1 Reyes 12:1-33
12 Te Rehoboam bajt ta Siquem, melel la stsob sbaik spisil te lum Israel ta Siquem yuʼun ya yotsesik ta ajwalil.
2 Te Jeroboán snichʼan Nebat la yaʼiy stojol te bin kʼot ta pasele (te Jeroboán ayto ta Egipto-a, melel lokʼem ta anel ta stojol te ajwalil Salomón sok yak ta nainel ta Egipto-a).
3 Ta yorail-abi la stikunik ta ikʼel te Jeroboán. Tey-abi, te Jeroboán sok spisil te lum Israel bajt yilik te Rehoboam sok jich la yalbeyik:
4 «Te yugo-te’* te la yakʼbotik te atate al ta kuchel. Pero, teme ya apejkʼanbonkotik te aʼtelil te ya jpastik sok teme ya apejkʼanbey yalal te yugo-teʼ te la yakʼbonkotik jkuchtik te atate, yame x-abatinonkotik ta atojol».
5 Jich albotik yuʼun te Rehoboam: «Sujtanik bael, laʼik ta yoxebal kʼajkʼal». Jich sujtik bael te ants winiketike.
6 Jich yuʼun, te Rehoboam la sjojkʼoybey te mamaletik* te abatinik ta stojol te Salomón te jaʼ te stat te kʼalal kuxulto-ae. Jich la sjojkʼoy: «¿Bin ya xjuʼ ya jsutbey awaʼiyik ta swenta te bin la yal te lume?».
7 Jich albot yuʼun te mamaletik:* «Teme ya awakʼ aba ta abatinel ta stojol te lum ini, teme ya apas te bin ya skʼanbatike sok teme lek ya asujtesbey te skʼopike, jichme spisil-ora jaʼ j-abatetik awuʼun».
8 Pero la spʼaj te tojobtesel akʼbot yuʼun te mamaletik,* jaʼ bajt sjojkʼoybey te machʼatik keremikto te pajal schʼielik soke, te jaʼ yakikix ta abatinel ta stojole.
9 Jich la sjojkʼoy te Rehoboam: «¿Bin ya xjuʼ ya jsutbey awaʼiyik ta swenta te jich la yal te lume: ‹Pejkʼanbeya yalal te yugo-teʼ* te la yakʼbonkotik jkuchtik te atate›?».
10 Jich albotik yuʼun te keremetik te pajal schʼielik soke: «Te ants winiketik te jich la yalbat: ‹Te yugo-te’* te la yakʼbotik jkuchtik te atate kʼax al; pejkʼanbeya yalal›, te xchiike, jichme xa awaltiklanbey: ‹Teme tulan la yak’ sba te jtat ta atojolik, kʼaxemtoxan tulan ya kakʼ jba-a te joʼone.
11 Te jtate la yakʼbeyex akuchik jun yugo-te’* te ale, yan te joʼone kʼaxtoxan al ya kakʼbeyex akuchik-a. Te jtate la smajex ta chicote, yan te joʼone yame jmajex ta chicote te ay stakʼinal te tsʼupajtik sniʼ›».
12 Te Jeroboán sok spisil te lum Israel bajt yilik te Rehoboam ta yoxebal kʼajkʼal jich te bitʼil albotik yuʼun te ajwalile: «Laʼik ta jtojol ta yoxebal kʼajkʼal».
13 Pero, te ajwalil tulan la sutbey skʼop te ants winiketik, maba la schʼuun te tojobtesel akʼbot yuʼun te mamaletik.*
14 Jaʼ la yal te bin albot yuʼun te keremetik te pajal schʼielik soke, jich la yal: «Te jtate la yakʼbeyex akuchik jun yugo-te’* te ale, yan te joʼone kʼaxtoxan al ya kakʼbeyex akuchik-a. Te jtate la smajex ta chicote, yan te joʼone ya jmajex ta chicote te ay stakʼinal te tsʼupajtik sniʼ».
15 Jich te ajwalil maba la yaʼiy stojol te bin la yal te lum Israel, melel jich la skʼan te Jehová te ya xkʼot ta pasel. Yuʼun jich ya xkʼot ta pasel te bin la yal te Jehová ta stojol te Jeroboán snichʼan Nebat ta swenta te Ahíya te talem ta Siló.
16 Kʼalal spisil te lum Israel la yil te maba aʼiybot skʼopik yuʼun te ajwalile, jich la yalbeyik te ajwalile: «¿Bin jwentatik-a te David? Maʼyuk bin yakʼojbotik te snichʼan Jesé. Lum Israel, baanik ta stojol te diosetik awuʼunike. ¡Jaʼuknix te David akʼa skanantay te snae!». Jich sujtik bael ta snaik* te lum Israel.
