1 Reyes 14:1-31
14 Ta yorail-abi, te Abías snichʼan Jeroboán tsakot ta chamel.
2 Jich yuʼun, te Jeroboán jich la yalbey te yinam: «Awokoluk, baan ta Siló, lapa bael yan kʼuʼul yuʼun jich ma snaʼik-a te jaʼat te kinamate. Tey nainem-a te j-alwanej Ahíya. Jaʼ la yalbon te joʼon ya x-ochon ta ajwalil yuʼun te lum ini.
3 Baan ilawil, ichʼbeya bael lajunpejch pan sok chiʼil panetik soknix junuk jarra chab. Jaʼme ya yalbat te bin ya xkʼot ta pasel ta stojol te kereme».
4 Te yinam te Jeroboán jich la spas te bitʼil albote. Bajt ta Siló sok kʼot ta sna te Ahíya. Ta swenta te ayix yaʼbilal te Ahíya ma xyilix kʼinal; jun-nax te banti tʼojol te site.
5 Pero, te Jehová jich yalojbeyix-a te Ahíya: «Yame xtal te yinam te Jeroboán yuʼun ya sjojkʼoybat te bin ya xkʼot ta pasel ta stojol te skereme, melel ay ta chamel. Joʼonme ya kalbat te bin ya skʼan ya awalbeye. Te kʼalal ya xjule, yanme kʼuʼul slapoj yuʼun jich ma xyichʼ naʼbeyel sba-a».
6 Jaʼnax te kʼalal la yaʼiy stojol te yak ta noptsajel tal ta tiʼnail te antse, te Ahíya jich la yal: «Ochan, yinam Jeroboán. ¿Bin yuʼun te ma xa kʼan ya awakʼ aba ta naʼele? La kichʼix albeyel te ay bin tulan skʼoplal ya kalbat awaʼiy.
7 Sujtan bael sok jichme xa awalbey te Jeroboán: ‹Jich ya yal te Jehová te Dios yuʼun Israel: «Joʼon te la jtsaat ta yolil te alumal swenta ya x-ochat ta jwolwanej ta lum Israel kuʼun.
8 Joʼon la jpojbey ta stsʼumbal David te wentainel sok jaʼat la kakʼbat. Pero, ma jichukat te bitʼil te David te j-abat kuʼun te la schʼuunbon te mantaliletik kuʼun sok te jun yoʼtan la yakʼ sba ta jtojol te kʼalal jaʼ la spas te bin lek ta jsite.
9 Yan te jaʼate kʼax chopol* te bintik apasoj, kʼaxtoxan-a te bitʼil te machʼatik nailajem awuʼune. Te jaʼate la apas jun dios awuʼun sok lokʼombaetik te pasbil ta ultesbil takʼin yuʼun la ajachbon kilinba sok te jich la awalakʼpatiyon.
10 Jaʼ yuʼun, ¡yame jtikun wokolil ta stsʼumbal te Jeroboán! ¡Yame jlajin ta jkʼaxel ta lum Israel spisil te winiketik* yuʼun te Jeroboán, teyme ochem skʼoplal-a te machʼatik maba mukʼ skʼoplalik! ¡Yame jmes spisil te stsʼumbal te Jeroboán jich te bin-utʼil ya yichʼ mesel te stsaʼ te chambalametik jaʼto te kʼalal maʼyuk bin ya xjile!
11 Te machʼatik ay yuʼun te Jeroboán te ya xlajik ta mukʼul lum yame yichʼik tiʼel yuʼun te tsʼiʼetike. Te machʼatik ya xlajik ta akiltik yame yichʼik tiʼel yuʼun te jaʼmal mutetik te ya xwilik ta chʼulchan, melel jich yaloj te Jehová»›.
12 »Jich yuʼun sujtan bael ta ana. Te kʼalal ya x-ochat ta mukʼul lum, yame xlaj te kereme.
13 Spisil te lum Israel yame yokʼetayik sok yame smukik. Jaʼnaxme stukel ta sfamilia te Jeroboán te ya yichʼ mukel, melel jaʼnax stukel ta stsʼumbal te Jeroboán te ay bin lek ilbot yuʼun te Jehová te Dios yuʼun Israel.
14 Te Jehová yame yak’ chiknajuk jtul ajwalil ta stojol te lum Israel te ya slajinbey te stsʼumbal te Jeroboán te kʼalal ya xkʼot te skʼajkʼalel, te kʼajkʼal-abi liʼ ayixe.
