1 Reyes 11:1-43
11 Pero, te ajwalil Salomón kʼux la yaʼiy ta yoʼtan bayal jyanlum antsetik ma jaʼuknax te yantsil nichʼan te faraón: jaʼ te antsetik te talemik ta Moab, ta Ammón, ta Edom, ta Sidón sok ta Het.
2 Jaʼ te lumetik te jich yaloj te Jehová ta stojol te israeletik: «Mame xa awikʼ abaik sok,* jaʼnix jich mame skʼan ya xtal ta atojolik-euk, melel yame sjowijtesbeyex awoʼtanik yuʼun ya awichʼik ta mukʼ te diosetik yuʼunike». Pero, te Salomón jun yoʼtan kʼot ta stojolik sok kʼux la yaʼiytiklan ta yoʼtan.
3 Ayin 700 ta tul yinam, te jaʼik yantsil nichʼnab ajwaliletik, sok ayin 300 ta tul yantik yinam.* Kʼunkʼun jowijtesbot* yoʼtan yuʼun te yinamtak.
4 Te kʼalal mamalix-a te Salomón, jowijtesbot yoʼtan yuʼun te yinamtak swenta ya yichʼ ta mukʼ yantik diosetik sok ma junuk yoʼtan abatin ta stojol te Jehová te Dios yuʼun, jich bitʼil la spas te David te state.
5 Te Salomón la yichʼ ta mukʼ te Astoret te antsil dios yuʼun te sidonioetik sok te Milcom te dios yuʼun te ammonitaetik te ilobtik sbae.
6 Te Salomón jaʼ la spas te bintik ma lek ya yil te Jehová sok ma junuk yoʼtan la yakʼ sba ta stojol te Jehová jich te bitʼil la spas te David te state.
7 Te Salomón la spas jun toyol awilal* yuʼun te Kemós ta wits te ay ta yelaw te Jerusalén, jaʼ te dios yuʼun Moab te ilobtik sba, sok la spasbey-euk te Mólek te dios yuʼun te ammonitaetik te ilobtik sbae.
8 Jaʼnix jich la spasbey spisil te yantik yinam te talemik ta yan lum te ya yakʼik te xtomet schʼailel te chikʼbil majtanil yuʼunik sok te ya yakʼik milbil majtaniletik ta stojol te diosetik yuʼunike.
9 Te Jehová kʼax bayal ilin ta stojol te Salomón, melel jowij te yoʼtan sok namaj ta stojol te Jehová te Dios yuʼun Israel jaʼ te machʼa cheb buelta la yakʼ sba ta ilel ta stojol
10 sok te la yalbey ta jamal te manchuk ya yichʼ ta mukʼ yantik diosetik. Pero, te Salomón maba la schʼuun te bin albot ta mantal yuʼun te Jehová.
11 Jich yuʼun, te Jehová jich la yalbey te Salomón: «Ta skaj te jich la apas ini sok te maba la akʼotes ta pasel te chapbilkʼop kuʼun soknix te maba la achʼuun te bintik la kalbat ta mantale, yame jpojbat te wentainel awuʼun sok jaʼme ya kakʼbey jtuluk te j-abat awuʼune.
12 Pero, ta swenta te bin la kalbey ta jamal te David te atate, maba ya jpojbat te kʼalal kuxulat-to-ae. Jaʼme ya jpojbey ta skʼab te anichʼane.
13 Pero maba ya jpojbey spisil te bantito kʼalal ya xmantalaje. Yame kijkitaybey jchajp tsʼumbalil te anichʼan ta swenta te bin la kalbey ta jamal te David te j-abat kuʼun sok ta swenta te Jerusalén, jaʼ te mukʼul lum te tsabil kuʼune».
14 Te Jehová la yak’ chiknajuk jtul skontra te Salomón: jaʼ te Hadad te edomita-winik te talem ta stsʼumbal ajwalil ta Edom.
15 Kʼalal te David la stsal te Edom, te Joab, te capitán yuʼun te soldadoetik, mo bael ta smukel te machʼatik lajik sok kʼan smil spisil te winiketik yuʼun Edom.
16 (Te Joab sok spisil te soldadoetik yuʼun te Israel jilik wakeb u tey-a, jaʼto te kʼalal la smil spisil te winiketik yuʼun Edom).
