1 Reyes 13:1-34
13 Ta swenta smantal te Jehová, jtul winik lokʼ tal ta Judá, jich kʼot ta Betel. Te Jeroboán tekʼel ta stsʼeel te skajtajib chikʼbil majtanil yuʼun ya yakʼ te xtomet schʼailel te chikʼbil majtanil yuʼune.
2 Jich yuʼun, ta swenta smantal te Jehová, jich tulan la skʼopon te skajtajib chikʼbil majtanil: «¡Aʼiya awaʼiy stojol, skajtajib chikʼbil majtanil, skajtajib chikʼbil majtanil! Jich ya yal te Jehová: ‹¡Ilawil! ¡Ta stsʼumbal David yame x-ayin* jtul kerem te Josías sbiil! Yame schikʼ ta aba te sacerdoteetik yuʼun toyol awilaletik* te ya yakʼik te xtomet schʼailel te chikʼbil majtaniletik ta aba, sok yame schikʼ sbakel ants winiketik ta aba›».
3 Ta kʼajkʼal-abi la yakʼ ta ilel jun señail te kʼalal jich la yal: «Jaʼ te señail ini te yaloj te Jehová: Yame xjat ta olil te skajtajib chikʼbil majtanil sok yame xbuskʼij koel te tan* te ay ta sba».
4 Jaʼnax te kʼalal la yaʼiy stojol te ajwalil te tulan la skʼopon te skajtajib chikʼbil majtanil te ay ta Betel te winik yuʼun te smelelil Dios,* te Jeroboán la slokʼes skʼab ta skajtajib chikʼbil majtanil yuʼun la stuchkʼabtay te winik sok jich la yal: «¡Tsakaik!». Jich teʼub ta oranax te skʼab te la sjache sok maba juʼix yuʼun stijel.
5 Jich yuʼun jat ta olil te skajtajib chikʼbil majtanil sok buskʼij koel te tan te ay ta sba jich bitʼil te señail albot ta mantal yuʼun te Jehová te winik yuʼun te smelelil Diose.*
6 Jich yuʼun, te ajwalil jich la yalbey te winik yuʼun te smelelil Dios:* «Awokoluk, albeya wokol te Jehová te Dios awuʼun sok kʼanbeya te yakuk slekubtesbon te jkʼabe». Jaʼ yuʼun, te winik yuʼun te smelelil Dios la skʼanbey wokol te Jehová, jich lekub te skʼab te ajwalil sok jich jil te bitʼil ay ta nailale.
7 Jich yuʼun, te ajwalil jich la yalbey te winik yuʼun te smelelil Dios:* «Konik ta jna, weʼ uchʼajukotik sok yame kakʼbat amajtan».
8 Pero, te winik yuʼun te smelelil Dios* jich la yalbey te ajwalil: «Manchukme ya awakʼbon oliluk te anae maba ya jokinat bael, maba ya xweʼon sok maba ya kuchʼ jaʼ ta lugar ini.
9 Melel jich la yalbon ta mantal te Jehová: ‹Mame xweʼat sok mame xa awuchʼ jaʼ sok mame teyuk ya sujtat ta be te banti talate›».
10 Jich yuʼun la stʼun bael yan be sok maba tey sujt bael ta be te kʼalal tal ta Betel.
11 Ta yorail-abi, ay jtul j-alwanej te ay ta nainel ta Betel te mamalixe, te snichʼnab bajtik ta stojol sok la scholbeyik yaʼiy te stat spisil te bintik la spas ta Betel te winik yuʼun te smelelil Dios* sok te bin la yalbey te ajwalile. Te kʼalal laj yoʼtanik ta scholbeyel yaʼiy te statike,
12 jich albotik yuʼun: «¿Banti beil bajt?». Te snichʼnab la yalbeyik yaʼiy te statik te bin beil bajt te winik yuʼun te smelelil Dios* te talem ta Judá.
13 Jich albotik yuʼun te statike: «Chajpanbonik te jburro». Jich la schajpanbeyik te sburro sok la skajtajibin bael.
14 Jaʼ yuʼun bajt sle te winik yuʼun te smelelil Dios,* nakal ta yeʼtal mukʼul teʼ kʼot sta. Jich la yalbey te winik: «¿Jaʼatbal te winik yuʼun te smelelil Dios te talem ta Judá?». Jich la sjakʼ: «Jaʼ, joʼon-abi».
15 Te j-alwanej te mamalixe jich la yal: «Laʼ, konik ta weʼel ta jna».
16 Pero, jich la yal te winik: «Ma xjuʼ ya jokinat sujtel sok ma xjuʼ te ya xboon ta ana. Jaʼnix jich ma xjuʼ ya jokinat ta weʼel sok ta yuchʼel jaʼ ta lugar ini.
17 Melel jich la yalbon ta mantal te Jehová: ‹Mame xweʼat sok mame xa awuchʼ jaʼ tey-a. Mame teyuk ya sujtat ta be te banti talate›».