15 Te Jehová yame syukʼilan te lum Israel, jich te bin-utʼil ya xyukʼilanot te jalal* ta yutil jaʼ. Yame sbul lokʼel kʼalalto ta slojpʼ o yisim* te lum Israel ta kʼinal te la yakʼtiklanbey te antiguo smeʼ statike sok yame spuktiklan bael kʼalalto ta jejch mukʼul jaʼ Éufrates, melel la sjachbeyik yilinba te Jehová te kʼalal la spasik te chʼul teʼetik yuʼun Aserá.*
16 Sok yame yijkitay te lum Israel ta skaj smul te Jeroboán sok te la yakʼbey sta smul te lum Israel».
17 Jich sujt bael te yinam te Jeroboán, kʼot ta Tirzá. Jaʼnax te kʼalal la stekʼbey te smarcoil te stiʼ sna, laj te kereme.
18 Spisil te lum Israel la yokʼetayik sok la smukik jich te bitʼil la yal te Jehová ta swenta te j-abat yuʼun, jaʼ te j-alwanej Ahíya.
19 Te bintik la spas ta skuxlejal te Jeroboán sok te bitʼil la yakʼ guerra soknix te bitʼil wentainwane, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
20 Te jayeb tiempo wentainwan te Jeroboán jaʼ 22 jaʼbil. Ta patil way sbakʼetal sok te antiguo smeʼ stat. Tey-abi, jaʼ och jilel ta ajwalil te Nadab, te snichʼane.
21 Ta Judá jaʼ och ta ajwalil te Rehoboam snichʼan Salomón. Ay 41 yaʼbilal-a te Rehoboam te kʼalal och ta ajwalil sok wentainwan 17 jaʼbil ta Jerusalén, jaʼ te mukʼul lum te la stsa te Jehová ta spisil te stsʼumbal Israel yuʼun tey ya x-ayin-a te sbiile. Naamá sbiil te snan* te Rehoboam te jaʼ ammonita-ants.
22 Te Judá jaʼ la spas te bintik ma lek ya yil te Jehová, ta skaj te smulike la sjachbeyik yilinba te Diose kʼaxtoxan-a te bitʼil la spasik te antiguo smeʼ statike.
23 Jaʼnix jich maba la skom sbaik ta spasel toyol awilaletik,* balal tonetik te ya yichʼik ta mukʼ sok la spasik chʼul teʼetik yuʼun Aserá* ta toyol witsetik sok ta yeʼtal teʼetik te bayal yabinal.
24 Jaʼnix jich ay winiketik tey ta lum te ya schon sbaik yuʼun ya sjokinik ta wayel yan winik swenta ya yichʼik ta mukʼ te lokʼombaetik yuʼunike. La spasik spisil te bintik ilobtik sba jich te bitʼil ya spasik te nacionetik te la stentiklan lokʼel te Jehová ta stojol te israeletike.
25 Te kʼalal ayix joʼeb jaʼbil ta ajwalil-a te Rehoboam, te Sisac te ajwalil yuʼun Egipto mo bael ta yakʼbeyel guerra te Jerusalén.
26 La spoj bael te kʼulejalil te ay ta sna te Jehová sok te kʼulejalil te ay ta sna te ajwalil. La yichʼ bael spisil te kʼulejalil, soknix te majkilaletik te pastiklanbil ta oro yuʼun te Salomón.
27 Te ajwalil Rehoboam ta cobre la spastiklanbey sjelol te majkilaletik sok jaʼ la yakʼtiklanbey skanantay te jwolwanejetik yuʼun te jkananetik, jaʼik te machʼatik ya skanantayik te yochibal te sna te ajwalile.
28 Ta jujun buelta te ya xtal te ajwalil ta sna te Jehová, te jwolwanejetik yuʼun te jkananetik ya yichʼik bael te majkilaletik. Ta patil ya schaʼsujtesik ta yawil, jaʼ te banti ay te jkananetike.
29 Te bintik la spas ta skuxlejal te Rehoboam sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
30 Te Rehoboam sok te Jeroboán spisil-ora ayin guerra yuʼunik.
31 Jich te Rehoboam way sbakʼetal sok te antiguo smeʼ stat sok la yichʼ mukel ta Mukʼul lum yuʼun David. Naamá sbiil te snan,* jaʼ ammonita-ants. Tey-abi, jaʼ och jilel ta ajwalil te Abiyam,* te snichʼane.
Notaetik
^ Ta yantik variante «ma lek».
^ Ta hebreo: «te machʼatik ya schuxtayik pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ O «carrizo».
^ Ta yantik variante «yejkʼach».
^ Ta yantik variante «smeʼ», «smama».
^ Ta yantik variante «smeʼ», «smama».
^ Jaʼ yan sbiil te Abías.