17 Pero, te Hadad an bael sok chaʼoxtul edomitaetik te jaʼik j-abatetik yuʼun te state, bajtik ta Egipto. Chʼin keremto-a te Hadad.
18 Lokʼik bael ta Madián, kʼotik ta Parán. Jaʼnix jich la yikʼik bael chaʼoxtul winiketik yuʼun Parán, tey-abi kʼotik ta Egipto, te banti ay te faraón te ajwalil yuʼun Egipto. Te faraón la yakʼbey sna, sweʼel sok skʼinal te Hadad.
19 Te faraón lek la yil te Hadad te jich la yakʼbey yinamin te yijtsʼin te yinam. Te sbiil te yinam te faraón jaʼ Tahpenés te ajwalil ants.*
20 Te kʼalal kʼax te tiempoe, te yijtsʼin te Tahpenés ayin* jtul skerem-al sok te Hadad, Guenubat sbiil. Jich te Tahpenés la schʼites* te Guenubat ta sna te faraón. Te Guenubat nain ta sna te faraón sok te snichʼnab te faraón.
21 Te Hadad la yaʼiy stojol ta Egipto te wayix sbakʼetal te David sok te antiguo smeʼ stat sok te lajix te Joab te capitán yuʼun te soldadoetik. Jich yuʼun, te Hadad jich la yalbey te faraón: «Akʼawon bael ta jlumal».
22 Pero, jich albot yuʼun te faraón: «¿Yuʼunbal ay bin ma kakʼojbat te ya akʼan ya sujtat bael ta alumale?». Jich la yal te Hadad: «Maʼyuk, pero awokoluk, akʼawon bael».
23 Te Jehová la yak’ chiknajuk yan skontra te Salomón: jaʼ te Rezón snichʼan Eliadá, te lokʼem ta anel ta stojol te yajwal jaʼ te Hadadézer, te ajwalil yuʼun Zobá.
24 Kʼalal te David la stsal* te winiketik yuʼun Zobá: te Rezón la stsob winiketik sok och ta jwolwanej yuʼun jtsojb jpojbiluketik. Jich bajtik ta Damasco, tey jilik ta nainel-a sok jaʼ wentainwanik ta Damasco.
25 Te Rezón jaʼ skontra kʼot te lum Israel te jayeb kʼajkʼal kuxul ta kʼinal te Salomón sok la yakʼbeyxan swokol te lum Israel jich bitʼil la spas te Hadad. Kʼax bayal la spʼaj te lum Israel te jayeb tiempo wentainwan ta Siria.
26 Jaʼnix jich jajch stoy sba ta stojol te ajwalil te Jeroboán snichʼan Nebat te talem ta stsʼumbal Efraín te jaʼ slumal te Zeredá. Jaʼ jtul j-abat yuʼun te Salomón, meʼba ants te snane,* Zeruá sbiil.
27 Te bin swentail te la stoy sba ta stojol te ajwalil jaʼ ini: te Salomón la spas te chʼin wits* sok la smak te banti jamal te stsʼajkʼul te Mukʼul lum yuʼun David, te state.
28 Te Jeroboán jaʼ jtul winik te bayal bin ya snaʼ spasel. Te kʼalal la yil te Salomón te Jeroboán te jaʼ jtul kerem te ya snaʼ aʼtel ta lek, jaʼ la yakʼbey swentain ta yilel te tulan aʼtelil ya spasik te stsʼumbal José.
29 Ta yorail-abi, te Jeroboán lokʼ bael ta Jerusalén sok taot ta be yuʼun te j-alwanej Ahíya te talem ta Siló. Te Ahíya slapoj bael jlijkʼ yachʼil najtil kʼuʼul, schebaliknax tey ayik-a.
30 Te Ahíya la stsak te yachʼil najtil kʼuʼul te slapoj, la schʼiʼ* sok 12 ta lijkʼ la slokʼes-a.
31 Jich la yalbey te Jeroboán:
«Tsaka lajunlijkʼuk, melel jich yaloj te Jehová te Dios yuʼun Israel: ‹Yame jpojbey ta skʼab te Salomón te wentainel, te jaʼate yame kakʼbat lajunchajp tsʼumbalil.