18 Jich la yal te j-alwanej te mamalixe: «Jaʼnix jich j-alwanejon-euk jich bitʼil te jaʼate, jtul chʼul-abat jich la yalbon ta swenta smantal te Jehová: ‹Ikʼa sujtel tal ta ana swenta ya xweʼ sok ya yuchʼ jaʼ›», xchi ta sloʼlayel.
19 Jich la sjokin sujtel te j-alwanej te mamalixe swenta ya xweʼ sok ya yuchʼ jaʼ ta sna.
20 Te kʼalal nakalikto ta weʼel ta mesa-ae, ay bin albot yuʼun te Jehová te j-alwanej te mamalix te ikʼawan sujtel tal,
21 jich tulan la yalbey te winik yuʼun te smelelil Dios* te talem ta Judá: «Jich ya yal te Jehová: ‹Melel la atoy aba ta swenta te smantal te Jehová sok te maba la achʼuun te mantal te la yalbat te Jehová te Dios awuʼune,
22 sok te sujtat tal ta weʼel sok ta yuchʼel jaʼ ta lugar ini, manchukme jich la awichʼ albeyel «Mame xweʼat sok mame xa awuchʼ jaʼ», jaʼ yuʼun maba ya awichʼ mukel ta smukenal te antiguo ameʼ atate›».
23 Te kʼalal lajix yoʼtan ta weʼel uchʼajel-a te winik yuʼun te smelelil Dios,* te j-alwanej te mamalix te ikʼawan sujtel tale, la schajpanbey te sburroe.
24 Jich bajt te winik yuʼun te smelelil Dios,* pero taot yuʼun jkojt león-choj ta be te milot yuʼune. Metsel jilel ta be te sbakʼetal sok kotol te burro ta stsʼeel te sbakʼetale. Jaʼnix jich, te león-choj kotol jilel ta stsʼeel te sbakʼetal te winike.
25 Tey-abi ay kʼaxik chaʼoxtul winiketik te la yilik te metsel ta be te sbakʼetal te winik sok te kotol te león-choj ta stsʼeele. Te winiketik ini ochik bael ta mukʼul lum te banti nainem te j-alwanej te mamalix sok la scholbeyik yaʼiy te bin la yilike.
26 Te kʼalal la yaʼiy stojol te j-alwanej te mamalix te ikʼawan sujtel tale, jich la yal ta oranax: «Jaʼ te winik yuʼun te smelelil Dios* te la stoy sba ta swenta te smantal te Jehová. Jaʼ yuʼun, te Jehová la yakʼ milotuk yuʼun jkojt león-choj, jich te bitʼil albot yuʼun te Jehová».
27 Jich yuʼun, jich la yaltiklanbey te snichʼnabe: «Chajpanbonik te jburro». Jich chajpanbot te sburroe.
28 Jich lokʼ bael, metsel la sta ta be te sbakʼetal te winik. Kotol ta stsʼeel te burro sok te león-choj. Te león-choj maba la stiʼbey te sbakʼetal te winik sok maba la smil te burroe.
29 Te j-alwanej te mamalix la sjachbey te sbakʼetal te winik yuʼun te smelelil Dios* sok la skajan ta sburro, la yikʼ sujtel tal ta slumal yuʼun ya yokʼetay sok yuʼun ya smuk.
30 Tey-abi la smukbey te sbakʼetal ta smukenal. Jich yakalik ta yalel ta okʼel: «¡Oʼbol aba kermano, oʼbol aba!».
31 Te kʼalal laj yoʼtan ta smukel te winike, jich la yalbey te snichʼnabe: «Te kʼalal ya xlajone, teyme xa amukonik te banti la yichʼ mukel te winik yuʼun te smelelil Diose.* Teyme xa awakʼbonik jbakel te banti ay te sbakel te winike.
32 Te bin la yal ta swenta smantal te Jehová ta stojol te skajtajib chikʼbil majtanil ta Betel sok ta stojol spisil te temploetik ta toyol awilaletik* te ayik ta mukʼul lumetik yuʼun Samaria, yame xkʼot ta pasel».
33 Manchukme jich kʼot ta pasel-abi, te Jeroboán maba la yijkitay te chopol be yuʼune. Melel machʼauknax la yotses ta sacerdoteetik yuʼun te toyol awilaletik.* Chikan machʼauk-a te ya skʼan ya x-och ta sacerdote ya x-akʼbot yaʼtel sok jich ya yal te ajwalile: «Te winik ini akʼa ochuk ta sacerdote yuʼun te toyol awilaletike».
34 Ta skaj te mulil la spasik te sfamilia te Jeroboán la yichʼik lajinel sok la yichʼik tupʼbeyel skʼoplalik ta balumilal.
Notaetik
^ Ta yantik variante «xpʼejkaj», «xtojk».
^ O «tan te ay xepuil», te ya skʼan ya yal, tan te kapal sok xepuil yuʼun te milbil majtaniletik.