17 Pero, te Rehoboam wentainwan ta stojol te israeletik te ayik ta nainel ta mukʼul lumetik yuʼun Judá.
18 Jich yuʼun, te ajwalil Rehoboam la stikun ta stojolik te Adoram, te jaʼ swentainoj te machʼatik ikʼbilik tal yuʼun ya x-aʼtejik ta stojol te ajwalil, pero spisil te lum Israel la schʼojik ta ton, jich la smilik. Te ajwalil Rehoboam juʼ yuʼun moel ta scarreta, jich an bael ta Jerusalén.
19 Te lum Israel la stoy sbaik ta stojol te stsʼumbal David, jaʼto ta ora ini.
20 Jaʼnax te kʼalal la yaʼiy stojol spisil te lum Israel te sujtix tal te Jeroboán, la yikʼik tal te banti stsoboj sbaik sok la yotsesik ta ajwalil ta stojol spisil te lum Israel. Maʼyuk machʼa la stʼun te stsʼumbal David jaʼnax te stsʼumbal Judá.
21 Kʼalal kʼot ta Jerusalén te Rehoboam, ta oranax la stsob spisil te stsʼumbal Judá sok te stsʼumbal Benjamín, ay 180 mil ta tul winiketik te pʼijubenik ta lek* ta yakʼel guerra yuʼun ya yakʼbeyik guerra te lum Israel swenta ya schaʼyotsesik ta ajwalil te Rehoboam snichʼan Salomón.
22 Tey-abi, te Semaya, te winik yuʼun te smelelil Dios,* jich albot yuʼun te smelelil Dios:
23 «Jichme xa awalbey te Rehoboam snichʼan Salomón —te ajwalil yuʼun Judá—, spisil te stsʼumbal Judá, stsʼumbal Benjamín sok te yantik ants winiketik yuʼun te lume:
24 ‹Jich ya yal te Jehová: «Mame xmoex ta yakʼbeyel guerra te awermanotakik, jaʼ te israeletike. Sujtanik bael ta anaik, melel joʼon la jkʼan te jich ya xkʼot ta pasele»›». Jich te lume la schʼuunbeyik skʼop te Jehová sok sujtik bael ta snaik, jich te bitʼil albotik yuʼun te Jehová.
25 Jich yuʼun, te Jeroboán la schaʼpas te stsʼajkʼul te Siquem te ay ta witstikil yuʼun Efraín sok tey jil ta nainel-a. Ta patil lokʼ bael tey-a sok la schaʼpas te stsʼajkʼul te Penuel.
26 Jich la yal ta yoʼtan te Jeroboán: «Ta ora ini ya xchaʼsujt ta stsʼumbal David te wentainele.
27 Teme maba ya skom sbaik te ants winiketik yuʼun ya xmoik bael ta Jerusalén ta yakʼel milbil majtaniletik ta sna te Jehová, ya xjuʼ ya sut yoʼtanik te jich ya stʼunik te ajwalil yuʼunik, jaʼ te Rehoboam te ajwalil yuʼun Judá. Ya jnaʼ te yananix smilonik-ae sok jaʼ ya stʼunik te Rehoboam te ajwalil yuʼun Judá».
28 Te k’alal la yaʼiybey skʼop te jtojobteswanejetik yuʼune, te ajwalil la spas chaʼkojt jkolel* toro ta oro sok jich la yalbey te lume: «Wokol ya awilik te ya xmoex bael ta Jerusalén. Lum Israel, liʼ ay te Dios awuʼunik, jaʼ te machʼa la slokʼesex tal ta skʼinal Egipto».
29 Jich yuʼun la yakʼ jkojt ta Betel, te yane la yakʼ ta Dan.
30 Jich la sta smul te lume. Te ants winiketik ya xbajtik kʼalal ta Dan yuʼun ya yichʼik ta mukʼ te jkolel* toro te tey ay-ae.
31 Te Jeroboán la spas temploetik ta toyol awilaletik* sok la yakʼ winiketik ta sacerdoteetik te ma jaʼuk levitaetik.
32 Jaʼnix jich, te Jeroboán la yakʼ ta pasel jun kʼin ta 15 yuʼun te swaxakebal u jich te bin-utʼil te kʼin te ya yichʼ pasel ta Judá. Ta skajtajib chikʼbil majtanil te la spas ta Betel la yakʼbey milbil majtaniletik te jkolel* toroetik te la spase. Sok ay machʼatik la yakʼtiklanbey yaʼtel ta sacerdote ta Betel yuʼun te toyol awilaletik* te la spase.
33 Ta 15 yuʼun te swaxakebal u, te u te jaʼnix la stsae, jajch yakʼ milbil majtaniletik ta skajtajib chikʼbil majtanil te la spas ta Betel. La yakʼ ta pasel jun kʼin ta stojol te lum Israel, mo bael ta skajtajib chikʼbil majtanil yuʼun ya yakʼ milbil majtaniletik sok la yakʼ te xtomet schʼailel te chikʼbil majtanil yuʼune.
Notaetik
^ Ta hebreo: «ta snailpakʼik».
^ Ta hebreo: «te tsabilik».
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «jchʼiel».
