swenta jaʼ, jaʼnix jich ta swenta jaʼ sok ta swenta chʼichʼ. Jaʼ jich jamal ya yalbey skʼoplal te chʼul espiritue,* melel jaʼ smelelil te chʼul espiritue.
7 Melel ay oxeb te jamal ya yalbeyik skʼoplale:
8 jaʼ te chʼul espíritu,* te jaʼ sok te chʼichʼ, jun-nax te bin ya yalik ta yoxebalik.
9 Ya jchʼuuntik te bin ya yalik te ants winiketik, pero jaʼ mukʼxan skʼoplal te bin ya yal te Diose. Melel te bin ya yalbey skʼoplal te Diose jaʼ ini: jaʼ te la yalbey skʼoplal te sNichʼane.
10 Te machʼa ya yakʼ schʼuunel yoʼtan ta stojol te sNichʼan te Diose ay ta yoʼtan te bin albil skʼoplale. Te machʼa maba ya yakʼ schʼuunel yoʼtan ta stojol te Diose jaʼ jpaslot ya yakʼ xkʼot te Diose, melel maba schʼuunoj te bin yaloj Dios ta swenta te sNichʼane.
11 Jaʼ ini, jaʼ te bin ya yichʼ albeyel skʼoplale: jaʼ te la yakʼbotik jkuxlejaltik sbajtelkʼinal te Diose, te kuxlejalil-abi ay ta swenta te sNichʼane.
12 Te machʼa ya schʼuun te Nichʼanil ya sta te kuxlejalil-abi; te machʼa maba ya schʼuun te sNichʼan Dios maba ya sta te kuxlejalil-abi.
13 Ya jtsʼibaybeyex ini yuʼun ya anaʼik te ya ata akuxlejalik ta sbajtelkʼinal, jaʼex te machʼatik ya awakʼ schʼuunel awoʼtanik ta sbiil te sNichʼan te Diose.
14 Jaʼ smukʼul koʼtantik ini te ya xjuʼ te jamal ya jkʼopontik te Diose: jaʼ te ya xjuʼ ya jkʼanbeytik chikan bin-a, jaʼnax teme jun ay sok te skʼanojel yoʼtane, yame yaʼiybotik te jkʼoptike.
15 Teme ya jnaʼtik te ya yaʼiybotik jkʼoptik te kʼalal chikan bin-a te ya jkʼanbeytike, ya jnaʼtik te ya kichʼtik te bin ya jkʼantik, melel jaʼ ya jkʼanbeytik.
16 Teme ay machʼa ya yil te yak ta spasel mulil te yermano te maba ya x-ikʼot bael ta lajel yuʼune, akʼa skʼopon Dios ta stojol, jichme ya x-akʼbot skuxlejal yuʼun te Diose. Jaʼme ta stojolik te machʼatik ya spasik mulil te maba ya x-ikʼotik bael ta lajel yuʼune. Pero ay mulil te ya x-ikʼawan bael ta lajele. Ta swenta te machʼa ya spas te mulil-abi ya kalbeyex te ma xa akʼoponik Dios ta stojole.
17 Jaʼ mulil spisil te bintik ma tojuk ta pasele, pero ay mulil te maba ya x-ikʼawan bael ta lajele.
18 Jnaʼojtik te maba ya spas mulil spisil te machʼa ayinem* ta stojol Dios, melel te machʼa* ayin ta stojol Dios ya xkanantayot yuʼun, sok maba ya x-utsʼinot yuʼun te Satanase.*
19 Jnaʼojtik te talemotik ta stojol Dios, pero jaʼ ay ta skʼab swolol balumilal te Satanás.*
20 Sok jnaʼojtik te xtaluk ta balumilal te sNichʼan te Diose, sok yakʼojbotik spʼijil koʼtantik yuʼun ya jnaʼbeytik sba te machʼa smelelile. Jun ayotik sok te machʼa smelelil ta swenta te sNichʼan, jaʼ te Jesucristo. Jaʼ-abi jaʼ te smelelil Dios sok jaʼ te kuxlejalil sbajtelkʼinal.
21 Kal jnichʼnab, tsajtayame* abaik yuʼun te lokʼombaetike.
Notaetik
^ O «pʼejkʼajem», «tojkem».
^ O «pʼejkʼajem», «tojkem».
^ O «pʼejkʼajem», «tojkem».
^ Jaʼ skʼoplal te Jesucristo, te sNichʼan te Diose.
^ Ta griego: «Machʼa Chopole».
^ Ta griego: «Machʼa Chopol».
^ O «ilame».
