Sbabial carta yu’un Pedro 3:1-22
3 Jaʼnix jich, antsetik te nujpunemexe, akʼa abaik ta wentainel yuʼun te amamalalik, yuʼun jich teme maba schʼuunojik te skʼop Diose, ya xjuʼ schʼuunik ta skaj te lek atalelik jaʼex te inamilex manchukme maʼyuk bin jpʼaluk ya awalik,
2 ta swenta te jaʼnix la yilik te lek atalelik sok te ya x-ichʼawanex ta mukʼe.
3 Mame jaʼuk kʼax mukʼ skʼoplal ta awoʼtanik te bin-utʼil ya achʼal* abaike, —jich te bitʼil ya achʼalik* te ajolik, te ya achʼal abaik ta oro o te ya atuuntesik kʼax lekil kʼuʼul pakʼal—,
4 jaʼukme ya achʼalik te bin ay ta awoʼtanik, jaʼ te achʼalilik te ma xlaj skʼoplal, te lamaluk awoʼtanik sok te mansouk awoʼtanik, jaʼ-abi lek ya yil te Diose.
5 Melel ta namey kʼinal jich la schʼal* sbaik te antsetik te chʼultesbilik te la yakʼ smukʼul yoʼtanik ta stojol Dios te kʼalal la yakʼ sbaik ta wentainel yuʼun te smamalalike,
6 jich te bin-utʼil te Sara te la schʼuunbey smantal te Abrahán sok te la yalbey kajwal. Te jaʼexe jaʼ yantsil yalatakex, jaʼnax teme spisil-ora ya apasik te bin leke, sok mame xa awakʼ stsalex te xiwele.
7 Jaʼnix jichex-euk, winiketik te nujpunemexe, ayukme spʼijil awoʼtanik* te bin-utʼil ya xkuxinex sok te awinamike. Ichʼaik ta mukʼ te ants jich te bin-utʼil vasija te oranax ya xwuy, melel pajal ya kichʼtik sok te kuxlejalil te ma snujpʼuk ya kichʼtike, jich maʼyuk bin ya smakex te kʼalal ya akʼoponik te Diose.
8 Ta slajibal, junuknaxme te bin ya snop awoʼtanike, kʼotuk ta awoʼtan te swokol te yantik, kʼuxme xa awaʼiy abaik jich te bin-utʼil kʼux ya yaʼiy sbaik te machʼatik jun-nax smeʼ statik, ayuk yutsil skʼuxul awoʼtanik sok ayukme spekʼelil awoʼtanik.
9 Mame xa asutbeyik ta bin chopol* te machʼa chopol bin ya spasbeyex, mame xa asutbeyik ta bolkʼop te machʼa ya yalbeyex bolkʼop. Te bin lekxan ta pasele, jaʼ te ya akʼanbeyik bendición ta stojol, melel jaʼ swentail te la awichʼik ikʼel, jichme ya awichʼik akʼbeyel bendición.
10 Melel «te machʼa ya skʼan kʼux ta yoʼtan te skuxlejal sok teme ya skʼan te leknax ya xkʼax yuʼun te jujun kʼajkʼale, yame skʼan ya skom te yakʼik ta yalel te bintik chopol* sok yame skʼan ya skom yeik ta loʼlaywanej.
11 Akʼa yijkitay spasel te bintik chopol* sok akʼa spas te bin leke; akʼa sle te lamalkʼinal sok akʼa stʼun bael.
12 Melel te sit te Jehová* ay ta stojol te machʼatik toj yoʼtanik sok ya yaʼiybey te skʼopik te kʼalal ya xkʼanbot wokol yuʼune, pero kontra ya yil Jehová* te machʼatik ya spasik te bin chopole».*
13 Ta melel, ¿machʼa ya yutsʼinex teme jaʼ ay ta awoʼtanik spasel te bin leke?
14 Manchukme ya xkʼax awokolik ta skaj te ya apasik te bin toj, tseʼel awoʼtanik. Pero mame xa axiʼik te bin ya xiʼike* sok mame ayuk bin ya snaʼulan awoʼtanik.
15 Jaʼ lekxan te ya achʼultes ta awoʼtanik te Cristo jich te bin-utʼil Kajwaltik, chapalukexme ta spisil-ora ta yakʼbeyel sujtib machʼauk-a te ya sjojkʼoybeyex ta swenta te bin yakex ta smaliyele, pero te kʼalal jich ya apasike ayukme smansoil awoʼtanik sok ichʼawananikme ta mukʼ.
16 Lekukme te bin ya yalbeyex te awoʼtanike, yuʼun jich ya xkʼexawik jilel te machʼatik chikan-nax te bin ya yal ta atojolik ta skontrainbelex ta skaj te lek atalelik jich te bitʼil jchʼuunjelexe.
17 Melel jaʼ lek te ya xkʼax awokolik ta skaj te jaʼ ya apasik te bin lek teme jich la skʼan yoʼtan Dios te ya xkʼot ta pasele, jaʼ wokol teme ya xkʼax awokolik yuʼun ta skaj te bin chopol* ya apasike.
18 Melel te Cristo ta jun-nax buelta laj ta swenta te jmultike, laj te machʼa toj yoʼtan ta stojol te machʼatik maba toj yoʼtanik, yuʼun jich ya yikʼex bael ta stojol te Diose. Akʼot ta lajel ta swenta chʼichʼbakʼet, pero chaʼkuxaj jich te bin-utʼil espíritu.
19 Jich bajt scholbey skʼop Dios te espirituetik te chukulik
20 te la skʼaxuntayik mantal ta namey kʼinal, te kʼalal jun yoʼtan yak ta smaliyel-a te Dios ta skʼajkʼalel te Noé, te kʼalal yak ta pasel-a te arca te banti waxaktulnax ants winiketik kolik ta jaʼ.
21 Te bin kʼot ta pasel ta nameye, jaʼ pajal sok te ichʼjaʼ* te ya yakʼbeyex akolelik ta ora ini (ma jaʼuk te ya slokʼesbey yabakul* te abakʼetalike, jaʼ te ya akʼanbeyik Dios te lekuk te bin ya yalbeyex te awoʼtanike) ta swenta te chaʼkuxaj te Jesucristoe.
22 Te Jesucristo ayix ta swaʼel kʼab te Diose, melel mo bael ta chʼulchan sok akʼbotix swentain te chʼul-abatetik, te machʼatik yichʼoj mukʼ yaʼtelik soknix te machʼatik ay yuʼelike.
Notaetik
^ O «achap».
^ O «atesik».
^ O «schap».
^ O «akʼaik ta ilel te ya awichʼik ta wenta».
^ O «ma lek».
^ O «ma lek».
^ O «ma lek».
^ O «ma leke».
^ O jaʼniwan ya skʼan ya yal «te manchuk ya axiʼik te bin ya xjuʼ ya spasbeyexe».
^ O «ma lek».
^ O «yijkʼalul».
