1 Reyes 10:1-29
10 Te ajwalil ants yuʼun Saba* la yaʼiybey skʼoplal te Salomón, melel pujk skʼoplal ta swenta te sbiil te Jehová. Jich yuʼun tal spasbey jojkʼoyeletik te wokol ta akʼbeyel sujtib yuʼun ya spas ta prueba.
2 Te ajwalil ants jokinbil kʼoel yuʼun bayal ta tul j-abatetik yuʼun te kʼalal kʼot ta Jerusalén. Yikʼoj kʼoel camelloetik te skuchtiklanoj aceite te sumet* yikʼ, bayal oro sok tʼujbil tonetik. Kʼot ta stojol te Salomón sok la yalbey yaʼiy spisil te bin ay ta yoʼtane.
3 Te Salomón la yakʼbey sujtib spisil te bin jojkʼoybote, maʼyuk bin-a te wokol la yaʼiye. Spisil la snaʼ scholbeyel skʼoplal.
4 Te k’alal la yilbey spisil te spʼijil yoʼtan te Salomón te ajwalil ants yuʼun Saba, te na te spasoj,
5 te weʼelil te ay ta smesa, te bitʼil nakajtik te j-abatetik yuʼun, te bitʼil ya skʼasesik weʼelil te j-abatetik yuʼun sok te bin yilel te skʼuʼ spakʼik, te kʼalal la yil te jkʼasesej copaetik yuʼun sok te chikʼbil majtaniletik te spisil-ora ya yakʼ ta sna te Jehová, chamnax yoʼtan* yuʼun.
6 Jaʼ yuʼun, jich la yalbey te ajwalil: «Spisil te bin la kaʼiy stojol ta jlumal ta swenta te bintik juʼem awuʼun spasel* sok te spʼijil awoʼtane yuʼun-nix melel-a.
7 Pero maba jchʼuunoj-a te bin la yalbonik kaʼiye, jaʼto te joʼon-nix tal kile. La kilix te maba staoj ni oliluk te bin la yalbonik kaʼiye. Te spʼijil awoʼtan sok te akʼulejal kʼax jelawenxan-a te bitʼil kaʼiyoj stojole.
8 ¡Tseʼelnaxme yoʼtan te awiniktak sok tseʼelnaxme yoʼtan te j-abatetik awuʼun te spisil-ora ya yaʼiyik stojol te spʼijil awoʼtane!
9 Ak’a yichʼ albeyel yutsil skʼoplal te Jehová te Dios awuʼun te lek la yilat sok te la yakʼ najkajat ta mukʼul naktajibal yuʼun Israel. Ta swenta te skʼuxul yoʼtan ta sbajtelkʼinal ta stojol te lum Israel, te Jehová la yotsesat ta ajwalil yuʼun toj ya xchajpanwanat sok toj ya xwentainwanat».
10 Jich yuʼun la yakʼbey te ajwalil 120 talento* yuʼun oro sok la yakʼbey kʼax bayal aceite te sumet* yikʼ soknix tʼujbil tonetik. Maʼyuk bin-ora la yichʼxan ichʼel tal kʼax bayal aceite te sumet yikʼ jich te bitʼil akʼbot te ajwalil Salomón yuʼun te ajwalil ants yuʼun Saba.
11 Te tsobol barcoetik yuʼun te Hiram te yichʼojik tal oro te talem ta Ofir, jaʼnix jich la yichʼ tal ta Ofir kʼax bayal sándalo-teʼetik soknix tʼujbil tonetik.
12 Jaʼ yuʼun, te ajwalil la stuuntes te sándalo-teʼ ta spasbeyel yiptajib te sna te Jehová soknix te sna te ajwalil. Jaʼnix jich la spas arpaetik sok aʼtejibaletik yuʼun música te ay scuerdail yuʼun te jkʼayojetik. Jaʼto ta ora ini, maʼyuk bin-ora jich la yichʼxan tal ichʼel bayal sándalo-teʼ sok maʼyuk bin-ora jich chiknajxan ta ilel.
13 Jaʼnix jich, te ajwalil Salomón la yakʼbey spisil te bintik la smulan sok te bintik kʼanbot yuʼun te ajwalil ants yuʼun Saba. Jaʼnix jich la yakʼbey spisil te bin lokʼ ta yoʼtan yakʼbeyele. Tey-abi sujt bael ta slumal te ajwalil ants sok spisil te j-abatetik yuʼune.
14 Te yalal te oro te la yichʼ akʼbeyel ta jujun jaʼbil te ajwalil Salomón jteb ma sta 666 talento,*
15 parte-a te patanil te la yichʼ akʼbeyel yuʼun te jchonbajeletik sok te jmanbajeletik, jaʼnix jich te patanil te la yichʼ akʼbeyel yuʼun spisil te ajwaliletik yuʼun te arabeetik sok te gobernadoretik yuʼun te lume.