32 Pero yame kijkitaybey jchajp tsʼumbalil te Salomón ta swenta te bin la kalbey ta jamal te David te j-abat kuʼun sok ta swenta te Jerusalén, jaʼ te mukʼul lum te tsabil kuʼun ta spisil te stsʼumbal Israel.
33 Jichme ya jpas ini ta skaj te la yijkitayon te lum kuʼun sok te yak ta snijanel sbaik ta stojol te Astoret te antsil dios yuʼun te sidonioetik sok ta stojol te Kemós te dios yuʼun Moab soknix ta stojol te Milcom te dios yuʼun te ammonitaetik. Maba stʼunojik te beetik kuʼun, maba spasojik te bin lek ta jsit, maba schʼuunojik te bintik kaloj sok maba yichʼojik ta mukʼ te bitʼil ya xchajpanwanon jich te bitʼil la spas te David, te stat te Salomón.
34 Pero maba ya jpojbey spisil te bantito kʼalal ya xmantalaj te Salomón. Jaʼme ya kakʼ jilel ta jwolwanej te jayeb kʼajkʼal kuxul ta swenta te bin la kalbey ta jamal te David te j-abat kuʼun, te joʼon-nix la jtsae, melel la schʼuun spasel te mantaliletik kuʼun sok te bintik kaloje.
35 Pero yame jpojbey ta skʼab te snichʼan te wentainel sok jaʼatme ya kakʼbat; yame kakʼbat lajunchajp tsʼumbalil.
36 Yame kakʼbey jchajp tsʼumbalil yuʼun Israel te snichʼane swenta maʼyuk bin-ora ya xtupʼ ta jtojol te tsumbil kʼajkʼ yuʼun te David te j-abat kuʼun ta Jerusalén, jaʼ te mukʼul lum te tsabil kuʼun te banti ya kakʼ te jbiile.
37 Jaʼatme ya jtsaat yuʼun ya awentain spisil te bin ya akʼane sok jaʼatme ya x-ochat ta ajwalil ta Israel.
38 Teme ya achʼuun spasel spisil te bintik ya kalbat ta mantal, teme ya atʼun te beetik kuʼun sok teme ya apas te bin lek ta jsit te kʼalal ya achʼuun spasel te bintik kaloj sok te mantaliletik kuʼun, jich te bitʼil la spas te David te j-abat kuʼune, yame jokinat-euk. Yame kakʼ te ya x-och ta ajwalil te atsʼumbal te maʼyuk bin-ora ya xlaj skʼoplal, jich te bitʼil la jpas ta stojol te David sok yame kakʼbat te lum Israel.
39 Ta skaj te bintik ma lek la spasik, yame jpejkʼanbey skʼoplal te stsʼumbal te David, pero maba ta sbajtelkʼinal›».
40 Jich yuʼun, te Salomón kʼan smil te Jeroboán, pero te Jeroboán an bael ta Egipto, te banti ay te Sisac, te ajwalil yuʼun Egipto. Tey jil ta nainel ta Egipto jaʼto te kʼalal laj te Salomón.
41 Te bintik la spas ta skuxlejal te Salomón, spisil te bintikxan la spas sok te spʼijil yoʼtane, tsʼibaybil jilel ta libro te ya scholbey skʼoplal te skuxlejal te Salomón.
42 Te Salomón la swentain 40 jaʼbil spisil te lum Israel ta Jerusalén.
43 Jich te Salomón way sbakʼetal sok te antiguo smeʼ stat sok la yichʼ mukel ta Mukʼul lum yuʼun David, te state. Tey-abi, jaʼ och jilel ta ajwalil te Rehoboam, te snichʼane.
Notaetik
^ O «Mame xnujpunex sok te antsetik yuʼunik».
^ O «monbot».
^ Jaʼ ya yalbey skʼoplal jtul ajwalil ants te maba ya xwentainwan.
^ Ta yantik variante «pʼejkaj», «tojk».
^ O jaʼniwan ya skʼan ya yal «la spojbey schuʼ».
^ Ta hebreo: «la smiltiklan».
^ Ta yantik variante «smeʼe», «smamae».
^ O «Miló». Jaʼ jpʼal kʼop ta hebreo kʼop te ya skʼan ya yal «butʼbil».
^ Ta yantik variante «xetʼ».