16 Te ajwalil Salomón la spas 200 mukʼul majkilaletik ta oro te kapbil sok yan takʼin (te jujun majkilale yichʼoj 600 siclo* yuʼun oro),
17 jaʼnix jich la spas 300 chʼin majkilaletik* ta oro te kapbil sok yan takʼin (te jujun majkilale yichʼoj oxeb mina* yuʼun oro). Tey-abi, te ajwalil la yakʼtiklan ta Na ta teʼtikil yuʼun Líbano.
18 Te ajwalil jaʼnix jich la spas jun mukʼul naktajibal ta sbakel ye elefante sok la spots ta lekil oro.
19 La spas wak-kaj escalera te ya xkʼot te banti te mukʼul naktajibal, te smajkil spat sepel la yichʼ pasel sok la spasbey skajtajib kʼabal ta jujunjejch, jaʼnix jich la spas chaʼkojt león-chojetik te la yakʼ jujunkojt ta stsʼeel te skajtajib kʼabal yuʼun te mukʼul naktajibal.
20 Jaʼnix jich la yakʼ 12 ta kojt león-chojetik ta banti te wak-kaj escalera, jujunkojt ta jujunjejch yuʼun te wak-kaj escalerae. Maʼyuk yan ajwalil te jich la spase.
21 Spisil te copaetik yuʼun te ajwalil Salomón pastiklanbil ta oro sok spisil te aʼtejibaletik te ay ta Na ta teʼtikil yuʼun Líbano pastiklanbil ta batsʼil oro. Maʼyuk bin pastiklanbil ta plata, melel ta skʼajkʼalel te Salomón maʼyuk lek skʼoplal la yilik te platae.
22 Te ajwalil jaʼnix jich ay bayal barcoetik yuʼun ta mar te ya xbajtik ta Tarsis sok te barcoetik yuʼun te Hiram. Ta ox-oxeb jaʼbil te barcoetik te ya xtal ta Tarsis nojel ya xtal ta oro, plata, sbakel ye elefante, maxetik sok pavo real-mutetik.
23 Te ajwalil Salomón kʼax bayal skʼulejal sok kʼax bayal spʼijil yoʼtan te maba pajot yuʼun spisil te yantik ajwaliletik ta balumilal.
24 Bayal ants winiketik ta swolol balumilal la skʼan la yilik te Salomón yuʼun ya yaʼiybeyik te spʼijil yoʼtan te akʼbot yuʼun te Diose.
25 Ta jujun jaʼbil la yichʼbeyik tal smajtan te ajwalil jich bitʼil te bintik pastiklanbil ta plata, ta oro, kʼuʼul pakʼal, aʼtejibaletik yuʼun guerra, aceite te sumet* yikʼ, caballoetik sok mulaetik.
26 Te Salomón la stsob carretaetik sok caballoetik.* La stsob 1,400 ta kojt carretaetik sok 12 mil ta kojt caballoetik* sok la skojtanlan ta banti mukʼul lumetik te banti ay sna te carretaetik sok ta Jerusalén te banti ay te ajwalile.
27 Te ajwalil kʼax bayal plata la stsob ta Jerusalén te jich kʼot te bin-utʼil tonetik sok kʼax bayal la stsob cedro-teʼetik te jich kʼot te bin-utʼil te sicómoro-teʼetik ta Sefelá.
28 Te caballoetik yuʼun te Salomón la yikʼik tal ta Egipto; te jmanbajeletik yuʼun te ajwalil tsobol la smanik tal te caballoetik* jich te bitʼil chapbilix te ya yichʼ tojele.
29 Te jujunkojt carreta te la yichʼik tal ta Egipto jaʼ 600 ta sejp plata stojol, te jujunkojt caballoetik jaʼ 150 ta sejp plata stojol. Tey-abi, jaʼ ya schonbeyik spisil te ajwaliletik yuʼun te hititaetik sok te ajwaliletik yuʼun Siria.
Notaetik
^ O «Seba».
^ Ta yantik variante «xyukʼet».
^ Ta yantik variante «chajpnax la yil-a».
^ O «te bintik awaloj».
^ Jaʼ 4,104 kilo. Ilawil ta apéndice, B14.
^ Ta yantik variante «xjukʼet».
^ Jaʼ 22,777.2 kilo. Ilawil ta apéndice, B14.
^ Jaʼ niwan 6.84 kilo. Ilawil ta apéndice, B14.
^ Jaʼ chʼin majkilaletik te ya stuuntesik te j-akʼtʼimalteʼetik.
^ Jaʼ 1.71 kilo. Ilawil ta apéndice, B14. Te kʼalal ya yalbey skʼoplal jun mina ta hebreo kʼop jaʼ 570 gramo yalal.
^ Ta yantik variante «xyukʼet».
^ O «te machʼatik ya xkajajik ta caballoetik».
^ O «ta tul te machʼatik ya xkajajik ta caballoetik».
^ O jaʼniwan ya skʼan ya yal «ta Egipto o ta Coa; te jmanbajeletik yuʼun te ajwalil la smanik tal ta Coa», jaʼniwan skʼoplal te Cilicia.
